【泰熱食咩好】火鍋雪糕X芒果糯米飯你bookmark咗呢5間曼谷甜品未？

又到旅行嘅季節（其實幾時唔係？），去邊度玩好？陽光與海灘是首選吧！我最鍾意就係同陽光玩遊戲，去返轉泰國都唔錯。不過去完啲島仔玩水，冇奶油唔順便喺曼谷行個圈shop個平先㗎？又，冇奶油淨係shopping唔食好西㗎嘛？我都知你哋（嘅朋友）最鍾意就係食甜品，去到邊都要食甜品乜乜乜，咁曼谷有咩甜品好食？用app搵下啦，喺地區度揀返「泰國>>>曼谷」就搵到啦~

時間關係，我幫你哋搵咗5間隔住個mon見到都好想食嘅甜品店出嚟喇。

芒果世界 Mango Tango

Photos by liu.youg & Sindy Leong
泰國，甜品，第一樣諗起嘅，毫無懸念，一定係芒果糯米飯！呢間餐廳，睇個名就知專食芒果，款款甜品都係用芒果整嘅，芒果糯米飯就梗有啦，仲有芒果冰呀、芒果雪葩呀、芒果布甸呀等等，當然唔少得新鮮芒果添啦，入到去就完完全全進入咗芒果世界一樣，好甜呀！

爆芝吐司　　After You

Photos by rapheepraew & Zaii~
呢度嘅招牌吐司，同台灣嗰隻有啲似，都係麵包磚加球雪糕咁。味就有好多款揀，其中有個芝士味嘅一定要講下，我都幾肯定芝士迷見到就會嗌咗出嚟，方形麵包磚上滿佈滿嘅係一條條嘅芝士呀，仲要有少少熱溶嘅feel，不得了！另外大熱天時梗係要食返杯冰嚟降下溫，大大杯雪花冰，一樣有好多味揀，士多啤梨醬裡頭仲有真士多啤梨添呀！

火鍋雪糕　　Tongue Fun Ice Cream

Photos by punch_mai & Tidztee
唔知有冇人同開飯仔一樣，去到外國就特別鍾意食雪糕（係，我認喺香港我都鍾意），因為其他地方總係會有啲完全未試過或者未諗過嘅味。就好似呢間雪糕店咁，用成個會噴煙咁嘅火鍋嚟上啲雪糕，仲要一裝就有成5球、8球咁，已經好鬼有gimmick，啲雪糕口味仲要勁新奇：泰式奶茶味、芥末味、荔枝燒酒味、红牛味、泰國啤酒呀咁，又真係會好想去潮聖下嘅。

邪惡cronut　　Vanilla Bakeshop

Photos by benz47 & pimkwd
將牛角包同冬甩溝埋一齊係點？嚟呢間試下佢哋嘅cronut咪知囉，好酥脆㗎，浸住一大碗吉士醬，面頭又擺多嚿大大雪糕球同一路流落嚟嘅焦糖醬，嗯，我都唔想用邪惡嚟形容佢㗎，不過……法官大人，我冇嘢補充喇。吖，講多句，呢度嘅海鹽焦糖frosty同士多啤梨frosty都好吸引。完。

脆炸雪糕　　IceDEA

Photos by NuuYok
你冇睇錯，我都冇呃你，呢幾件吉列豬扒的確係甜品嚟，仲要係雪糕嚟，有圖有真相，你睇埋呢幅相就知。

Photos by HowardSoo
呢間餐廳賣嘅同佢個名一樣，就係idea，最叻就係將啲雪糕整到唔似雪糕，唔止豬扒呀、牛扒、壽司，甚至阿婆副假牙咁嘅樣佢都整到呀！睇返件豬扒，隔籬啲菜係捲心餅嚟，啲汁呢就係朱古力醬，至於主角豬扒就係炸雪糕，真係脆㗎喂！

很想吃吧？但未有假未有機票未有旅行腳未有錢未出得發住？唔緊要，bookmark住先啦，這些機會最終都會屬於你嘅，應該。

文：Kar

隨時接收最新資訊
讚好OpenRice專頁！

【泰熱食咩好】火鍋雪糕X芒果糯米飯 你bookmark咗呢5間曼谷甜品未？

【泰熱食咩好】火鍋雪糕X芒果糯米飯你bookmark咗呢5間曼谷甜品未？