由於平時比較忙，近年很少寫食評，但由於被標注為已訂位無出席的情況下，又一次要抽時間證明一下，從來訂位必定準時到的原則下發表一下🤭 先解釋一下，一坐低被要求取消訂位，因為我早咗到，但當時已給職員協助，很可惜職員也沒能將其取消，但真係有啲唔明點解要我取消訂位🤔 由於突然想打邊爐即日訂位得返晚上21:00，行完街早咗少少到，選擇了美國特級安格斯牛吃過飽餐，款款牛都唔錯，沙白大大隻新鮮飽滿好鮮甜，另外八爪魚滑都係好值得一試，服務態度好好，比之前荃灣好得多。

AUG 22, 2009 (SAT) DINNER $1140

入到去發現有個閣樓，服務員隨即帶我們上了上層，樓底好高好開揚眼界好廣濶，感覺好舒服！位置還不錯，剛好望正下層蠔吧檯，美中不足係要好小心，如果唔係好容易趺D嘢落去擲親人！HEHE！

首先服務員貼心地介紹以下呢個優惠俾我哋，都好啱食，於是ORDER一個試一試！

中銀信用咭 5 折套餐優惠：(原價$1,460) 優惠價 $730 另收加一服務費

首先另叫咗兩杯特飲，係Buy 1 Get 1 Free嘅！$58
Bora Bora ~ 色彩繽紛，仲有一粒櫻桃襯托下更鮮豔奪目，飲落好似沙冰咁，冰涼解渴，實在太吸引，一陣就俾我飲哂！哈！

頭盤係迷你海鮮拼盤：
生蠔4隻、蘇格蘭煙三文魚 & 翡翠螺2隻
分別有澳洲蠔2隻夠鮮味，法國蠔2隻就較海水味重啱哂我！
煙三文魚鹹香味剛好！
望落蠔吧位置見到煙三文魚係師傅原舊即切片的，唔係一早切定嘅！
翡翠螺味鮮甜！
可能D海鮮太鮮美，有隻螞蟻孫仔喺個醬碟度行吓行吓，虎視眈眈預備同我搶食，好可惜俾我發現咗，唔好意思 la ！你係唔可以留底架！
希望佢哋呢一方面以後注意一下！

生蠔：
D蠔太美味唔係好夠喉，於是乎order 多每人 2 隻食吓先！
由服務員嘅專業推介，幫我哋選咗另一種澳洲生蠔 & 美國生蠔
Danial Bay 係澳洲生蠔 $48/per one ~ 雖然澳洲蠔比較清淡，但呢種明顯比之前嗰種蠔味濃少少！
Barron Point係美國生蠔 $62/per one ~ 肉質肥厚，味亦較濃郁，好Creamy口感唔錯！

特式法飽 ~ 有3款，仲熱嘅，外脆內軟，有一個仲有幾片車厘茄做餡，甜甜哋我最鍾意食呢款！

湯：
牛油梨周打魚湯配意式生帶子 ~ 新鮮生帶子鮮甜美味！湯好滑，味濃香！！

主菜：
香煎法國海鱸魚配鮮蠔白酒汁 ~ 首先我試咗伴碟嘅小黃瓜，迷你黃瓜仔係原條上，Cute爆！熱辣辣，極清甜，超超超好味！車厘茄同樣極新鮮清甜！講返個主角海鱸魚，煎得好靚，魚身實肉得嚟食落肉質還是滑，真的有點海水嘅咸味添！配搭個鮮蠔混白酒做嘅汁，出奇地夾，能帶出魚肉嘅鮮！挺不錯！

焗巴黎牛柳配砵酒汁 ~ 面層黃色嗰D其實係醬汁，醬汁被焗到微燶頗有趣！牛柳被醬汁遮蓋後，醬汁嘅味道完全浸透在牛柳裡，焗出來又是別有一番風味！肉還幾嫩喎！

甜品：
唔知點解個甜品由意大利芝士餅變咗朱古力慕絲？
朱古力慕絲配新鮮草莓 & 藍莓
朱古力味香淳，慕絲頗滑！草莓 & 藍莓幾鮮甜！

餐飲：
熱咖啡 ~ 幾香濃！
熱檸水 ~ 檸檬唔太酸，唔錯！

一邊食一邊睇住開蠔師傅唔停手咁撬開啲生蠔，手勢熟練，仲一類類分開那類別嘅生蠔進食時先後次序逐一擺放好，非常專業！
負責做沙律、切煙三文魚 & 海鮮拼盤嘅師傅一樣忙到透不過氣來，也是一個夠哂專業嘅師傅，功架了得，擺設精緻！

