甜記餃子 (已搬遷) 新店位置

番工食車仔麵食到悶，今日轉下食餃子先。有湯餃同煎餃揀，湯餃餃子$38/8隻，$42/10隻，可選單拼或雙拼，煎餃就貴兩蚊。餃子款式多，共有八款口味選擇。今次試椰菜冬菇雲耳豬肉餃，同香芹芫茜豬肉餃。除左鮮雞湯外，仲有我最鍾意嘅番茄薯仔魚湯添。下晝一點幾叫外賣，等左6-7分鐘就有了。啲餃子勁大隻，每隻都好足料，包得好實淨，好包滿。唔似其他餃子店得好少料，一咬落去會散晒。椰菜雲耳同豬肉的比例啱啱好，不過略嫌少左啲冬菇味，如果多啲就更香喇。但雲耳好爽口，令豬肉餃唔會太飽滯。芫茜控一定要揀香芹芫茜餃，個芫茜味好勁，越食越香。個湯有好多粒薯仔，如果有多啲番茄就真係perfect 喇。初時以為十隻餃會唔夠飽，但原來都幾飽，因為啲餃大大隻。下次要試晒其他款同試下麵先。