約會又好，一班人或家族聚餐都好，發掘新店嚐新就最過癮～開飯仔每個月會搜羅各區特色新餐廳，同大家齊齊緊貼潮流打卡嘆美食，即睇邊間啱你心水～
11月更新
自家煉油煲仔飯 美麗小廚
圖：宵夜醫肚有選擇～呢間粵菜餐廳開到凌晨1點半，愈夜愈有港式大排檔感覺，因為主攻煲仔飯同雞肉宴呀！不過日間就有反轉感，會有惹味碟頭飯同健康蒸飯。餐廳認為「油是靈魂」，所以主廚每日都會親自監製5款手工煉油，好似即點即製煲仔飯會配自煉香油同豬油。另外招牌菜「鋒哥三寶煲仔飯」以玫瑰五五臘腸、鵝肝膶腸同雲南諾鄧鹽封肉做主料；「麗姐海陸空煲仔飯」則有鮑魚、雞件同臘味，新舊口味都有。加埋大紅袍脆皮雞、脆米蜜椒番薯牛柳等香口菜式令人大滿足！
地道泰式小店 艾卡邁
圖：由泰國人主理嘅泰式小店，主打地道風味，店內滿牆都係泰文海報同國旗，真係好有泰國氣氛。環境都乾淨開揚，座位闊落，加埋店員熱情招呼，體驗感滿分。人氣菜式推介泰式蟹肉奄列、烤豬頸肉以及泰式豬肉碎沙律等，好啱嗌返枝酒啤一啤，或者配多杯無糖青檸梳打，酸甜清新又解辣。
福岡博多老店風味 博多槍烏冬
圖：餐廳(IG) 、alaialiu
喺日本福岡縣內有3間分店、經營接近60年嘅烏冬店，選址尖沙咀開設首間海外分店！據知香港店會同福岡各店一樣，使用同樣嘅烏冬麵同湯底，三款招牌菜：名物！博多槍烏冬同天下三烏冬都配有「32cm炸牛蒡」為賣點(前者1枝，後者3枝)；仲有香噴噴博多白咖喱忌廉烏冬登場！加埋明太子烏冬、炸蝦天婦羅烏冬以及天丼等合共19款美食之外，佢哋亦表示會開發香港店限定獨家菜式，兼繼續進軍亞洲其他地區𠻹。
10月更新
童話式鬆餅小木屋 Grandma’s Scones 
圖：店舖(IG)
馬路邊嘅溫馨小木屋，入到去好似童話世界咁，其實係本地人氣烘焙品牌新店！新出嘅檸檬磅蛋糕沿用傳統法國食譜，味道清新加上鬆軟質地，係必試之選！不鏽鋼盒子蛋糕個Print仲勁可愛，超溫馨，口味有芝士蛋糕同開心果焦糖香蕉蛋糕2款～嚟緊舖頭仲會出售店主喺唔同地方搜羅嘅餐具，超有心思～
高CP值港式滷味 大墨魚小食店 
圖：幾錢食到港式滷味？呢間小店最平$8/串就有交易！人氣之選一定係大墨魚同超大生腸，但估唔到連鮮鮑魚都有，而且新鮮厚肉幾出色。佢嘅靈魂醬汁係黃芥末加椰香沙嗲，鹹香微辣愈食愈上癮。仲有秋葵、金錢肚呢啲選擇，多幾個人食嘅話，推介share個皇牌大combo。
由牛舌尖食到舌根 咕嚕牛舌專門店
圖：牛舌控出動喇～天后開咗間牛舌專門店供應多款牛舌定食，由柔嫩嘅牛舌根到用舌尖肉製成嘅漢堡扒都有，最正係定食套餐$88起咋！其中極上厚切牛舌定食會有迷你牛肉漢堡扒、牛舌咖喱、牛骨蘿蔔湯、溫泉蛋同日本米飯等，配搭多元化～另外亦有鹽蔥醬牛小排同燒汁肥牛野菜卷定食，畀多啲選擇大家。
精緻一人海景火鍋 圍爐 
圖：HiroLai
