尖沙咀厚福街一向都係食街，成條街地舖連樓上舖夾夾埋埋差唔多有成60間餐廳咁多！中西港日韓咩式都有，最近又有間新餐廳喺嗰度開張，主打歐洲fusion菜嘅，好彩嘅話，分分鐘有機會撞正「神之子」歐陽耀冲調製杯cocktail過你添呀！

點解？原來呢間餐廳係歐冲同幾個朋友一齊夾份開嘅，曾經效力過葡甲球隊嘅佢，唔止上得球場，仲入得廚房！「我第一興趣當然係踢波啦，第二就係煮嘢食，希望成為一個廚師。」佢仲話踢葡甲嗰陣，一放假就會去西班牙、意大利等其他歐洲國家度食嘢，今次就將佢集過嘅美食帶返嚟同大家分享。

呢道黑啤豬手，就係佢喺德國食過嘅菜式，豬手慢煮咗10個鐘之後，再用黑啤同麥芽糖浸成12個鐘，所以食落有麥香之餘，亦有陣陣黑啤嘅焦香。皮烤到脆脆地，肉亦夠鮮嫩，雖然有得選配自家製醋汁、芥末醬同酸椰菜，不過就咁食亦已經好夠味，點汁反而有機會蓋過咗黑啤嘅微甜。

至於大大條相當吸睛嘅八爪魚，則係歐冲喺英國一間fusion菜餐廳食過類似嘅，然後就返嚟四出搜羅相似嘅食材同搵廚師調味。最後就揀咗嚟自北海道嘅八爪魚，用慢煮方法處理，令鮮味更突出，但口感又唔會太軟腍，韌度適中，配埋自家製泰式酸辣汁又幾清新。

餐廳仲自設意粉機，所有意粉都係自家配方製作，好似呢道鮮海膽配鰹魚汁蜆肉意大利麵咁，就將海膽同鰹魚汁撈勻咗落啲麵度，啖啖鮮甜。圍邊仲有好多隻蜆，一啲都唔孤寒。

咦？點解咁大隻碟得一粒帶子喺中間？明明叫嘅係帶子蟹肉濃湯嚟喎……

唔使驚，個湯另上啫。喺你面前先至將啲湯倒落去，留住溫度速度感情同態度嘛。用新鮮三點蟹整嘅，蟹味香濃，仲有絲絲蟹肉食到添，蟹迷開心死。

食西餐當然唔少得酒。葡萄牙最出名嘅Sangria，通常好多女生都鍾意飲，呢度選用嘅紅酒酒體較輕，加入大量生果之後，自然飲出果甜，小清新嘅感覺應該更得女生歡心。

但講到最特別嘅，就非Milo Milo呢隻cocktail莫屬喇，係佢哋餐廳研製㗎。青bb，飲落先係辣辣地kunkun地，有些少攻鼻，但又有蘋果甜，都幾特別同刺激。哈哈，係wasabi嘅味道呀！沖調嘅過程真係唧咗啲wasabi落去㗎，仲有sake、gin、lime juice同蘋果汁等。同碟有芥末蜜糖醬，點生果食，甜甜地，當然都係有wasabi嘅辛啦科科，第一啖試嗰陣唔好咁貪心點咁多醬呀，但查實又幾夾喎認真，唔係講笑，愈刺激愈開心，食下食下會忍唔住食晒。

Y Show Tasty
地址：尖沙咀厚福街8號H8 12樓

文、相：Kar