【鼓勵健康飲食文化】四間少鹽少糖港式餐廳推介
7 Days Ago

一提起港式餐廳,都會諗起乾炒牛河、沙嗲牛麵、西多士等傳統美食,所以唔少人對港式餐廳嘅印象都係重口味及油膩,一啲注重健康嘅人士更會避之則吉。但其實香港本地餐廳都有供應少鹽少糖菜式,位置遍佈全港,今次搵咗四間參與咗少鹽少糖食店計劃嘅港式餐廳介紹畀大家,希望大家支持本地飲食文化之餘更食得健康啲。仲有呀,呢啲少鹽少糖菜式唔少都可以打破大家對本地餐廳食物嘅樣板式倒模印象!


華星冰室


牛油果雞蛋多士

今次華星冰室供應嘅三道少鹽少糖菜式,都係由藝人及營養學家歐倩怡負責設計,盡顯心思!首先要介紹係招牌菜牛油果雞蛋多士,牛油果係近年被譽為超級食物,屬較高纖生果,提供碳水化合物及纖維,亦含豐富單元不飽和脂肪酸及多元不飽和脂肪酸,有助降低血液內膽固醇含量,保護心血管。餐廳堅持選用澳洲或智利頂級牛油果烹製而成以保證其鮮味,配合埋同樣營養豐富嘅雞蛋以及採用天然調味料即檸檬汁及黑胡椒碎調味,不需添加額外嘅鹽和糖,一道簡單好味又有營養嘅菜式就誕生咗!

 

蘑菇炒蛋配英式方包

坊間好多麵包出售時已經加入唔同配料調味,所以餐廳連麵包都係自家製,鹽嘅份量比平時少一半。配合埋優質農場提供嘅新鮮蘑菇及雞蛋,蘑菇含有天然嘅谷氨酸鹽,不但增添鮮味,更可替食物提供鹹味,所以成道菜都無加鹽及糖調味,只係配合天然香料黑胡椒、乾燥羅勒葉及青蔥等味道已經好足夠。


生菜吞拿魚三文治      

創作少鹽少糖菜式,除咗調味外,於選擇食材方面已經要下功夫。好似呢味生菜吞拿魚三文治,餐廳特意選擇水浸吞拿魚取替常用嘅鹽水,因為鹽水會增加鈉嘅攝取量。加入新鮮生菜及黑胡椒碎,帶出吞拿魚本身嘅味道,就唔需要另加鹽或糖。


茶餐廳2.0


紅菜頭野菌意大利飯

好多時意大利飯都會加入奶油烹調,雖然味道會更濃郁,但相對上就無咁健康。餐廳就使用新鮮紅菜頭打汁,以鮮菜頭嘅鮮甜味取代砂糖調製醬汁,配合埋新鮮什菌,無論視覺定味覺都一樣咁滿足。


欖油蒜片鮮蝦意大利粉

一道好簡單嘅意粉菜式,食材包括鮮蝦、初榨橄欖油及蒜片,比平時落少咗四分之一嘅鹽,主要食返香蒜原始嘅味道及用初榨橄欖油帶出蝦嘅鮮味。


香草牛油烤焗比目魚

呢道香草牛油烤焗比目魚主要係想突出返食材本身嘅味道,採用鮮牛油配以香草烹調,提升比目魚嘅鮮味,比平時落少咗四分之一嘅鹽,而且經過烤焗嘅比目魚外脆內軟,魚肉嫩滑有肉汁。


謝謝儂


干貝賽螃蟹  

干貝賽螃蟹食材包括蛋白、干貝、甘荀角、蘑菇及毛豆,因為蛋白本身係一樣味道唔重嘅食物,所以好多時都會加好多調味料烹煮,餐廳今次就用清湯烹調方式取替油炒方式,蛋白吸收清湯味道,咁鹽糖份量就可減半,做到較低油又較低鈉,食落特別清新。 


田園獅子頭

獅子頭平時都係一款重口味菜式,餐廳一改以往濃油麻醬做法,將油、鹽及糖份量減半,務求做到健康田園風味,更可突出返獅子頭肉味,食多兩件都無問題!



清炒河蝦仁

食海鮮當然係食鮮味喇!清炒河蝦仁都一改以往烹調手法,改為用自家製嘅清雞湯去烹調,鹽少糖減半,健康啲又食得出河蝦鮮甜。         

    

翠華餐廳

未來肉碎煎蛋飯

採用純植物成份嘅Omnipork 新豬肉代替免治豬肉,比傳統豬肉更少鹽分,其獨有純素蛋白質配方主要來自豌豆、非基改大豆、冬菇及米。大廚將白菌粒、甘筍粒、西芹粒、香草等炒香後,加入新鮮番茄及茄茸煮成汁,再加上新豬肉燴煮成濃郁醬料,配上流心煎蛋及肉碎拌勻後撈飯食,一樣咁惹味同埋更加健康!


冰鎮秋葵或芥蘭(配芥辣豉油) 

秋葵或芥蘭只用滾水灼熟,之後浸冰水幾分鐘,瀝乾水後即可上碟,煮食過程中完全無用鹽糖等調味料。客人可根據喜好減少或避免蘸點醬油以減少鹽分吸收。



* 資料由客戶提供 


Keyword
少鹽少糖
港式
健康
客戶專訊
Restaurant Info
Show More
Show Less