嘆個有輕奢感又唔太大負擔嘅一人火鍋，天后呢間新店就啱你喇！由湯底到火鍋配料($28起)都係自由組合，6款湯底之中以潮汕滷水湯同百香果酸湯最特別；而配料、小食就以潮汕風味為主，供應潮汕牛肉丸、汕頭獅頭鵝腸、黑毛肚、花雕醉蝦、滷水炸乳鴿、酒釀丸子等等，花款幾多，加埋維港海景都咪話唔chill～
9月更新
日本過江龍平民意粉 Parmenara Premium
圖：嚟自日本名古屋嘅連鎖平民意式餐廳，今年4月先喺屯門開香港首間分店，話咁快就喺尖沙咀開分店。有網民表示食過佢哋嘅招牌古法土鍋即煮手工意粉確係唔錯，另外薄餅都係重點食品，特別啲有白雪蜂蜜芝士薄餅，甜甜哋幾開胃，如果想一次試多啲，自選半半薄餅就幫到你喇。
手工意粉店以新形象回歸 ALMA &
圖：西營盤手工意粉店Sooner早前7月同大家Say Goodbye，好多Fans都唔捨得，但大家可以開心返喇，事關佢哋以新形象回歸！新店除咗繼續有各種手工意粉，例如大受歡迎嘅Crispy Gnocchi，另外仲加入全新設計嘅西班牙Tapas同主菜～目前已知Menu有Set Lunch；晚市單點則有伊比利亞火腿芝士炸薯球、蟹肉糖果意麵、烤八爪魚珍珠麵等等，選擇更加多。
韓流+兩餸飯入侵餅屋 聖安娜餅屋 (太子)
圖：由細食到大嘅餅店都追上潮流，突破框框，跨界炮製韓式兩餸飯～太子新店用韓國直送食材同烹飪技術，現！場！即！製！十幾款自選韓式料理(輪流供應)，例如炸雞、泡菜煎餅。店內仲有少量吧枱座位，需要揾地方速食嘅朋友不妨留意吓。當然每日新鮮製作嘅烘焙品依然係重點，例如用日本雞蛋、3.7牛乳整嘅港式三文治系列、即烤加料菠蘿包、手工薄餅等。
8月更新
誠意任食日式放題 極．大瀛喜
圖：日式放題有齊串燒、炸物、鐵板燒、壽司、一品料理等已經好豐富？呢間主題店仲有唔少大熱中、泰菜式呀！放題按級別供應唔同菜餚，例如油鹽焗焗奄仔蟹、上湯芝士焗龍蝦伊麵、期間限定皇子糯米乳豬等；另外泰式虎蝦、櫻桃鵝肝都係必食之選。如果你係蟹迷，推薦試埋避風塘炒蟹、蟹皇鮮鮑魚粥、金湯花膠蟹皇翅同蟹肉扒豆苗～甜品方面都幾多選擇，包括Häagen-Dazs雪糕、Dreyer’s雪糕、法式麵包開心果、榴槤雪條、芝士撻、海燕窩椰汁燉木瓜等等，無論邪惡或養生口味都滿足到你！
一汁多菜+新元素 吔咩嗲 吔嘢事無所
圖：Idea多多嘅日式料理店～第三間分店選址西環，繼續供應一汁多菜餐單同甜品，前者有手撻黑松露堡、雞皮餃子等等(留意會不時轉換菜式)，擺盤好有日式家常菜感覺。不過相信大家最開心係佢照舊唔收加一服務費！老闆仲話新舖有別於另外兩間分店，除咗食物稍為高檔啲啲，仲會賣埋酒精飲品。
足料魚蛋粉 夏銘記
圖：呢間潮式魚湯粉麵老字號，憑住真材實料嘅手打魚蛋同鮮炸魚片打響名堂，最近喺北角開咗新分店！必試紫菜魚四寶麵，有齊100%全魚製作嘅魚蛋、魚皮餃、墨魚丸、魚片，鮮味十足，推介食辣嘅朋友落埋手工製辣椒油，更加惹味～唔少客人仲會叫埋原條鮮炸魚片，厚切爽彈，魚味突出！除咗湯麵外，餐廳仲有蔥花鵝腸豉油王撈粗、豬手撈麵等選擇。
