聖誕節屋企冇咁多位擺棵聖誕樹，咪擺棵細嘅囉，仲食得落肚嘅添。呢個聖誕樹造形嘅軟雪糕仲要係港人至愛嘅抹茶味嚟㗎！上面一粒粒彩色波波裝飾就係由日本直送嘅彩虹脆米，個餅底就係蕨餅嚟。好啦，相機食完就到你食喇，一路食一路唱返首：食軟雪糕~雪糕~雪糕……
聖誕節就是要大紅大綠！用日本京都有機宇治嘅抹茶粉整嘅抹茶雪芳蛋糕，淨係睇個樣就知好濃嘅綠茶味出晒嚟，再加啲無花果、杏脯肉、紅莓乾等等做裝飾，成件事真係好聖誕！
雖然好多人鍾意冬天食雪糕，但都有好多人喺冬天，會想食到啲熱辣辣嘅嘢食嘅。日式燒餅啱唔啱？出爐嗰陣熱辣辣㗎，用日本麵粉同雞蛋整成自家製餅皮，有紅豆味、抹茶吉士味、抹茶紅豆味、蕃薯味、北海道粟米火腿味……好多味揀，軟林林暖笠笠，面頭仲吸多個聖誕印仔落去。
聖誕之後就係新年，日本人每年新年都會擺門松，大概係三支竹加啲松樹嘅枝葉咁樣啦，寓意將「年神」接返屋企納福。門松抹茶蛋糕就係參考咗呢個傳統，用抹茶蛋卷裝成門松喇。食咗之後有幾多福我就唔知喇，我淨係知道有好嘢食就要開心些牙啫~
文：Kar
隨時接收最新資訊
讚好OpenRice專頁！
關鍵字
聖誕節
雪糕
抹茶
茶之環
sweets house cha cha
複製到剪貼簿