Alice Pizza

營業中

休息中

之前睇廣告話呢間羅馬開過黎嘅連鎖鋪已經想試。今日屋企人下午經過買咗，夜返去焗爐焗一陣食。每次聲稱正宗嘅pizza 我都會叫margherita，因為好食嘅根本唔洗多料都會好好食！只有食xxxxx hut 嗰啲先要揀多料！估你唔到真係好好食，真係似響意大利食嘅pizza！個底係半脆半淋但唔韌唔界口。蕃茄新鮮，蕃茄醬唔會好似坊間好多店咁做得太甜，芝士亦好適量，真係食pizza, 唔係食芝士！之後食咗CEO 推介嘅Mortadella，又係好正，火腿切得勁薄但有好多塊，加埋個軟芝士同開心果小粒真係絕配。好啱啲唔鐘意食好咸嘢嘅人食。之後食咗件Italiana，都係好味。蕃茄同塊羅勒葉都好新鮮。個水牛芝士淋得黎都有質感。最後食嘅反而冇咩特別。唔記得叫咩名但有深色嘅parma ham 同黃椒響上面。個火腿對我黎講太咸，尤其已經食咗之前嗰幾件正嘢...屋企人都好滿意，但佢話覺得切pizza 嘅員工如果戴返個口罩或半罩會好啲，因為始終佢要對住啲pizza不停講嘢，無罩覺得唔太衛生。總結：如果水準能維持，會變飯堂。