想有一個特別啲嘅用餐體驗，可以試試尖沙咀商場呢間新開嘅藝術餐廳。餐廳由本地知名藝術家李梓良Terence開設，將藝術融入美食中，希望可以透過美食，能夠帶動更多人認識藝術。

Terence話：「成間餐廳好似自己嘅一件作品咁。」餐廳大部份嘅裝飾，如吊燈、掛畫及碗碟都係佢嘅作品。菜式方面邀請咗兩位各擅長日本菜及意大利菜嘅大廚坐陣，希望畀人一個輕鬆而執著嘅感覺。

另外餐廳另一邊有個位置舉行各種藝術工作坊，如陶瓷體驗班咁，希望另客人有一個特別嘅用餐體驗。

煙薰韓牛柳配昆布鹽麹($498)

選用1++韓國牛柳，肉質軟腍之餘有牛味，而且有陣陣煙燻香，配昆布鹽更突出牛肉味道。配菜羅馬椰菜花味道帶微微甘苦及蔬菜鮮甜味，愈食愈上癮。

大閘蟹南瓜薑汁意粉($328)

踏入大閘蟹當造季，又點可以唔食呢～餐廳將大閘蟹融入意粉中，醬汁加入南瓜及薑汁，大閘蟹鮮味更出。意粉吸收晒大閘蟹味道，啖啖都係蟹味！

紅蝦帶子拉麵($248)

湯底打破傳統，加入少許韓式元素，泡菜味噌湯味道帶甜酸辣，又幾惹味。另外海鮮都係選用靚料，如新鮮青口、日本刺身級帶子及珍貴嘅西班牙大紅蝦。

慢煮帶子配墨汁脆片(+$88)

低溫慢煮日本刺身級帶子，帶子仍然嫩滑，配上焦糖意大利火腿、椰菜花蓉及墨汁脆片，口感味道同樣豐富。

拼盤小食(+$188)

至於鍾意相機食先嘅朋友，一定唔可以錯過呢個拼盤。拼盤包括呢個魚子醬小盒、大閘蟹酥皮盒、荔枝紅咖喱牛肉小撻、矮瓜紅菜頭多士及蕃茄羅勒小撻，件件都係用心之作。

桂花咖啡($88)、花果飄香($88)

另外供應咖啡及果茶飲品，桂花咖啡帶淡淡花香，甜味較重。而花果飄香嘅水果會根據時令而有變化～

Lilium by Gitone

地址: 尖沙咀梳士巴利道18號Victoria Dockside K11 Musea 5樓509號舖

文: Yanica

相、片: Tom Li