德豐打冷粉麵餐廳

營業中

休息中

呢晚約左班舊同事聚聚，餐廳就係深水埗D2出口，我地一行8個人放左工去食，地方夠大有2層，大班朋友食飯都坐得舒服，嗌左大約8個餸，食打冷梗係必食鹵水拼盤!鹵水鵝片夠入味，肉質嫩唔鞋口，另外我最鍾意鹵水豬大腸同墨魚，鹵水夠入味濃郁夠香口，唔會話淨係得個咸字。鹵水豬大腸墨魚夠彈牙，真心推介，食唔停口，值得encall!炸蠔餅好香脆，又係必食! 蠔仔份量適中，外脆內嫩，點下魚露，香口滋味。九菜豬紅，大大碗好豐富，九菜爽脆豬紅新鮮嫩口，湯汁濃郁，拎黎送飯都ok!另外仲嗌左條烏頭，有點驚喜，好少出街會嗌魚黎食，因為怕魚腥味，呢條凍食既烏頭肉質嫩滑，冇泥味，點下豆醬有啲咸香味更加滋味。推介!魚香茄子都唔錯，夠惹味，送飯不錯，不過略嫌油左少少。芙蓉蛋，夠香口，不過不失。總括黎講，餐廳食物水準唔錯，值得推介，下次黎仲想試埋蠔仔粥呀!今次太飽嗌唔到咁多餸。另外餐廳地方算大，一班人黎食飯唔會迫迫夾夾，可以坐底慢慢食慢慢傾，地點方便近地鐵站，鍾意食打冷既人可以試試。