去拜年要買禮盒是常識吧，今年唔少禮盒創新之餘亦加入本地元素，好似傳統特色包裝或者糅合懷舊食材，得體之餘又有一份熟悉感。加上一系列手工零食同當造水果，無論送畀親朋戚友定自私食都總有一款啱嘅。
搶眼立體大桔全盒 Sugarfina
新年大桔糖果全盒
受到唔少城中名人追捧嘅呢間糖果店以吉祥喜慶嘅柑桔同中式糕點盒為主題，推出新年大桔糖果全盒！紅色禮盒加上立體大桔望落已經好有喜慶氣氛，拉開裡面仲有八盒糖果，當中三款仲係新年限定全新口味：Lotus Flowers荔枝味軟糖、Tangerine Slices柑橘軟糖，同Dark Chocolate Orange Peels 黑朱古力糖漬橙皮。
古典中式糖果寶盒 Lady M
新春糖果寶盒
呢間精品蛋糕店今年就以古典中式櫃為靈感，設計出呢款雅緻嘅新春糖果寶盒。裡面有6款嚟自歐洲嘅糖果：酸桃軟糖、菠蘿椰子軟糖、糖脆杏仁、芝麻夾心朱古力、糖漬橙朱古力，同栗米脆朱古力，各有特色。寶盒頂層仲有塊鏡，食完糖可以將個盒變成首飾盒呀！
本土元素曲奇禮盒 Ah Ma Recipe
（左）阿嫲時光曲奇禮盒，（右）阿嫲鳥結酥禮盒
品牌由香港兩位80後男士開設，搵嚟曾擔任多間五星級酒店行政總廚嘅師傅擔任顧問。為咗重拾兒時回憶中嘅味道，曲奇都加入本土食材，好似豬油渣、陳皮，同豉油！另外阿嫲鳥結酥就用70層芝麻酥皮夾住鳥結糖，都係選用法國牛油、日本麵粉、法國鹽之花等優質食材香港烘焙而成。
全新朱古力脆球 GODIVA
（左）新年巧克力禮盒，（右）DOMES巧克力脆球系列
嚟緊係鼠年，禮盒當然唔少得鼠嘅元素啦。呢間朱古力品牌就以金鼠同桃花圖案設計新年禮盒，裡面仲有三款新年限量朱古力：黑朱古力醬黑朱古力、胡桃蓉牛奶朱古力，同檸檬慕絲白朱古力。人少啲嘅話可以考慮買新出嘅朱古力脆球，朱古力外殼包住威化餅、糅合內餡同原粒榛果，口感層次豐富。留意返DOMES巧克力脆球系列Market Place by Jason有售。
可愛招財貓禮盒 Twinkle Baker Décor
（左）財源比比來賀年禮盒，（右）蒸蒸日上賀年禮盒
可能係送畀貓癡最好嘅選擇，得意招財貓比比造型鐵盒裡面係比利時牛奶朱古力金幣同魚仔造型嘅牛油曲奇，寓意招財進寶同年年有餘！另一款禮盒就係「蒸蒸日上」嘅蒸籠包裝，裡面係似足蒸包嘅紅桑子馬卡龍同黑芝麻馬卡龍，過癮之餘仲好有心思㗎。
90%松露朱古力 Schoggi Meier
（左）90% 濃黑金箔松露朱古力，（右）亞洲特色口味雜錦曲奇
唔少朱古力控都鐘情黑朱古力，呢個喺香港自設廠房，由瑞士朱古力工匠大師Jurg Meier創立嘅朱古力品牌新年就特別推出90%濃黑金箔松露朱古力，90%軟心黑朱古力餡幼滑濃郁！另一盒亞洲特色口味雜錦曲奇就有咖喱魚蛋、柑橘、芝麻、櫻花蝦四款口味，創意十足。
手工新年朱古力禮盒 Sayvour
（左）「香江風情」農曆新年朱古力禮盒 （24片裝），（右）「賀年揮春」農曆新年朱古力禮盒（1片裝）
手工朱古力品牌新推出農暦新年朱古力片禮盒，「香江風情」印上香港著名景點同新春賀語。而「賀年揮春」就有升職加薪、豬籠入水、笑口常開等多款新春賀語選擇，加上紅色同金色嘅大氣禮盒，揀返盒啱心水嘅就可以用朱古力當祝福啦！
英國茶室首推福袋禮物籃 FORTNUM & MASON
（左）福袋禮物籃，（右）Cherrilossus罐裝餅乾
呢個英國著名品牌嚟到香港都入鄉隨俗，首次推出福袋禮物籃！福袋禮物籃包括香檳、朱古力、香茶、餅乾等，亦有無酒精選擇。另外亦可以三款節日甜食：香甜多汁嘅法式水果軟糖、花多日糖醃嘅糖漬柑橘，同採用Fortnum’s獨家秘方以歐洲酸櫻桃製作嘅Cherrilossus罐裝餅乾。
一口圓曲奇禮盒 望月
賀年精選禮盒
本地著名奶黃月餅品牌嚟到鼠年推出賀年精選禮盒，裡面有齊經典「一口圓曲奇」嘅伯爵茶、杏仁、朱古力三款口味，選用紐西蘭牛油、日本麵粉、新鮮雞蛋喺香港製作。禮盒當中仲有今年新出嘅柚子脆脆、紅桑子脆脆，同芝士椒麻曲奇！
