必試松葉蟹甲羅盛煲仔飯!土瓜灣新開創意Fusion餐廳(有片)
2020-02-25

松葉蟹甲羅盛配煲仔飯?黑糖珍珠奶茶變Cocktail?無錯,土瓜灣呢間新開嘅Fusion酒吧餐廳主打各款創意菜式,有新鮮感得嚟又好味。加上選用嚟自法國、日本等地嘅優質食材,即叫即做,心機真係加晒分!
 


Nonsense位於土瓜灣,負責人話係因為想慳返啲租金,用靚啲嘅食材希望以質素取勝!其中一位負責人之前係做食品批發,所以可以搵到唔少優質食材,再由廚師創作各款別樹一幟嘅菜式。加上近門口有大窗做半開放式空間,通風都好啲。
 


冬蔭功·炸軟殼蟹($108)

以泰式冬陰功為靈感,大大隻軟殼蟹炸至金黃香脆再加各款香料,食落香辣惹味,醒胃之餘其實都幾啱送酒!記得加少少青檸汁,酸酸辣辣咁真係幾有冬蔭功Feel㗎。
 


叻沙·龍蝦尾·炒意粉($138)

開業兩個月但佢哋一直改良餐牌,好似呢個炒意粉之前係用大蝦,一次改用龍蝦之後發現大受歡迎,就決定改用波士頓龍蝦尾。廚師好細心已經幫大家開好殼,食落啖啖彈牙龍蝦肉好滿足!而意粉加香料味濃郁嘅叻沙醬亦夠香口,如果蝦香再突出啲就更好喇。
 


慢煮黑毛豬鞍扒·八珍甜醋汁·焦糖蘋果($258)

餐廳熱賣主菜之一,肉厚嘅豬鞍扒慢煮後保持肉嫩多汁。而八珍甜醋汁更加係亮點,味道酸中帶甜,配豬鞍扒可以減低膩度。焦糖蘋果無想象中咁甜,口感軟腍Juicy,令呢碟菜式整體更清爽,好啱女仔同小朋友食。
 

更多【新店直擊】:
1. 九龍灣泰菜推泰式小食及啤酒放題 港籃球員兼老闆:香港人都要加油
2. 太子蜜瓜飲品專門店 200g日本蜜瓜奶 即叫即製
3. 本地第二代蠔民開蠔主題粉麵小店 必試鮮蠔湯米線、大大粒香脆蠔餅

 

北海道松葉蟹甲羅盛·大蝦·海鮮日式煲仔飯($238,配白味噌湯)

唔少香港人冬天都鍾意食煲仔飯,改成日式唔單止將米改成珍珠米,亦將豉油改為自家調配嘅醬汁一齊煲,令粒粒分明嘅飯充分入味。配料方面就換成北海道松葉蟹甲羅盛同各款海鮮:大蝦、蠔、青口、帶子、魷魚。
 


主角松葉蟹甲羅盛嘅蟹膏味相當香,加上蛋黃撈勻就可以撈飯食!而飯焦除咗就咁食之外,亦可以加落配搭嘅白味噌湯一齊食㗎。
 

 

Okinawa Black Sugar Milk Tea($58)

叫得酒吧餐廳,呢度亦供應紅酒、白酒、各式雞尾酒同特飲。呢杯Okinawa Black Sugar Milk Tea有Cocktail同Mocktail兩個版本,都係用咗沖繩黑糖漿加上奶茶作為基底,最後灑上朱古力粉令飲品睇落有啲似盤栽,味道香甜。
 


Perfume Fruit Oolong Tea($58)


另一杯特飲推介係Perfume Fruit Oolong Tea,飲之前可以按自己喜好噴上玫瑰糖漿,令呢杯水果茶增加香氣,成為色香味俱全嘅飲品!水果茶用烏龍茶、蘋果汁、熱情果醬等調配,酸甜清新。如果介紹呢兩杯都唔啱心水,不妨試下同Bartender傾計,佢可以按你嘅心情幫你調配出屬於你嘅Cocktail。

而家用OpenRice訂座,惠顧晚飯,可免費享用一杯特飲或紅白酒!
 




Nonsense  
地址:土瓜灣北帝街143-155號順輝大廈地下4號舖




文:Cathy
相、片:Calvin Kwok

Keyword
土瓜灣
Fusion菜
日式煲仔飯
Cocktail
Nonsense
新店直擊
走在最前線,為大家搜羅及報道有關新開餐廳的資訊。
Restaurant Info