唯一壽司刺身外賣店 (已結業)

唯一唯一, 這間店就只是可以食唯一的一次. 一入去店員個個懶洋洋無精神咁款已經知道食物不會有誠意.三文魚刺身很薄, 透光的薄, 而且油脂欠奉, 帶筋, 鮮度也不是很好, 味道一般. 似乎切魚生的師傅未用心學過平衡去筋法.其他刺身壽司, 不值一提, 料份量少, 飯水氣多, 而且因為水氣太多令材料的口感變得爛融融.魚生飯, 比泰國餐廳個甜品香芒囉米飯仲細, 人地甜品都大盤過你, 檢討下啦!

轉手之後已經買過一次, 以為未上手所以就畀多一次機會佢, 點知中晒伏... 上次個碗已經唔係大, 飯同刺身都係少, 估佢唔到今次仲衰過上次!!! 要咗一個三文魚親子飯($45), 首先佢一擺碗飯出嚟我已經覺得係細, 返到屋企一拎出嚟就見到個碗好似同大X 活下午茶嗰D 迷你叉燒飯咁大, 唔緊要, 只要裝滿都唔會好少, 點知佢竟然得半碗!!! 都唔緊要, 好食就得喇... 不過呢種幼稚嘅諗法食第一啖就已經消失晒, 飯爛仲要一舊舊!!! 三文魚夠晒冰凍, 不過都掩飾唔到佢冇味道, 三文魚籽都算正常, 但係都挽救唔到碗飯... 唉... 我都唔知講咩好, 大家睇完D 相自行判斷啦... 我諗我都唔會再畀錢佢賺...嗰少少飯畀3 枝豉油, 想人飲飽當冇事咩??? 包wasabi 更差...

今日又去咗買三色魚生飯, 不過近期已經有分係正常size 定係迷你size 嘅刺生飯, 有得揀我一定係揀正常size...一如以往, 三色魚生又有少少唔同, 今次係三文魚, 鯛魚同希靈魚, 一樣係每樣兩片, 不過大片少少; 三文魚厚切, 新鮮, 味道唔錯; 今次D 鯛魚好好食, 而且又係厚切, 好味到我想即刻走去再買多個... 希靈魚就普普通通咁啦, 唔會話好腥, 味道唔錯... 個飯份量大咗, 所以好滿足, 刺身份量適中, 可能我唔係咁大餸, 不過如果可以多D 我都唔會介意嘅...包埋一罐汽水都只係$35, 靚女姐姐又有禮貌, 真係賓至如歸!!

今日去買咗個$25 嘅三色魚生飯, 佢特別嘅地方係嗰三色次次都唔一樣, 只係三色入面一定係會有三文魚, 其他兩種永遠都估唔到...今次畀咗三文魚, 鯛魚同魷魚, 每樣兩件; 三文魚厚切, 新鮮算大塊; 鯛魚同魷魚都唔錯, 飯係最好食嘅一環, 不過都係嗰句: 唔係日本米囉... 仲有D 壽司薑我都覺得好好食, 味道啱啱好, 可惜比較少...呢個飯食過幾次, 今次係特價飯, 之前D 魚生出現過吞拿魚, 劍魚腩之類, 總之差唔多次次都唔一樣...平, 就係平, 又唔係太差, 今次要畀個笑佢!!

一向都有幫襯呢度買魚生飯, 今日係近期裝修完第一次幫襯, 其實所謂嘅裝修只係換咗個凍櫃, 整到見唔到個刺身櫃...今日買咗個特價嘅角切魚生飯($25), 可惜入面只係得三文魚, 蛋同青瓜 , 同原價嘅差好多, 嚴格上嚟講只係一碗角切三文魚魚生飯, 好彩飯量依舊足夠, 醋味夠, 但唔係日本米煮成... 原價嘅係有好多種刺身嘅...再加咗一盒三文魚腩刺身($68), 腥味重咗D, 好似唔多新鮮又冇乜魚味, 不過夠晒肥美, 份量足夠...今次極其量只係可以畀個OK!