係崇潔街轉個彎就見到呢間「星源一品料理」，睇名以為係食星馬菜，其實係間日本料理。她與「加太貴」不相伯仲，分成ABC 舖，門口仲大紅燈籠高高掛，氣派十足。店內企理乾淨，十分光猛，跟隔離舖的「浪漫情調」有點分別。最開心的是C 舖內有獨立房間，大榻榻米房必須脫鞋內進，可以坐8-10人，不過消費要超過$2000先有得入；但普通房就完全冇計，幾時都入得，可坐2-3人，情侶檔躲入裏面談談情、吃吃菜就最溫馨不過！仲有個「貴賓存酒」位，好有VIP 感覺。\r\n
\r\n至於食物就冇得講，混合中日的烹調方法，真係正到口水湧流。原來負責人吳先生亦是「星源」的總廚，稍等半句鐘就弄好了五款撚手小菜，味味都熱辣辣，香氣撲鼻。第一味是小食「蘆荀豬肉卷」（$50），將薄片豬肉用醬汁燒熟，然後包於蘆荀上，爽口甜美，最宜送酒。\r\n\r\n第二道出場的是「牛鍋丼」（$50），其實即是窩蛋燒牛肉煲仔飯，配料惹味，有青椒洋蔥，連牛肉汁都流埋出來。
\r\n接著的便是「酒煮蜆」（$40），材料有大蜆、貴妃螃等。用溝淡了的酒煮蜆，熟透後蜆肉滲透酒香，成煲浸於清酒中，十分入味，嚴冬來一煲，包您暖胃冇酒氣。\r\n\r\n另有一味抵食招牌菜「蟹膏皇海鮮粥」，只售$100 ，材料絕無花假，將原隻花蟹（真係有肉的！）煮熟後放於老火海鮮粥中，再將蟹膏攪碎灑上面，全都是上乘材料，吳先生強調：「出面都有呢種粥食，不過價錢就貴成倍，而且未必真材實料！」$100 成窩蟹皇粥真係超抵食。
最後一道「燒魷魚筒墨魚汁飯」，是最花時間的一道，亦係小記最愛吃的一味菜。飯是墨魚汁炒飯，所以是黑色的，將蜆肉、什菜、洋蔥等配料與墨魚飯一起炒香，
惹味得來又含一股海鮮香味。當墨魚飯準備妥當，就會釀入原隻魷魚筒內，然後送入焗爐燒。稍等一會，吳大廚打開爐，熱氣與煙頓時噴散出來，濃郁的燒魷魚香已燻遍整間店舖，這時我已目瞪口呆，垂涎十尺。最後將燒魷魚切開，再淋上燒雞汁便大告成。挾一塊呷一呷，煙韌混合了飯香，海鮮味在口腔徘徊不散，自己好像化成了一隻墨魚，在海底飄游……
開飯專題
開飯仔為你提供各類型最新飲食情報及優惠，全面照顧你的飲食喜好。