服務員親切有禮，夠專業！仲幫我哋影咗張相留念添！

套餐連特飲加一後，扣回套餐半價優惠 $939.80
另叫生蠔加一後，生蠔原價有8折優惠 $198

SEP 9,2009 (WED) TEA

用一張餅咭換咗5件精美西餅『$48』

本來ORDER的是『宇治綠茶』，不過回到家才發覺拎錯俾我了！
卻變了一件『鮮果戀人』 $8，雖然有點失望，但OK喇！只是味道唔同咗，蛋糕依然是好鬆軟美味，還多了兩件水果添，呀Q精神了吧！
悠情慕加 $8 ~ 真的好濃烈嘅Mohca味道，平凡中帶點不平凡！
意大利咖啡芝士撻 $10 ~ 面頭舖滿咖啡碎粉，令吃起來有點兒不太方面，散佈滿檯都是碎粉，HEHE！內裡嘅芝士撻十分香滑，蠻飽肚喔！
鮮果撻 $10 ~ 滿滿的水果，顏色漂亮，裡面嘅吉士好香好味道！
芒果雪果拿破崙 $12 ~ 一向是拿破崙蛋糕嘅支持者的我，又點少得了這件芒果雪果拿破崙呢！瘦瘦長長的它足有兩件半西餅嘅長度呀！最吸引人嘅地方係有層次的外層，非常鬆脆！再配上帶甜的吉士&微酸的芒果肉非常配合！哇好正呀！

服務員態度親切，不過就唔係太細心，隨了回家先發覺錯換了件『鮮果戀人』外，其實先前都俾了兩件『鮮果撻』給我，但當時及早發現，即時換回我最愛的拿破崙！
回想起總是拎錯『鮮果味的蛋糕』，是不是別有用心呢？

因為係用餅咭換的，所以不用付錢！

AUG 17,2009 (MON) TEA

地神冰 $28
朱古力冰底、朱古力醬、棉花糖 & 香蕉
濃郁嘅朱古力香味，夠冰凍，消暑之選！

宇治金時 $25
綠茶冰底、紅豆、芒果QQ菓 & 煉奶
綠茶味濃，可能因為煉奶嘅關係帶甜，大大杯，真係食一杯都夠飽呀！

天時暑熱真係食完仲想嚟多杯呀！
不過一杯都夠飽飽 la ！

JUL 25, 2009 (LUNCH)

今日為了獎勵啲小朋友考試考得好，大家一齊嚟食壽司，成年咁辛苦讀書，終於得到好成果，一於食餐勁！

先order一D時間限定嘅 & 最新推介新品先：
赤海蝦、特大帆立貝、池魚，全是1碟1件 ~ 每款ORDER (3碟)
哇哇哇！真係好新鮮好新鮮呀！嗰種鮮甜真係唔知點形容先好，一個字講哂，鮮！
他他牛也是1碟1件 ~ ORDER (2碟) 色好靚，妹妹話好肥美！
黑糖腐皮 1 碟 ~ 比腐皮更甜，但亦不會太甜，感覺蠻不錯！

藍鰭中吞拿魚腩 1 碟1件 ~ ORDER (3碟) ~ 本來想試極上嗰種，不過只賣剩中的，於是試下，不過顏色同影相差好遠，D色有少少瘀瘀哋，D相係少少帶粉紅的，食落好漏，可能係魚油嘅關係！
墨魚柚子漬 1 碟2件 ~ 連小朋友都話，好彈牙好新鮮，好滿足呀！
湯葉 1 碟 ~ 好似甜腐竹，食落好清新！

