Rice Paper (已結業)

禽晚位置係尖沙咀,而bb心情唔好,我好想同佢去一笪坐得舒服少少既地方抖吓,傾吓計,我又為食想食越南嘢,諗咗一陣就嚟呢度.大約7點半嚟到,等咗5分鐘左右有位,一坐低待應們都禮貌咁奉上餐牌,叫咗:特級牛肉湯河粉(65蚊):碗嘢嚟到,賣相唔錯,牛肉係半生熟,飲啖湯,覺得有少少淡,應該係預d客加魚露,但都幾鮮甜,河粉好滑,牛肉唔un,有牛肉味,唔錯,幾好味!牛油鷄翼(50蚊):一上台,好香好熱,食落口有少少油,但都可以,ok蒜蓉牛油原隻長臂蝦(115蚊):嚟到賣相好靚,有生果陪礏,隻蝦唔係話好大隻,但都係意料之內,先食個蝦頭,好多膏,好香好好味,而蝦身都好爽,連埋d炸蒜蓉,好味道!自製三球雪糕(蜜糖脆,朱古力,士多啤梨-45蚊):蜜糖脆最好味,朱古力同士多啤梨都唔錯,好濃好滑,good!嚟呢到食嘢,我預咗價錢係偏高,但今次我覺得物有所值,收咗你錢,同樣咁比到嘢你食,或者係我地今次叫既嘢啱咗.另外,環境同服務同唔錯,侍應態度勤快有禮,但人手略嫌不足,唯獨門口接待姐姐有少少呆.食一餐飯,有幾樣重要因素:人物,食物質素,環境同氣紛,今餐飯齊晒,好滿意,最緊要係食完餐飯,bb開心番d,舒服咗.