7月更新
韓國年糕鍋店35cm年糕 青年大邦
呢間嚟自韓國嘅年糕鍋店，以「茶房」為設計概念，以20世紀初復古裝修風格打造好似當時韓國流行嘅茶房咁，成為大家嘅聚腳點。招牌年糕鍋有7款，鍋底醬料就有5款，每鍋都會建議特定醬料，亦可以加配料。好似酥炸魷魚皇年糕鍋有原隻炸魷魚，一上枱已經香噴噴，一邊煮一邊收汁；35cm長嘅年糕口感軟糯，仲愈煮愈入味！要食到年糕鍋嘅靈魂，梗係要叫埋飛魚籽紫菜炒飯，用年糕鍋最後嘅醬汁炒飯，勁惹味呀！另外仲有好多韓式小食、釜飯、炸雞、紫菜包飯等等啱一大班人share，推薦甜甜辣辣、帶啲啲酸味嘅香橙辣香雞，唔係一般嘅韓國炸雞啊～
咖喱麵主題店 緊張咖哩麵
圖：Kan Lee
本店位於吉隆坡增江(Jinjang)嘅特色麵店嚟咗香港喇！主打嘅咖喱麵總共有5款口味，例如入門款「好卵！緊張咖喱麵」、配料有花膠同咖喱雞嘅「好卵！好膠！緊張咖喱麵」、限量供應兼配料有龍蝦、鮑魚、軟殼蟹同咖喱雞嘅「好卵！闔家富貴緊張咖喱麵」等。嗌埋招牌咖喱雞腳、斑蘭葉巴斯克蛋糕等小食同甜品，成餐就更圓滿喇～
結合傳統廣東湯底+雞煲 鳳園雞煲火鍋 
佔地三層嘅雞煲火鍋餐廳，特別引入養足300日嘅果園雞「脆皮雞」做鍋底主角，再加入五指毛桃煮成袪濕養生嘅藥膳湯底，香濃又鮮味～而橄欖脆皮雞煲就注入潮汕「藥食同源」食材，以清潤嘅橄欖入湯，入口回甘，更加突顯雞肉原味道。重口味朋友就要試吓鳳園雞煲，鮮嫩文昌雞配秘製「鳳園醬汁」爆炒至收汁，夠晒惹味，加入高湯變身火鍋一煲兩食無論煮生蠔、鮑魚都更加有風味。
獨門配方高質菠蘿包 Pineapple Bakery
圖：店舖(IG)
呢間試業已經現人龍嘅烘焙店，店主Adele本身有製作中菜背景，亦對麵包有啲研究，佢嘅菠蘿包特別用Brioche麵包做底，發酵至少8小時，包身更香、更鬆軟，驟眼睇都會見到麵包比坊間嘅菠蘿包黃少少，全因用咗自家獨門秘方！至於菠蘿皮都用牛油製作，食起上嚟口感更脆～雞尾包就加多咗少少Fusion元素，注入斑蘭醬做內餡。而特色飲品「氮氣奶茶配迷你菠蘿包」亦係Adele嘅Idea，濃厚嘅茶底接近茶記味道，加埋氮氣令口感更滑，而且直接雪凍冇加冰，大熱天時都唔會愈飲愈淡！
6月更新
家庭式小磨坊 日日鮮手作店
簡單以即磨豆腐花同豆漿俘虜一班街坊客，價錢仲好親民！$10/碗嘅冷熱豆腐花可以揀糖水、 薑汁或桂花汁再落黃糖，味道選擇保持傳統同清新感覺。而黃豆/黑豆漿提供有糖同無糖款式，想要幾健康都得呀～另外仲自家製黑芝麻醬，啱晒芝麻fans。喺舖頭立食可以睇到廚房煮緊唔同汁，一個小小家庭式磨坊活靈活現啊～
醬油蝦濃湯拉麵新分店 幕多
圖：呢間經常現人龍嘅本地蝦湯拉麵店，喺尖沙咀起家，近日登陸港島喇！Menu簡單而味道不簡單，招牌醬油蝦濃湯拉麵上枱時，店員會即席倒入自家製蝦油，鮮味爆燈；湯汁濃稠度適中，無論配拉麵或刀削麵都夾。推介加配埋醬油海鮮，除咗鮑魚、蝦同埋蠔，仲有神秘嘅是日精選㗎。
