一餐飯要講究環境、味道同CP值之外，仲要講氣氛嘅，特別係要約女神男神嘅時候！計開飯仔話齋不如搵間有Live Band表演嘅餐廳，實行以歌傳情啦。除咗最出名嘅Hidden Agenda， 其實香港仲有唔少餐廳有唔同音樂種類嘅Live表演，總有一間啱你心水嘅。
本地音樂 x 多國菜 1563 At The East Live House and Restaurant
唔少西餐廳或者酒吧都有Live Band，但都係以食物為主角居多。灣仔呢間就以Live House為主餐廳為輔，目的係為音樂人，特別係本地音樂人提供一個優質小型表演同互動嘅平台。嘢食方面就有唔同國家菜式選擇，由日式丼飯到西式意粉。連小食拼盤都有西式、中式同東南亞式選擇，夠哂多元化。
獨立音樂 x Fusion菜 The Live House
店如其名，旺角地庫呢間係由音樂人開設嘅Live House，有睇我地開飯餐廳專訪嘅話就會知道，店主希望將獨立音樂帶到鬧區，而當中嘅橋樑就係美食喇。晚市會有唔同樂隊同歌手表演，畀大家一邊聽歌一邊食呢度嘅西日Fusion菜，好似燒牛肋骨、十勝海鮮忌廉汁意大利飯、蜜糖黑松露雞翼等。
Jazz Band x 澳洲菜 Ned Kelly's Last Stand
睇完電影《星聲夢裡人》你都想去Jazz Bar感受下？喺香港就有呢間歷史悠久嘅Jazz Bar，1972年開業至今已經有四十幾年歷史。位於尖沙咀而且裝修好有美國西部風格，但賣嘅其實係澳洲菜，味道算係不過不失。不過其實嚟得嘅，唔少都係為咗飲杯啤酒同聽Jazz Band表演啫。
更多【二人前指南】： |
Live Band x 德國菜 King Ludwig Beerhall
唔單止得西餐廳先有Live Band坐陣，尖沙咀呢間專賣傳統德國菜嘅餐廳一樣有！必食德國香腸拼盤，唔同口味香腸配酸菜同薯仔夠滿足。另外招牌德國鹹豬手皮脆肉嫩又大大份，最後嚟多份黑森林蛋糕做甜品。一手鹹豬手一手啤酒係就係麻甩咗啲，但氣氛夠哂熱鬧，慶祝生日或者偶然當轉下Feel都唔錯。
本地音樂 x 西餐 BV Kitchen & Bar
圖：heidima
如果想要最無得輸嘅浪漫西餐加Live Music嘅話，尖沙咀呢間氣氛唔錯嘅酒吧餐廳或者就係你嘅選擇啦。夜晚餐廳會請嚟唔同本地Live Band或者獨立歌手，可以一邊欣賞表演一邊食澳洲黑安格斯牛肉眼、龍蝦黑松露温泉蛋意粉同日本迷你南瓜配北海道帶子意大利飯。而我地專欄作家小不啦嘰1大口推介嘅頂級和牛漢堡亦不容錯過。
西洋舊歌 x 酒吧 仙吧
圖：Kent-CEO
以上餐廳酒吧都集中喺九龍區，最近介紹返一間位於沙田嘅酒吧畀各位新界嘅朋友啦。呢間酒店地下嘅酒吧裝修以藍色為主調，而且有戶外同室內座位，寧靜舒服之中帶啲情調。叫得酒吧就當然以酒為主，小食選擇以大路嘅炸魚薯條、Pizza同雞翼為主。Live Band主要表演英文舊歌，不妨食完Dinner再入嚟飲杯嘢Relax返晚。
文：Cathy