日本傳統和菓子 city’super
（左）神樂坂菓寮米通禮盒系列，（右）日本士多啤梨禮盒
回味X中村藤吉蛋卷禮盒
日式和菓子係唔少人嘅最愛之一，呢間超級市場就有嚟自東京嘅神樂坂菓寮米通，保留傳統工藝同味道，口味同包裝又揉入創新元素，而且獨立包裝就啱晒開心Share啦。仲有日本士多啤梨禮盒，逐粒以人手精挑細選，有佐賀縣8年研發嘅新品種「草莓君」等唔同品種選擇。另外，喺香港經已全線結業嘅中村藤吉最後推出嘅香港限定蛋卷都有得買，一盒兩款口味包括抹茶同焙茶，全人手製作，茶味香濃。要食嘅話應該真係最後機會啦。
精選當造日本水果 Oisix
（左）岩手縣頂級冬戀Haruka蘋果，（右）金澤萬久 金箔蜂蜜蛋糕
而呢間網上日本超市同樣有唔少當造水果，當中推介岩手縣農家用25年以上時間研發嘅冬戀Haruka蘋果，切開見到裡面幾乎透明嘅就係糖心！而且超市精選嘅仲係當中糖度最高嘅頂級呀。買日本水果仲會免費附送和風傳統包裝布「風呂敷」，另有多款零食同健康食品禮盒。
自家果園超大呂宋芒 皇冠(呂宋芒)專門店
芒果新年禮籃
呢個品牌喺菲律賓呂宋島自設芒果園，每個香甜多汁嘅呂宋芒由當地農夫細心包裝再每日新鮮空運到港，咁就唔使擔心啲易爛呢個問題啦，而且呢個新年禮籃用嘅全部都係XXL（351g-400g）至XXXL（401g-450g）尺寸嘅呂宋芒，保證足秤！禮籃仲包馬卡龍一盒，紅、白酒各一支。
矜貴鮑魚蘿蔔糕禮盒 尚鮑
啖啖鮑魚日本大根蘿蔔糕賀年禮盒（配南非慢煮鮑魚一盒）
大時大節當然要食得矜貴啦！呢個鮑魚品牌由瑞士米芝蓮一星名廚Jean-Marc Soldati監製，推出嘅蘿蔔糕加入咗啖啖南非鮮鮑魚粒、臘味同蝦米，真材實料，食落有鮑魚嘅鮮味。而蘿蔔糕就採用日本大根，香煎定蒸煮都鬆軟同埋好香~
健康有機曲奇 The Cakery
純素曲奇及朱古力禮盒（左）、農曆新年主題有機翻糖曲奇禮盒（右）
呢間香港嘅烘焙店向來主打「健康天然」，賀年禮盒中採用嘅材料都係有機、無糖、無麩質同純素，推出純素曲奇及朱古力禮盒、有機翻糖曲奇禮盒，前者集合咗多款純素小食，包括棗蓉餅、杏仁曲奇、奶香烏龍曲奇等，都係採用純素牛油、有機蔗糖等健康食材。而後者就包括各式造型可愛嘅曲奇，亦都係採用有機嘅翻糖製成，務求要食得健康呀！
蠔皇極品鮑魚+XO醬 李錦記
蠔皇極品鮑魚+XO醬
新年又要富貴吉祥又要年年有餘，送呢個禮盒就啱晒，特別係畀經常出入廚房嘅親友就更加冧晒啦~ 一盒附有蠔皇極品鮑魚同XO醬，即開即食又得，配合其他食材製作家常小菜亦得，夠晒方便。鮑魚肉質鮮嫩，口感煙韌。
白蘭氏雞精
白蘭氏®CS-4蟲草雞精(左)、白蘭氏®原味雞精(右)
呢排咁多病菌，強身健體好重要，新年祝願都係最緊要健康！白蘭氏®原味雞精同以中醫複方CS-4蟲草為首配製的白蘭氏®CS-4蟲草雞精等，分別有助提升免疫力、體力，或可改善睡眠質素、強化呼吸系統等，呢份賀年禮就夠晒有心喇。最近仲有新春優惠添，買滿指定金額即送禮券或禮品。
鼠年威士忌禮盒 Johnnie Walker
鼠年珍藏版威士忌禮盒
為咗慶祝鼠年同品牌成立200週年，呢個歷史悠久嘅威士忌品牌今年就特別推出鼠年珍藏版威士忌。禮盒同樽身都有一隻燙金財鼠，象徵住財源滾滾、順心如意。打開禮盒淺藍色嘅酒樽係Johnnie Walker Blue Label ，由少數蘇格蘭最好嘅威士忌調配而成，有儲樽習慣嘅朋友仔新年又多樣收藏品啦。
台式芋頭酥禮盒 大頭芋烘焙
大頭芋烘焙新年禮盒(9件入)
新年送禮又唔一定要送年糕、蘿蔔糕嘅，呢間餐廳今年新年就推出台式芋頭酥禮盒啦，一盒九件，有麻薯餡、芋頭餡、蛋黃餡同話梅餡，各款件數可自己選擇。佢哋嘅芋頭酥跟足台灣傳統製法，再加入獨家研製配方，食落特別香脆。而且仲要係純天然添~
►即拎優惠券﹕【76折】【大頭芋烘焙新年禮盒(9件入)】$248
文：Cathy、Kiko
相、片：Tom Li、Cathy、相關機構