新派粵菜館 悅見
糅合傳統同現代元素嘅新派粵菜館，由資深行政總廚劉永元師傅主理，以近三十年嘅豐富經驗打造精緻嘅點心同粵菜，例如巧手包製嘅燒賣四大天王、四彩琉璃水晶餃皮薄多餡料；甜品方面則有cute版醒獅造型嘅北海道雙獅奶凍，打卡一流。主菜必食招牌風沙脆皮雞，經過燙皮同埋風乾處理，再以高溫油炸至金黃酥脆，雞肉鮮嫩多汁，口感層次分明。另外梅窩熟醃沙蜆、紙包南乳香葉骨等特色菜都值得一試。
5月更新
濃厚米蘭風情 Primo Posto
又有新開嘅意大利餐廳喇～呢間主打米蘭風情，會無限供應波倫塔薯片，突顯當地人熱情好客之道。嚟到切試招牌米蘭炸小牛扒，帶骨嘅小牛肋排炸至表皮金黃酥脆，內裡依然juicy。另外亦有意大利各地區經典美食，包括搭配金巴利苦艾酒果嘅凍雞肝醬多士、需預訂嘅鴿肉醬炸米飯批等。酒單方面記得試Sbagliato！呢款雞尾酒係1972年時，因一名米蘭調酒師錯誤將Prosecco當成氈酒加入Negroni雞尾酒演變而成，飲完好似飲咗歷史落肚咁～
創意港式雞蛋仔 CHICKEN EGG BOY
圖：點樣令港式雞蛋仔再港式啲？上環呢間新開嘅專門店，就推出菠蘿包雞蛋仔做招牌！睇落好似一個個Mini版菠蘿包，要逐粒掃上牛油、鋪菠蘿皮，再放入焗爐焗，真係花唔少心機先做好一底。除咗甜款，鹹味都玩得幾盞鬼，有鹹牛肉、腸蛋包、餐蛋治味等等，仲可以三拼或四拼！雞蛋仔師傅仲學埋咖啡拉花，飲住啡食雞蛋仔可能你都係第一次～
足料越式法包外賣店 越包兄弟
圖：中環街市新開嘅越南法包外賣小店，法包一共5款口味，包括照燒雞、叉燒、燒肉、鴨胸同埋混合口味「乜都有」（鴨胸除外）！每條都係即叫即做，法包夠晒酥脆，用料實在，夾住滿滿嘅醃蘿蔔絲、青瓜、蔥、芫荽（可以走）同肉，再加上肝醬同秘製醬汁做底，鹹香惹味，愈食愈開胃～越南咖啡有凍有熱之餘，仲遷就返港人口味整得冇咁甜，幾易入口。
4月更新
特色濃清湯拉麵 味吉長龍
圖：濃而清嘅湯底，係呢間拉麵店嘅特色，用新鮮豚肉、豚骨同埋日本蔬菜秘製香料熬煮12小時而成，更標榜唔用急凍肉，保證鮮味！如果要有視覺衝擊又價格相宜，推介試$108嘅「巨龍」拉麵，特盛慢煮叉燒大大片圍住碗邊，打卡一流。湯底可以揀海鹽、醬油或特製味噌（龍蝦湯除外），香濃得嚟幾順喉。配料方面有香筍、炸牛蒡條等等，仲有小見嘅北海道鹽味豚足𠻹～
爆餡Bagel專門店 Halff
圖：超搶眼棗紅色外牆嘅Bagel小店，主打每日新鮮自家製Bagel，最平$18就有交易，仲有Bagel三文治套餐配埋湯或飲品可以揀，係健康快餐嘅好選擇～如果當正餐，推介鹹味款式，如三重芝士韓國部隊鍋口味、香辣惹味嘅韓式醬烤豬肉；另外仲有唔同口味嘅忌廉芝士醬，如開心果同黑松露等。Bagel煙韌得嚟帶少少鬆軟，食落好有口感，配杯咖啡或者特飲都唔錯啊。
慢煮熟成牛肉飯 牛丼新造
