紅煮意

營業中

休息中

又一個夜晚出去食飯，就即興約埋個同事出去食呢間意大利餐廳，因為我仲記得佢係幾好食，咁啱同事又住呢頭，約埋佢一齊出去放吓負先啦。一邊放灰一邊享受美食，無得頂呀!!咁就叫咗個烤原隻鴨胸同燒菠蘿，配埋香橙青檸汁真係幾特別，要試真啲。另一個係黑松露野菌意大利飯，我知道意大利飯都唔係咁易去整得好食，所以一人揀一個，最後大家分享大家個菜式。WOW果然個鴨胸真係整得好好味，烤得啱啱好，好柔軟又香濃嘅鴨味，再配合埋香橙片加青檸汁混合放入口，簡直完美，搞到負都放唔到幾多，俾個美食搞到心情好哂!塊燒菠蘿好靚好多汁，咬落去都要喺個口入面噴哂出嚟咁。好彩無叫飯或意粉咪飽死我，有青檸汁溝薯蓉又係一個好配搭。到另一道菜式係個意大利飯，睇落去好普通，其實真係整得好好，連鎖大餐廳都未必整到呢個水準。最重要係唔會話好油膩同濟，會係每匙都想載最多嘅份量上去再放入口，好似食上癮咁，好食到好誇張呀真係。