手卷之選：
軟殼蟹手卷 ~ 我最愛嘅軟殼蟹手卷又點少得呢！即炸嘅軟殼蟹新鮮熱辣，足有半隻，好有滿足感！

軍艦之選：
海膽 ~ 姐姐嘅最愛，真係見到佢個滿足樣就好笑，好新鮮好滑呀！

卷物之選：
炸蝦卷 ~ (3碟) 點解會叫3碟，因為頭嗰碟爭崩頭，有人無得食，拎多碟唔知點解唔熱唔好食，終於叫多碟，大家都有得食，好熱嗰時真係好好食！
加州小卷 ~ 弟弟嘅最愛，有齊佢鍾意食嘅蟹籽蟹柳 & 甜蛋！
牛油果軟殼蟹卷 ~ 同是弟弟的必選，蟹籽好多，軟殼蟹同手卷一樣咁好味！

壽司之選：
墨魚、帶子、北寄貝、魷魚各1碟 ~ 全都新鮮，鮮甜味出哂嚟！
蟹柳、蟹籽、甜蛋、鰻魚各1碟 ~ 普普通通，不過都好味道！

刺身之選：
三文魚刺身 ~ 好肥美！
油金魚刺身 ~ 姐姐妹妹食得好開心，睇都知好新鮮！

小食之選：
枝豆 ~ 我好鍾意食枝豆，脹卜卜大大粒清清哋！好甜好好味！
日式炖蛋 ~ 好滑係我嘅必食之選！
蟹籽沙律 ~ 妹妹飽到唔郁得，都要食，食D青瓜都好，於是叫俾佢，好多的蟹籽，一些蟹柳，青瓜好爽脆！
芝麻八爪魚 ~ 都幾多幾大隻，不過諗起D腦漿唔係好敢食，HEHE！
中華沙律 ~ 有少少芝麻，海藻好爽！

共39碟 小朋友嘅力量真係極利害，最緊要係佢哋食得開心！
一行五人都超滿足，真係要多謝哂家姐賜給我哋呢班大食家族呀！

本來要 $568 , 因為有8 折 $511.20

又一城中Amaroni’s Little Italy 係我最鐘意去的餐廳，侍應殷勤的服務，食物質素能保持一貫水準。
尤其餐前的麵包新鮮軟熟& 脆餅鬆脆可口，加埋橄欖油& 黑醋一起點食，非常好味，超正！
今日因為飽飽地，所以我同CK只order一個Caesar Salad & 蕃茄醬肉丸意粉。
Caesar Salad 的菜非常新鮮夠凍，dressing味道剛剛好，再配上black pepper，好清新！
大大盆的蕃茄醬肉丸意粉肉丸大大粒，內裡滲出濃濃的肉汁好好味，配上新鮮蕃茄做的醬汁，淋在彈牙的意粉上，絕配！不過份量太大兩個人都食唔哂！

每次來到這裡，每個侍應都帶著笑容& 殷勤的服務態度，真係值得稱讚！
新鮮美味的食物更每次都帶來驚喜！

SEP 28, 2009 (MON) LUNCH
今日同樣叫咗我鍾意飲嘅龍井茶！
蘿蔔絲酥餅 ~ 外型跟一般的有所不同，十分討好，好特別嘅蘿蔔絲酥餅，熱辣辣，外皮脆卜卜，蘿蔔絲切得比較粗條，蘿蔔味濃郁，呢個係我覺得最好味嘅蘿蔔絲酥餅呀！
北菰雞飽仔 ~ 有人覺得好肚餓，要叫籠包先夠飽喎！哈哈！食包類當然係叫我最愛吃嘅雞飽仔喇，熱辣辣食最正！
馬拉糕 ~ 真係好耐無食過馬拉糕，仲係最舊式嗰種，真係好有懷舊FEEL呀！
羅漢上素腸 ~ 係即製腸粉，皮薄夠滑，材料清淡味道清新，不錯的選擇！
班腩&黃沙豬膶粥 ~ 係生滾粥，所以製作需時，配料繁多，而我哋各自選取一種自己最鍾意食的材料作配搭，一大煲嘅粥材料好豐富，魚腩頗多，味鮮甜！不過有少少魚鱗&魚骨，食時要小心！豬膶自覺唔太似係黃沙豬膶，仲覺得過咗火，唔係幾啱食！粥底尚算OK！
籠餃個名唔記得咗 ~ 餃皮好薄，真係好晶瑩剔透，外型似足鮮蝦粉果，餡料好豐滿，一啖成隻放入口，好有滿足感！
呢度真係冷氣十足，夠哂涼快，有少少凍凍地添！食完就嗱嗱聲走人lu！

