小男孩 (已結業)

生日朋友同我黎呢度食飯, 一入到間餐廳覺得氣氛都幾好 我地叫左二人套餐 ($388), 有4個頭盤, 4個主菜, 2個湯, 2個甜品同2杯餐飲, 都幾豐富架.頭盤我最鍾意個鵝肝, 入口即溶, 正 , 個焗田螺都幾好味, 我好鍾意d薯溶,好重牛油味, 個焗生蠔就麻麻地, 好細隻.湯我就叫左什菌湯, 朋友就叫左龍蝦湯, 我覺得個什菌湯都唔係話好好味姐, 之後試左佢個龍蝦湯覺得好味過個什菌湯, 又唔係太咸姐...主菜我就最欣賞個炭燒肉眼扒, 好juicy又好夠燒烤味. 仲有個帶子天使麵都好好味, 好鍾意個汁. 反而覺得個墨魚汁意大利飯麻麻地, 可能因為我地食左其他主菜最後先食佢, 所以d飯凍哂唔好味. 甜品我地叫左心太軟同朱古力批, 個心太軟焗得幾好, 而個朱古力批就冇咩特別.呢度d服務都幾好, 成日都過黎幫我地加水, 不過我唔係咁鍾意d主菜一次過黎哂, 攪到我地食唔切, d野食就凍哂.後記: 我咁大個女都未識過同我同月同日生既人, 今晚比我見到有人又係6月17日生日, 本來想過去問問, 不過我都係唔夠膽, 哈哈...