蘭太太船麵 (已結業)

每日都要諗去邊開餐，今日都唔例外，朋友上網搵到呢間泰式粉麵店，雖然新開張，又冇乜食評，冇餐牌，但懶得再搵其他地方，就膽粗粗嚟試。此店位於觀塘工廈，沒有特別裝修，簡簡單單，餐牌同樣簡單，只有三款粉麵、兩款飯，同數款小食。我們點左雜錦船粉($62)同牛肉船粉($48)，另外加點一份雞翼及兩串豬頸肉，跟餐飲品選了泰式奶茶及柚子蜜。等左一陣兩碗船粉上桌，湯頭顏色好濃，飲落都係，同喺泰國食到既一樣，麵底揀左金邊粉，份量正常，但配料好足，我食既牛肉船粉有兩粒牛丸，肉汁濃、肉質爽，三粉肥牛(同個湯好搭)及兩三件牛腩，仲有少量香口炸豬皮，係近期喺香港食過最好味、最有家鄉味道既船粉。(未哈韓前曼谷是我家鄉🤣)店家忘了給我們煮小食，追單後等多一陣都有得食，雞中翼($14)香茅味不算重，但炸得香脆，咬落仍有肉汁，雞肉嫩滑，好吃。燒豬頸肉($12一串，圖片是2串份量)相對一般。整體而言，食物質素很不錯，主角船粉沒有讓人失望，且定價合理，讚。遲啲晚市更有烤魚、雞煲，有機會約朋友再嚟先。