SEP 29, 2009 (TUE) LUNCH

天氣還是不太好，時晴、時陰、時下雨，去食返餐嘆吓享受吓先吧！
嚟到都唔知食咩好，服務生介紹呢度有LUNCH BUFFET剛開始，於是乎行過嚟睇吓，個VIEW都唔錯，環境幽美，就試試喇！

首先飲碗湯食個飽先，選了其中一款唔記得係咩，好似係蕃茄湯，味香濃非常好味！個飽就硬咗D，都係留返個肚食其他嘢好了！

去到沙律吧，樣樣都拎嚟試了少少，蔬菜新鮮爽脆，件南瓜粒好腍好甜，但已撈好嘅沙律就略遜，除Strawberry外全都是罐頭，令味道變得好甜，唔太欣賞！
反而最欣賞嘅係D有濃厚泡菜味的大荳芽菜，真係好入味，食咗好開胃，啱哂！

冷盤種類繁多，隨意選擇一些試一試：青口、日式櫻花蝦，還有一款好似叫香芒吞拿魚卷，就講講呢款先吧！一啖放哂入口有D困難，但睇個樣覺得好似壽司咁食應該係最滋味，於是食得一口滿滿的，口感豐富，味道豐厚！
青口其實就無咩味，只係凍凍的！
樣子可愛得Q爆的櫻花蝦，蝦身晶瑩剔透，從蝦殼望入去，像似透明似的，味道甜甜地好得意，去到真係要試試呀！

行去日式魚生、壽司櫃台，發覺選擇唔多，魚生部份只有三文魚&吞拿魚，壽司方面有兩款卷物，兩款卷物有著Q版的外貌，飯味調教出色！魚生唔係屬於肥美的品種，但都唔錯還是想添食！

跟著當然要試吓食件燒牛肉喇，還有燒豬仔肉，原來切開好似一件燒腩仔咁！流哂油，仲係五層嘅燒腩肉嚟，非常正！因為仲有好多嘢未試，所以要一件薄片燒牛肉試吓味算了，睇個樣就唔係太吸引，但食落去就真係好好食，肉質嫩腍味鮮！又睇佢唔出喎！唔係仲有咁多嘢未試，真係想再嚟一件厚切呀唔該！HEHE！

熱薰中間有個小小的小食吧！有迷你春卷、咖喱角、薯粒、炸雲吞&PIZZA，跟一般買返嚟的差唔多，脆脆的、熱熱的，OK喇！PIZZA薄薄，餡料多，脆卜卜，蠻不錯！

食BUFFET嚟講，熱薰方面一向唔係我嘅選擇，隨隨便便睇咗一轉，有炒飯、干燒伊麵、蘑菇炒小唐菜、焗龍脷魚柳、瑞士豬肉、荷蘭豆炒蝦仁、燒賣、南瓜粿等等… …D菜名唔係太記得la
熱薰之中魚係我必選項目，雖然無好大條嘅蒸魚，略有失望，但件焗龍脷柳都唔錯，魚肉幾滑幾香！另外俾個名吸引住所以拎嚟試嘅係瑞士豬肉，切得好薄的豬肉片，外貌似一片午餐肉，食落唔係太特別，真係有D午餐肉FEEL呀！
樣貌標緻的南瓜粿，樣子仿真的南瓜一樣，手功細膩，極為趣緻，味道帶少少甜，內裡煙煙靱靱！我覺得做擺設都不錯呢！