圖：連開兩店嘅牛丼品牌，明白「自選是王道」嘅道理，menu設計畀食客有好高自由度，由肉類、底料、醬汁、配菜到分量都係自由配搭㗎。牛肉包括慢煮熟成牛肉、頂級美國三角脊扒牛肉以及日本A5和牛；而牛以外，亦有熊本豚同日式炸雞，照顧唔同人口味。另一亮點係底料幾多選擇，其中蒜香醬油炒飯幾惹味、拉絲芝士番茄醬意粉係開胃之選，而日式炒雜菜/沙律就啱走澱粉質嘅朋友仔。
3月更新
戶外酒吧餐廳嘆薄餅 The Tai Pan Terrace
薄餅控注意～中環一間酒店喺庭院位置開設戶外酒吧餐廳，主打一系列拿坡里薄餅同意式料理。招牌薄餅用傳統番茄醬、水牛芝士同巴馬臣芝士等經典食材製作，即點即焗熱辣辣。另外juicy嘅戰斧牛扒、Gelato同自家製Tiramisu都係唔錯嘅選擇。餐廳喺指定日子安排「音樂之夜」，邊聽歌邊嘆美食夠晒chill呀！
主打活海鮮+和牛 海上鮮海鮮和牛涮涮鍋
圖：全新嘅涮涮鍋放題店，場內設有魚池提供由菲律賓直送嘅活海鮮，包括罕見嘅野生水魚、花龍、花蟹、象拔蚌等等，確保食材新鮮。肉類則主打北海道十勝和牛同千歲產米豚，肉質香甜嫩滑。而5款自家製湯底圍繞亞洲口味，如果想清潤啲，推介IG-able嘅招財貓造型清雞湯；另外泰式同芝士湯鮮茄鍋都好有特色。
芝士廚師發辦酒吧餐廳 ROUCOU Cheese Bar & Omakase
圖：Omakase試得多，芝士Omakase你又試過未呢？香港首間以芝士為題嘅酒吧餐廳糅合日法風格，廚師發辦區供應餐廳自家芝士地窖熟成嘅一系列特產手工芝士，會以烤、熔、焗、磨碎等方式呈上，讓你細味唔同質感嘅芝士，配埋加入芝士嘅雞尾酒，體驗更獨特啊。如果點芝士拼盤，記得同盛器打卡呀，係用香港颱風時倒塌嘅樹木製成，每塊木都刻有當時颱風嘅名字、木板製成日期，紀念樹木「重生」。
特色燒味店 發達叉燒
圖：燒味可以有咩變化？呢間燒味店就從食材同調味入手！選用草原放牧嘅西班牙栗子豬製作叉燒，皆因豬隻以五穀、向日葵、栗子、橡果餵飼，肉味較香甜，無論係偏瘦嘅梅肉叉燒，或半肥瘦五花腩叉燒都一樣咁滋味。另有皮脆香口嘅明爐燒鵝燒、茅台醬油雞、用台山豉油鹵水製作嘅雞鴨煲等等都係受歡迎之選。
2月更新
海景泰國菜×街頭風味 O'Thai Restaurant
圖：黃埔海濱有新餐廳！呢間靚景泰國菜館配合現代優雅風裝潢，戶外坐位又可以欣賞維港美景，啱晒想chill一chill嘅朋友仔。餐廳由入行逾30年嘅清邁大廚坐鎮，佢帶領過嘅餐廳更曾獲得必比登推介，有一定水準。餐牌有一系列以現代手法烹調嘅泰國街頭美食，好似蟹肉忌廉咖喱配香脆長棍法包、燒豬頸肉配辣羅望子醬、慢煮熟成和牛配紅/青咖喱等等，款款都好香口。
意粉×麻糬主題 Cobber Noodle and Mochi
圖：someoneasme、midnightfoodieee
