一年一度嘅中秋節又到喇！中秋除咗食月餅同賞月，最重要梗係同家人朋友坐埋一齊食返餐團圓飯。無論你想揀高級中菜廳嘅精緻宴席，抑或氣氛輕鬆嘅合家歡餐館，今次都幫大家精選咗多間好去處，讓大家無論咩口味都可以食得開心又盡興～
「流光百味」限定饗宴 采悅軒 
聯乘本地經典涼果品牌么鳳，帶嚟期間限定「流光百味」饗宴，將話梅、陳皮、冬薑等傳統涼果融入粵菜之中，重現香港獨有風味。當中推介話梅豬手，以話梅汁醃製數日，再加上晶瑩果凍粒點綴，酸甜開胃，果香中帶肉香；另一道柑黃龍蝦球伴蔥油炸餅，以蜜餞柑桔襯托龍蝦鮮味，旁邊嘅蔥油炸餅就係吸盡醬汁嘅最佳拍檔，滋味滿分。其他菜式亦充滿驚喜，例如鴛鴦橄欖燉響螺、雙薑炒安格斯牛肉以及洛神花山楂凍等，餐廳更特設「么鳳涼果小賣部」，畀食客將地道情懷帶返屋企～
「香港十味」清真嚐味菜單 唐述
呢個以經典港式風味為主題嘅「香港十味」清真嚐味菜單，聯同多個本地品牌同農莊，將十種地道風味同高級中菜藝術結合，逐一訴說香港飲食文化故事。其中最矚目嘅必數武夷岩茶煙燻脆皮田香雞，選用本地首個獲清真認證嘅田香雞，經過風乾、淋油、再以武夷岩茶煙燻，茶香四溢。另一款亮點頭抽生醃蝦併魚香籽，大廚巧妙運用原釀頭抽，配合葛仙米製作出魚子醬效果，鮮香中帶驚喜。其餘菜式同樣精彩，例如用維他檸檬茶製成嘅檸檬茶雪葩，或者以雀巢煉奶入饌嘅港式煉奶雪燕桂圓奶凍，都將香港味道同品牌故事演繹得淋漓盡致。
地道中菜館食即烤三黃薯片雞 棠棠居海鮮菜館
原圖：anssicaaa
深水埗人氣中菜館，一直憑住精緻點心同鑊氣小炒深受街坊支持，被譽為區內低調卻極具匠心嘅隱世小店。招牌名物即烤三黃薯片雞絕對係必試之選，三黃雞以麥芽糖、白醋反覆上皮水，之後吊起風乾一晚，最後用高溫烤焗至外皮香脆。雞肉保持嫩滑多汁，雞皮薄脆好似薯片咁，一撕就爆汁，難怪成為每枱必點之選，每月更熱賣超過600隻，留意每日限晚市供應20隻，記得要提早預訂！除咗薯片雞，其他小菜都值得一試，如青檸汁黑鳳爪、黃金芝士長腳蟹釜飯、黑松露蝦多士以及意大利黑醋牛肋排等，食落特別有驚喜。
誠意手工粵菜 厚德飯店 
餐廳以傳統粵菜為根基，再糅合現代視角，既有鮑參翅肚、仙鶴神針、鷓鴣粥等幾近失傳嘅古法佳餚，亦有精雕細琢嘅巧手小菜同新派創作，務求以紮實手藝帶畀饕客一場難忘嘅粵菜盛宴。兩款期間限定嘗味菜單精選多款招牌名菜，必試嘅有雞子戈渣，外脆內嫩，入口爆出濃郁高湯鮮味；蟹肉蛋白琵琶燕以燕窩、蟹肉同蛋白做成琵琶造型，口感細膩淡雅；蜜餞叉燒皇用上黑毛豬稀有部位貴妃肉，燒至外層微焦、內裡嫩滑，蜜香撲鼻。至於松露片皮雞則以手撕版炸子雞配黑松露醬，皮脆肉嫩，菌香濃郁，令人回味。最後以宮廷豌豆黃同陳皮紅豆沙等甜品收結，完整展現粵菜嘅細膩工藝。
川粵融合創新理念 成都宴
以川粵融合嘅創新理念聞名，今次將成都川菜嘅熱情麻辣同廣東菜嘅細膩鮮味巧妙結合，為食客帶嚟耳目一新嘅中餐體驗。必試招牌包括黃燜佛跳牆，集齊鮑魚、海參、魚翅同燕窩四大珍饈，更加入珍稀白鴿蛋同煮，湯底以黃燜技法配合成都香料，香氣濃郁，配四川泡菜水調和，酸辣開胃。另一道黃貢椒蒸鮮黃魚以自家發酵黃貢椒醬同新鮮黃魚烹調，入口先酸後辣，最後回甘鮮美，完美展現川菜精髓。燒椒涼拌蟶子王則辛辣張揚，一柔一烈，各有特色；仲有以大紅袍花椒煙燻嘅乳鴿都值得一試。
文：Yanica
編：Cathy
