原來香港都有肚皮舞睇!! 呢間黎巴嫩人開嘅“Shahrazad Lebanese”，將當地人熱情帶嚟香港，逢星期四8:30pm邀請肚皮舞孃即席表演。一邊食黎巴嫩菜、一邊睇表演，舞孃仲有機會行到你身邊跳舞。估唔到香港都有呢種體驗，好似去咗趟中東旅行咁呀。
“Shahrazad Lebanese”儼如阿拉丁世界，店內寶藍色牆壁、鏤空雕花窗飾都好唯美。梳化位仲放滿圖案咕𠱸坐得好Chill，好多女仔都鍾意攬住嚟影相。另一個人氣打卡位係半戶外座位，望住紅磚古蹟「大館」飲酒，同平時熙來攘往嘅香港夜景完全兩種感覺。
【黎巴嫩菜有咩食?】
其實黎巴嫩菜好健康，主要以豆類、蔬菜、水果煮製海鮮肉類，將調味料減至最低，亦係近年受推崇嘅「地中海飲食」之一。“Shahrazad Lebanese”外籍主廚更堅持只用外國高質食材，所以就算望落簡單嘅豆蓉、烤茄子、烤肉都用咗多種天然香料調味，食落好有層次驚喜。
黎巴嫩人飯前會食啲前菜—Cold Mezze、Hot Mezze，無論冷盤熱盤都有好多選擇㗎。
Cold Mezze
鷹嘴豆蓉(Hummus Awarrma)
好經典嘅鷹嘴豆蓉，連埋煎羊肉、松子一齊食，多重口感又開胃。
Hot Mezze
Kibbeh
黎巴嫩特色美食Kibbeh，混合羊肉碎、小麥碎、煎羊肉、鷹嘴豆蓉炸到外脆內軟。食嗰陣蘸啲紅菜頭醬一齊食，香口健康。
炸鷹嘴豆餅(Falafel)
外國好興嘅健康小食—炸鷹嘴豆餅。第一啖咬落去有啲硬脆，入面就係綿密嘅鷹嘴豆蓉，配埋乳酪醬更加好食。
(左)Kibbeh、(右)炸鷹嘴豆餅(Falafel)
烤哈羅米芝士(Grilled halloumi)
哈羅米芝士特點係唔易融化，所以大廚可以將表面烤至金黃，外層微焦輕韌；內裡柔軟鹹香，同平時食嘅芝士好唔同呀。側邊嘅西瓜沙律、石榴醬輕甜清爽，同芝士一鹹一甜啱啱好。
香煎蝦(Shrimp Matffie)
無論中東、歐洲地區都經常用大蝦做前菜，最重要係橄欖油吸滿蒜蓉、大蝦精華超鹹香。如果諗住同朋友嚟“Shahrazad Lebanese”飲吓酒、食吓嘢，嗌呢款香煎蝦就啱喇。
自家製香料羊肉香腸(Lebanese Makanek)
平時都係食雞肉腸、豬肉腸多，估唔到羊肉香腸又幾好食。羊肉味會濃啲又唔羶，而且羊肉夠多好綿密。
香烤澳洲茄子(Roasted Eggplant)
中東料理常見嘅烤茄子。茄子皮脆脆地，茄子肉又好柔軟。跟配椰棗糖蜜、乳酪醬幾有新鮮感，比平時食開嘅蒜蓉茄子有驚喜。
香辣薯仔(Batata Harra)
簡單嘅炸薯仔永遠有種食完又想食嘅魔力，外層灑滿烤孜然、大蒜，飲啤酒一流。
(左)香烤澳洲茄子(Roasted Eggplant)、(右)香辣薯仔(Batata Harra)
中東芝士餡餅(Sambousek Cheese)
酥皮餡餅炸到幾鬆脆，入面係滿滿鹹芝士、香草，一咬開仲有少少拉絲口感，芝士控一定好鍾意!!
Main
慢煮燉羊肩(Tagine Bamia Bil Lahm)
其實Tagine係陶瓷鍋一種，慢煮期間可全面保存食材水份。所以羊肩會Keep到好嫩滑，用叉輕輕撕開已經得。番茄醬汁略帶肉味，用嚟撈飯一流。
慢煮羊膝(Freeket Mozzah)
同樣係慢煮到好腍嘅羊肉料理。如果你鍾意濃郁啲，又多啲油脂滑啲，更推薦呢款慢煮羊膝。特配嘅希臘乳酪醬，食多幾啖肉都唔會膩。
慢煮美國頂級牛肋骨(Lahma Bil Fasolia)
始終無牛不歡嘅話，呢道慢煮牛肉係用USDA Prime級別嘅牛肋骨。牛肉煮到入晒味，近乎肉骨分離勁軟腍。
To Share
烤肉拼盤(Shahrazad Mix Grill Meat)
黎巴嫩人好鍾意食烤肉，“Shahrazad Lebanese”更係香港少見真·炭燒。拼盤堆滿烤牛肉、羊肉、雞肉，全部燒到有炭香肉汁。今次呢個Size只係2人小份量，多人嚟食嗌個大嘅真係好滿足。
Shahrazad Lebanese Dining Lounge & Bar
地址: 中環雲咸街75-77號嘉兆商業大廈2樓
電話: 23300242