雖然經已飽飽地，但都試吓碗生滾粥喇！兩個人分都應該可以應付得來的，哈哈！本來大人要揀皮蛋，但係我選了魚片配撘好似怪怪地，最終選了魚片&肉絲，不過ODRER的時候，有個小插曲，因為個WAITER細細聲同我講，妳要食粥等我入去拎D粥底出嚟先煲得，等一陣幫妳拎入去，真係好攪笑！不過整體碗粥普普通通，早知唔好麻煩人喇！唔該哂！

一入嚟的時候已經俾WAFFLE吸引住，終於係時候食佢la！唔該要兩件，WAITER靜靜地講咗一句：「我入去拎蛋漿先」。於是佢通知負責的同事，嗱嗱聲拎D蛋漿跑到出來招呼，為咗我呢個胃食女王，整完仲要洗一餐，真真超級唔好意思！勞煩哂la！見到要等就周圍影吓相先，師傅整好仲拎住行嚟叫我自己揀D醬落去先食喇！真係好NICE！分別加咗少少糖漿、花生醬&練奶，熱辣辣甜甜脆脆，好享受呀！

已經好FULL，但點寫得唔食最愛嘅甜品呢！甜品吧安排在正中央，在繁多的選擇中，選了一杯朱古力慕思，好滑不過因為係朱古力，覺得溜溜的。
2款迷你CAKE：綠茶&檸檬各一件，綠茶味濃且香滑，檸檬味同樣好香，且底層蛋糕好鬆軟！
2款迷你TART：藍莓&紅桑子各一件，兩款水果新鮮味鮮甜，但撻底唔脆略遜！

雪糕方面：係雀巢迷你杯裝雪糕，多款味道任均選擇，但好FULL la食唔落lu！
新鮮水果有3款：菠蘿、哈蜜瓜 & 西瓜，都係嗰句la食唔落lu！

最後去了自製飲料吧，大人自製一杯熱檸茶，而小妹我就要了一杯橙汁，雖然唔係鮮渣的，但都好多果肉，唔係太甜，幾好味！

服務就唔駛多講喇！好NICE，真係一流！辛苦哂！

可能今天天氣唔太好嘅關係，食咗成個下午，除了我倆之外，就只有兩個內地遊客光顧，他們怱忙食了半小時左右就離開了！
所以我哋同包場食係無分別 la，hehe！環境舒適，服務一流！真係覺得好幸福呀！好似發緊夢一樣！原來午餐都可以咁浪漫！多謝哂大人賜給我一個浪漫的午餐，但係大人係咪有D嘢做少咗呢？如果唔係真係覺得自己幸福滿瀉，哈哈！

HSBC CR Card ~ 折扣優惠，加一後 $285.60 FOR 2位，食咗一個中午，有包場嘅服務，環境清幽，食物質素OK！真係去邊度都食唔到！

SEP 30, 2009 (TUE) LUNCH
等咗3日終於等到今日好天唔落雨，嚟迪士尼Halloween嘅黑色世界睇吓先，嚟到諗諗吓都係食咗嘢先，唔係一陣嚇到食唔落就死喇！
樂園裡面全部食肆都試過哂，間間都無咩太特別吸引，所以大人都係選擇最OK嘅呢間飲茶吧！
開咗一壺鐵觀音 ~ 因為無龍井又無人參烏龍茶，於是揀咗鐵觀音，味道唔錯！
鼎湖素粉果 ~ 皮薄透徹，飽滿嘅餡料顏色鮮艷，咬落爽脆，好清淡嘅口味，好好味！
北菇雞包仔 ~ 至愛又飽肚嘅雞包仔又點少得呢！熱呼呼最好味，咬入雞汁流出來真得好香！
蘿蔔絲酥餅 ~ 必叫嘅蘿蔔絲酥餅，真係百食不厭呀！
四寶雞扎 ~ 我就最鍾意食層腐皮，其餘就大人食好了，佢肚餓呀！
蟹拑 ~ 係久違了的蟹拑，記得以前細個係去飲嘅菜單，估唔到而家飲茶都可以食到，只係點心嚟！一口咬入去真係好彈牙，好有嚼口，無雪味仲幾鮮味，雖然好熱氣，不過真係忍唔住食咗兩件，好好味呀！
鳳爪排骨煲仔飯 ~ 唔好以為我哋好大食，其實好細好細煲的，係迷你煲仔嚟！不過排骨好多，啱哂我呢個排骨王，鳳爪就留返俾大人喇佢最愛吃！
椰汁紅荳糕 ~ 雖然已經超飽，但好耐無食紅荳椰汁糕，而且見到個米奇做型真係忍唔住叫一碟，外型夠哂靚就不在話下喇！椰汁味好香好滑紅荳味濃就最吸引，食咗兩件，飽到幾乎唔郁得！
全年通行證 & HSBC CR CARD都有八折! 8折後$217
唔講咁多喇！俾錢走人去玩喇！拜拜！

