第一郡 (已搬遷) 新店位置

聽過朋友講過深水埗呢條街有唔少好野食，其中一間係食越南野。見到個店面同想像有少少唔同，無好似其他越南或泰國餐廳咁有返啲當地特色嘅裝飾，個外觀真係好普通。你無留意門口啲相嘅話會好易行過咗都唔留意🤣入到去個座位佈置同一般香港家庭式小店差不多。餐牌上都有唔少越式茶，包括法包同米紙卷。見其他食客都食緊一碗碗嘅麵，就於是點返個湯檬啦！平時食越南湯檬都係叫生牛肉個啲多，今次見主打係蟹糕蕃茄湯檬，於是就叫佢啦！成碗野一睇最特出都應該係舊蟹糕吧 但原來個湯底都好特別，飲落有陣陣嘅蟹糕鮮味，仲加埋啲香料一齊，我認為成碗最精華都係個湯。至於檬粉呀同其他配料食落就一般。食完有啲意猶未盡，就叫返份米紙卷帶走返屋企當茶點。30蚊有兩個卷但個米紙卷我就覺得一般般姐。同埋配嘅醬汁我自己就覺得唔係真係好夾，無助令個米紙卷變得更好味，只係唔好咁乾身。