來自大阪嘅二星米芝蓮壽司芳，開業28年，以創意壽司馳名，靈魂人物Chef Hiroki，將江戶前壽司一反傳統，破舊立新，創作出一道道特色摩登日本料理。壽司芳首間海外分店選址香港，雖然Chef Hiroki並非長駐香港店，由日籍總廚Sugawara主理，用料、做法都同日本店一樣，保證風格同味道一致。

午市晚市均只設廚師發辦，晚市由$1,980起跳，以有6道前菜、8件壽司及卷物，入門級可以先試午市，以傳統壽司為主，價錢分$680/7件、$880/9件及$1,200/12件。

午市由本地師傅Sang師傅操刀，壽司採用北海道七星米，已加入赤醋及白醋製作，但就冇加糖，味道偏酸，黏度亦較低，一放入口就會散開。

壽司套餐供應嘅魚生每日唔同，根據時令及當日來貨而決定，而全部都係野生魚。採訪當日就以白身魚為主，師傅會將以味醂、酒製成醬油及白醋塗上魚生表面，帶出鮮味。

先由金目鯛開始，之後有招牌吞拿魚醬油漬。吞拿魚醬油漬現時用沖繩貨，赤身以醬油醃一日，用熱水微灼，做出如熟成效果，魚味濃又有醬油香。

之後為味道清爽嘅小柱及池魚，池魚一條條釣上來，體積比一般池魚細，味道更鮮更濃，魚味重而唔會搶味或者過腥。

Sang師傅稱因為多味道較淡嘅白身魚，所以味特別於壽司之間安排蟹肉味噌湯，味噌湯加入蝦乾，鹹香鮮甜濃郁，即刻喚醒味蕾。

第五件為魚身好通透嘅𩶘魚，加入葱花味道清新。然後就係魚鮮重嘅中拖羅，最後以油香十足炙燒赤睦魚及乾瓢卷作結。

壽司如江戶前做法，一口一件，9件、12件就會有海膽、大拖羅等款式，但都係根據當日時令款式而定。魚生新鮮而且壽司溫度適中，但個人就覺得味道偏酸咗少少。雖然同晚市餐牌唔同，不過如果想食到米芝蓮級數嘅壽司，不妨一試。

壽司芳

地址：尖沙咀金馬倫道8號The Otto酒店1樓

文、相、片：Perrins