SEP 27,2009 (SUN) DINNER
因為姐姐中秋前後突然要出TRIP，所以唯有提早去食中秋飯，皆因太突然無訂位，所以一早我哋就出發去搵位食飯lu！差唔多6點鐘，可能太早仲未有客人，冷氣都未開放，於是俾我搵到個好位置！
由於有大半人都唔係好肚餓，有D仲食咗下午茶添，加上有幾位仲要去下場，所以由肚餓嘅姐姐發板叫餸喇！9個人叫咗一個套餐 + 一條魚（共5餸1湯）諗住唔夠先再ODRER 啦！
套餐B $588「包括：4個餸、1個翅」
紅燒雞絲生翅『例牌』~ 一人一碗剛剛好，味道一般般，OK咁喇！
芝士焗蝦伊底『例牌』~ 啲伊麵好大碟，芝士好多好杰味好濃，中間夾著嘅主角【蝦】足有成大半斤，蝦味鮮，的確唔錯，不過如果唔駛自己剥殼就仲正！
西蘭花花枝帶子 ~ 西蘭花新鮮脆綠，魷魚&帶子都好多，花枝片夠薄，帶子雖然係雪藏的，但都有帶子嘅鮮甜味，呢個餸唔錯！
沙律海鮮卷『6件』~ 真係名副其實有一盤沙律架，仲係好多新鮮水果做的，水果好新鮮好凍好好味！海鮮卷炸得唔多油，比一般大件好多，裡面啲料相當豐富，加上少少甜甜的沙律醬，小朋友就最鍾意，食到流口水，笑死我！
大戶燒鵝皇『半隻』~ 媽媽極喜愛食燒鵝，所以呢個餐真係啱哂佢！雖然得半隻，但相當相當大碟，可能隻鵝真係好大好大隻呀！但係D肉係好嫩，皮仲好脆添！（以前亞視有個飲食節目主持人黃麗梅嘅口頭禪）哇！隻鵝真係好有鵝味呀！哈哈哈！雖然好好笑，但的確係真的喔！極入味，超好食！啲汁仲俾人用嚟撈哂飯呀！個鵝腦仲俾人仔細細嘅姨生女爭住食添，其實唔駛爭喇！好似好恐怖咁！因為根本無人食，嘻嘻！咁細個就食腦呀！！！勁勁勁！！！
另加：
清蒸大海青班 ~ 條魚幾大條，火喉蒸得剛好，雖然係養魚，不過大部份都係la，但魚肉味鮮甜、肉嫩，算唔錯！
3個砵仔飯 ~ 細細砵幾Q！不過都唔少飯架！
紅豆沙糖水『送的』~ 因為我好飽所以無食，不過個樣好得，仲好香，最食得嘅小朋友食得好快好開心，應該唔錯！
因為碟伊麵&燒鵝都好大碟，加上太早食飯，個個都唔係好肚餓，所以都夠飽唔駛再odrer lu！
服務真係好好，上上下下個個都好有禮貌，真係好nice！
總括嚟講大家都好滿意，食得好開心，原來仲有D晚飯全包宴$1180好抵食，8個餸 + 啤酒汽水 + 甜品&生果 及茶芥&加上服務費超抵！決定下次嚟試下，不過唔知下次仲有無呢，HEHE！
因為結帳時去咗廁所，所以今餐唔知幾多銀，不過係姐夫請，所以我唔係借尿遁呀HEHE！