講起去觀塘搵食，第一下諗起嘅通常都係工廈café，不過最近有間新酒店開業，入面有間半自助餐餐廳，海鮮生蠔任食，主菜有幾款肉扒，包括M6和牛都有得揀，甜品則以花系做主題。

呢間BUFFET餐廳，地方唔算好大，自助餐區一眼就睇晒。不過麻雀雖小，五臟俱全，由海鮮、刺身到凍肉、沙律、甜品都有。入座仲會首先每位送半客波士頓龍蝦。

回本位一. 海鮮任食

海鮮約有6款選擇，包括即開愛爾蘭石蠔、阿拉斯加長腳蟹、龍蝦、翡翠螺、青口同熟蝦，要回本，就當然係瘋狂食生蠔啦。愛爾蘭石蠔肉質較爽脆甜身，海水味同蠔味都相對較淺，如果你本身唔係太好重口味嘅就啱晒。

回本位二. 花系甜品

對甜品控嚟講，甜品先至係自助餐嘅主菜，食完海鮮食完刺身基本上就可以直接跳去食甜品。呢度嘅甜品選擇算係幾多，除咗喺中間任拎嘅花系主題甜品之外，千祈唔好漏咗後面甜品櫃內嘅精緻甜品。幾款甜品以花入饌，例如橙花蛋糕、菊花糕、薰衣草意式鮮奶凍、紫羅蘭焦糖燉蛋咁，各有特色，花味亦突出。

回本位三. Movenpick雪糕任食

任食雪糕本身已經好開心，仲要係任食Movenpick嘅雪糕喎，有冇quota都好，梗係都要食多幾杯抵返條數啦，最多咪第二日跑多個圈囉（好似係咁）。

回本位四. 主菜任揀

雖然主菜冇得任食，但係400幾蚊食晒上面啲嘢再鋸多塊扒，都算係咁啦。6款主菜入面，最推介當然係M6級和牛肉眼扒拌小甘筍及忌廉焗薯，和牛肉味香濃，肉汁豐富，就連伴碟嘅焗薯亦富牛油香味。

至於串燒三文魚伴炒薯仔及意大利瓜就最啱打卡，師傅特地訂造個吊架返嚟，將三文魚同配菜切開、串起，好有氣勢。但溫提，打卡要快，太慢一嚟凍晒，二嚟會跌晒啊。

其餘選擇仲有烤澳洲羊架伴新薯及新鮮時蔬、香煎帶子伴野菌芝士黑松露醬意大利飯、油封法國鴨脾伴南瓜蓉及法國玉豆同埋法式香烤乳豬伴薯蓉及小甘筍。

Walter Bistro
地址：觀塘巧明街97號智選假日酒店1樓

*餐單或價錢或會因供應而有所更改，一切以餐廳決定為準

文：Kar
相、片：Tom Li