去開觀塘覓食嘅朋友可能都知道有間西餐Cafe店長期有人龍，佢最近同區開咗姊妹店，讓大家有多一個機會試佢嘅出品～新舖同樣主打意粉西餐外，仲有麻糬主題甜品！好似朱古力雪糕麻糬、花生芝麻牛奶麻糬等，食完惹味嘅蔥蒜香蟹肉炒意粉、明太子蝦肉三文魚子飛魚子紫蘇意粉嘆返份，滿足感秒up。
百萬YouTuber滴妹主理 再睡5分鐘
圖：店舖（FB）、Jackson_T
由YouTuber滴妹主理嘅台灣人氣茶飲店，終於進駐香港！招牌棉被厚奶蓋系列係必試首選，3cm厚嘅奶蓋配紅茶/綠茶/四季金萱都好飲～SS級別item仲有黑糖珍珠好濃鮮奶味；另外香港限定嘅凍香檸，提供3款茶底畀你揀，包括日安紅、午茉莉同埋四季金萱，你又會想試邊款呢？
路邊攤主題打卡韓燒 YA:JANG
圖：店舖（IG）
真．Oppa主理～上環呢間韓燒店走韓式路邊攤風格，「鐵閘牆身」貼上懷舊功夫電影海報作裝飾，絕對係有feel嘅打卡店。餐牌仲用「韓元」（等於港元）表示，令人好似置身當地旅行咁relax。餐廳主攻120小時熟成豬肉，招牌燒肉由Oppa用鐵板炒好，上枱時再喺食客面前用火槍燒香表面，火嘅味道加埋烤泡菜、蒜頭等配料，風味十足！店內仲有個牌寫住「Body Building」，提大家吸收多啲強白質，所以五花肉鍋、泡菜湯、醬炒飯等所有菜式都會加入肉類，一定食到飽住走！
1月更新
正宗西班牙風味 Aire
全新嘅西班牙餐飲概念餐廳，由一西班牙餐廳廚藝總監同埋嚟自加泰羅尼亞嘅行政總廚主理，以巴斯克燒烤料理作招徠。餐廳選用西班牙、大西洋同埋地中海嘅頂級海鮮、肉類炮製特色料理，例如輕盈爽口嘅巴斯克吞拿魚配白鯷魚Gilda、烤卡斯蒂利亞拉曼恰乳飼羊肩肉等。另外忌廉牛肝菌米飯都好香口，皆因加入鵝肝醬、澳洲堅果同伊迪亞薩巴爾芝士提升風味。
日系休閒Cafe Sogo Cafe
圖：商場（FB）
唔知大家記唔記得SOGO開過cafe呢？今年選址喺啟德回歸，店內採用日式簡約木系風格，有大幅落地玻璃讓陽光透入，環境好chill。逾30款麵包同輕食包括煙燻牛肉配瑞士芝士貝果、自家製意式香草醬配風乾火腿吐司、提拉米蘇冬甩等，無論配季節性手沖精品咖啡、杏仁拿鐵、香茅薑茶等飲品都咁夾。
40年糖水舖回歸 葫蘆館
圖：CRYZZZ
經典薑汁撞奶一直係呢間老字號小店嘅招牌作，去年宣佈結業後唔少街坊大嘆可惜，好在後來有好心人頂手，今年原址重開！除咗繼續供應薑汁撞奶、冰花燉蛋、古法⽯磨合桃糊等傳統糖水外，亦加入新元素吸引年輕人～好似冷熱交融嘅雪糕牛角酥，提供椰子、芒果同榴槤味雪糕畀大家揀；另外仲有燒焦糖雪糕配爆珠西米椰果仙草小丸子、伯爵茶沙冰等等。
人氣脆皮燒春雞開分店 薔紅宅急便
圖：setoping、餐廳（IG）
灣仔一間以脆皮燒春雞打響名堂嘅茶餐廳，終於殺入九龍開分店喇！金牌脆皮燒雞用3斤重嘅三黃雞加上20多種配料醃至入味，再上皮燒製，皮香肉滑。另外仲有經典乾炒牛河、特色咖喱牛腩飯、豬扒炒蛋豬仔包、和風黯然銷魂叉燒飯、慢煮雞胸雜菜沙律等港西口味，選擇更加多元化。
文：Cathy
