Mami Cook (已結業)

尋日晚餐突然好想食韓式便當，經過九龍城見到居然有一間好似家庭式嘅外賣店，幾新淨，便行入去睇下有冇正嘢。舖頭主力賣韓國菜，炸雞、炒粉絲、紫菜飯卷都有，價錢中上。密桃小丸子叫咗個牛肉便當，啲配菜估唔到都幾豐富喎，有好多芽菜！我覺得合唔合格就要睇下啲Kimchi醃得好唔好味，呢一間都尚好，唔會太辣，但我覺得可以酸多少少就perfect 喇！最特別佢有啲腐皮，甜甜地少少辣，幾好味，仲要有鵪鶉蛋，細細粒食落去咸咸甜甜咁幾得意。啲牛肉同椰菜一齊炒，上面仲有塊小小嘅蛋餅，所有嘢嘅調味都恰到好處，唔會太甜太辣，最緊要係熱辣辣即叫即整，好味。中間嘅酸瓜我覺得係醃得最好，食到停唔到口😋😋😋整體來說，$83一個便當係有啲貴，但佢嘅配菜好多，份量都幾夠，味道唔錯，所以我諗之後如果突然想食都會再買！