蘇山雞飯

營業中

休息中

係太子行街行到差唔多食飯時間就係附近揾嘢食，係藍馬之城見到呢間光猛有裝修嘅餐廳，望下裹面都有唔少人食飯，門面幾乾淨，再望望餐牌原來食雞飯就入去試吓。餐廳除咗有單點食物外亦有套餐，呢間餐廳叫蘇山雞飯，餐牌有個招牌雞飯，一於試下佢啦；友人唔想食咁多飯，就試吓佢個龍蝦叻沙摻摻。天氣涼，胃口大增，我地都叫多咗兩個小食同兩杯飲品。晚餐整體來講滿意，若果再經過會想試埋佢個走地雞飯，咁多個菜式我最鍾意招牌雞飯，隻雞非常滑嫩，加埋醬汁撈飯一流，有啲後悔叫左油飯唔係白飯，哈哈，另外非常少見雞雜湯，鍾意食雞雜嘅朋友一定唔可以錯過。友人食既摻摻有一大隻半邊龍蝦，加上濃濃嘅叻沙湯底，呢碗麵亦都值得推介，好有趣呢個摻摻會包埋一個牛油咖央多士，熱辣辣咁食非常過癮非常好食。小食方面我哋叫咗通菜同埋小食拼盤，味道中規中矩，若果通菜少啲油就更好。飲品方面叫咗香茅薄荷德欽同埋恐龍美祿，薄荷特飲我就唔評論，但係恐龍美祿就非常好飲，若果大家喺太子真係可以試一試呢間蘇山雞飯。