原居民 (已結業)

行左一日街，唔知食咩好，老公就帶左我去食佢未入行做飲食時，已經覺得好好食既西餐。未入行時既佢，並唔識得好多野，係個陣時既老公，佢覺得哩間西餐廳好好食，價錢合理，亦都開左好多年。老公話就算相隔2年再去光顧，味道一樣，佢深信間餐廳多年來都無換過廚師。我地去到既時候，餐廳經理已經好熱情地招待我地，安排我地坐牆邊既2人座位，亦都溫馨提示左我係風口位，我都覺得無問題，仲放多左一張椅俾我地放袋，非常體貼。坐左一陣，經理就拎左個set menu 俾我地睇， 選擇頗多， 頭盤同主菜都各有7-8個選擇。我地選擇左兩個set dinner,老公叫左個salmon 做頭盤，主菜係燒春雞。而我就叫左ham with melon,主菜係炭燒牛柳，4成。 另外我地仲叫左半打Pacific Rock 同煎鵝肝。首先黎既當然係生蠔，大隻得黎，好新鮮同creamy，超好味!之後就係我地既頭盤，賣相簡單，味道很好。Ham with Melon，melon非常甜，ham咸香味好重，絕配。鵝肝外身煎得好crispy，內裏texture 岩岩好，入口即溶。跟住都salmon，由於我本身唔食salmon，所以就由老公一個人食哂。