仲記唔記得香港近年食韓式炸雞嘅熱潮喺嚟自大熱韓劇《來自星星的你》？當中全智賢食嘅炸雞品牌最近終於正式登陸香港！首間分店位於旺角，試業期間已經引嚟唔少Fans潮聖，到底有咩招牌口味？等開飯仔介紹啦！
 

BHC喺韓國由國民女演員全智賢代言，係唔少人去到首爾必食嘅炸雞之一，品牌主打用葵花籽油炸雞，因為葵花籽油主要由單元不飽和脂肪酸同多元不飽和脂肪酸組成，有助降低壞膽固醇，比其他食油健康！大部分食材都由韓國空運到港，所有炸雞亦係即叫即炸。
 

BBU-LINKLE（$168）

而香港首店亦將當中九款人氣口味帶到嚟香港！好似呢款BBU-LINKLE即係芝士口味，芝士粉係品牌獨有配方，一上枱就聞到相當濃郁芝士香！食落皮薄香脆而雞肉嫩滑入味，芝士粉味道香濃，食食下覺得有啲膩可以點乳酪醬汁，味道有啲似Sour Cream，微酸清新。
 

佢地嘅炸雞就算凍咗，炸皮依然保持香脆而且食落無油膩感。唯一扣分嘅係始終雞胸位會少啲肉汁，唔及雞髀肉咁嫩滑。
 

MACHO-KING（$168）

另一韓國人氣口味係東方醬油，聞起嚟醬油鹹香同炸雞嘅香味相當誘人，而食落先有辣椒同蔥蒜嘅辣味，之後係醬油同蜜糖嘅鹹甜風味，加上炸雞上面嘅黑芝麻，香口得嚟會有少少上癮嘅感覺！
 

有趣嘅係其實MACHO有男子氣概嘅意思，因為呢款口味本來係想推介畀男士，無諗到喺韓國反而係女士嘅最愛！不過可以肯定嘅係呢款有中式小炒風味嘅款式，應該幾適合香港人口味。
 

 

Marry Me（$58）

食炸雞想解膩當然唔少得飲返杯啤酒或者特飲，呢杯Marry Me唔單止個名特別，連粒冰都特別有少女心：有朵食用花喺裡面㗎！配埋粉橙色嘅西柚梳打同雜莓，酸酸甜甜又有氣泡，感覺特別Refreshing。
 

Grand Mother's Secret Latte（$68）

呢杯Latte與其話係飲品，不如話係一杯飲得嘅甜品。上面係煙韌嘅團子，下面係鋪滿可可粉嘅穀物牛奶，穀物粉落得幾多，記得搞勻嚟飲。亦因為糰子無乜味道，可以配埋香甜嘅Latte一齊享用。
 

旺角店暫時仲係試業當中，午市未有供應炸雞，想食招牌炸雞就記得晚市早啲去，因為炸雞數量有限售完即止。前幾日大概21:00就售罄，如果想中午或者宵夜去食炸雞，就要等佢地正式營業啦。
 

BHC
旺角登打士街43H號登打士廣場1樓
*試業期間午市（11:30－15:30）未有炸雞提供，晚市（17:30－02:00）炸雞數量有限，售完即止

文、相、片：Cathy