帶你走遍西環隱世小店 | OpenRice 香港開飯喇

如果你係讀薄扶林大學，四年生活入面，其中一樣最大嘅得著，就末梗係練成一把識飲識食嘅嘴。宿舍喺西環附近，大街小巷都係隱世美食，就算四年足不出「西環」，相信都未必可以試盡啲嘢食。而家等開飯仔傾盡呢幾年嘅「食記」，帶你一網打盡最受學生歡迎嘅西環隱世小店啦!

超越放題水平 神谷

呢間日本料理絕對配得上「隱世」二字，店舖好細，裝潢陳舊，看似平平無奇，但入到去絕對會令你O哂嘴！首推牛舌同羊架，牛舌熟度拿捏得啱啱好，肉質嫩滑。雖然我平時唔鍾意食羊，但佢嘅羊架烤到肉汁四溢，一啲羊騷味都冇。二推三文魚，無他，鮮味、厚度、誠意十足。再推鵝肝，50幾蚊兩大塊，性價比極高。每次去到神谷，開飯仔都會好似放題咁order，高於放題嘅質素，低於放題嘅價錢，梗係要叫盡佢啦！

Photos by 小柔*Sweety Heart & hungrybubu

港大學生早茶必到 新興食家

呢間餐廳簡直壟斷咗西環嘅早茶生意，幾乎所有港大學生飲早茶都會去呢到。特別要提嘅係金錢肚，咖喱非常入味，仲要係厚切，貨真價實呀。仲有燒賣、奶黃包、雞札、排骨飯都係必食，起到身嘅咪去食返轉囉。

Photos by Aimee Yiu & hey.food.here

司機經過一定order的烤脾 真滋味美食

就咁睇落好似旺角啲街邊檔咁，實際佢都係壟斷商，壟斷西環嘅雞脾生意……每次落到去，都鍾意order一隻烤脾，即叫即炸，雞皮香脆，肉質嫩滑。店主係一對老夫婦，凌晨街無一人嘅時候，仲見到佢哋喺小店度炸嘢食，唔知點解特別有親切感。

Photos by mcleolau & supersupergirl

米芝蓮燒味 波記

喺燒味界薄有名氣嘅波記，舖面都係平平無奇，點睇都唔似被米芝蓮推介！燒鴨皮脆肉香，叉燒香甜可口，價錢不高，比某連鎖快餐店5x幾蚊嘅燒味飯贏幾條街。波記係夜晚六點就收舖留意返，因為嗰個鐘數全部嘢食都已經賣晒咯。

Photos by FL & sosoku

超抵食韓燒 新高麗苑

推介佢唔係話佢真係超級美食佳餚，而係午市套餐太抵食，性價比高。第一次去感覺係：啲嘢食嚟夠未？Order一個lunch set，有前菜（留意前菜每人有三碟，包括芽菜、薯仔、青菜）、胡椒豬肚湯、一碟自選嘅肉同甜品。當然啦，你唔會咁毒毒自己去食韓燒架嘛？我當你4個人去，就已經有前菜x12、湯x4、肉x4、甜品x4嘅份量，滿到一張枱都放唔哂！

Photos by amyblogblog & wingscat

上面呢幾間餐廳全部都冇好靚嘅裝修，又或者五星級大廚，但勝在價錢相宜，味道得宜，物超所值。

文:段

隨時接收最新資訊
讚好OpenRice專頁！