荃灣真係有好多好野食，今日同事提議去飲茶試下小店嘅點心，為食嘅我哋當然舉手去啦﹗

1點去到，全店滿座，等咗約15分鐘就入得，店子細細，所以坐得好緊密。小店標榜即叫即蒸，而點心紙上每樣點心價錢可以話係物超所值，點解﹖睇落去就知﹗

大師兄脆竹腸 ($28) - 賣相精緻，一咬落去油炸鬼好脆，入面仲有好多餡料，有木耳、紅蘿蔔絲、肉碎等，口感好豐富﹗必食﹗避風塘炒蘿蔔糕 ($25) - 好香﹗蘿蔔絲刨到好幼細，唔會覺得好粉，而且每邊都煎到燶邊，辣辣哋，好惹味﹗ 原隻鮮蝦腸 ($26) - 好耐無見過咁晶瑩剔透嘅腸粉，好靚，食落仲好滑，好似會SIR落去咁，蝦都好大隻兼爽口﹗ 蒜蓉蝦春卷 ($20) - 春卷皮脆卜卜，入面有粟米加蝦，好香口﹗ 沙嗲金錢肚 ($24) - 味道好濃，牛肚好嫩滑，一D都唔韌﹗ 酥炸魷魚鬚 ($32) - 炸漿一D都唔厚，魷魚鬚條條都好大條，但有D韌，好難咬得開﹗ 大師兄蝦餃皇 ($16) - 可以話係皮薄餡靚﹗鮮蝦隻隻都咁大隻﹗皮唔乾，入面唔會乾爭爭，仲好JUICY﹗順便講埋蟹籽鮮蝦燒賣皇 ($16)，豬肉加埋蝦攪埋一齊，扎實唔鬆散，又係非常JUICY，但SORRY，張相唔見咗﹗ 灌湯小籠包 ($20) - 略嫌皮有D厚，但好多湯汁，入面嘅豬肉都有汁，食落覺得好新鮮﹗ 原籠馬拉糕 ($18) - 本來已想停手，但見點心紙張相好吸引，所以就算飽都要試﹗放上枱時個糕彈吓彈吓咁，一睇就知好鬆軟﹗味道唔會太甜， 仲好香，一口氣食咗兩件﹗ 其實離離去去都係去D連鎖酒樓飲茶，味道唔係話特別好食，而且又價錢唔平﹗不如支持小店，感受香港獨有嘅味道同美食，呢度嘅點心每樣都新鮮熱辣，每樣都好好食﹗價錢仲好貼地，由$14至$36都有，喺酒樓一個小點都最少廿幾蚊，所以我話呢度物超所值就係咁解﹗點心紙仲有好多野好吸引，所以一定會再嚟幫襯﹗

早排睇見到呢間芋圓好吸引，所以趁嚟大角咀打波後順便試試！今日係星期五，預左會等得耐，我哋一行6人等左約20分鐘就入得，店鋪細細，坐得逼都無所謂既！




等位戈陣已經被呢個吸引咗，但寫明只限星期六、日，本已打定輸數，點知一坐低就話有得食！所以我哋6個人有其中5個都食呢個！幾壯觀！😂😂




愛文芒果甘露芋圓其實係楊枝甘露加芋圓，芋圓喺晒底，唔算多，但都食得出唔同味道，有地瓜、紫薯⋯⋯



朋友唔食得凍野，所以叫左熱傳統仙草芋圓，份量多過愛文芒芋圓好多！



淨係食一碗芋圓邊夠呢，食多個梳乎厘pancake先夠喉😂 佢動住送上枱，所以我地好大期望！但食落感覺空氣感唔夠，好似趕住出爐咁，多粉無蛋香！以$68一個嚟講算好貴！

所以呢間都係試過就好！

自從轉咗嚟荃灣返工後，真係覺得呢區有好多好野食！今晚約左住葵涌嘅閨蜜飯聚，當然約喺荃灣食啦，大家都方便丫ma！我話想食西餐，佢就提議食呢間，話食過唔錯，咁就信佢試吓啦！ 一坐低就畀呢幅花牆吸引咗！ 廚師推介💁🏼‍♂️ 揀左酥炸生蠔同埋流心芝士醬炸雞 先上餐湯加麵包，今日嘅湯係蘭度豆湯，平時咩豆都唔食嘅我表示呢個湯好驚喜！一d都唔覺得係豆湯，無青草味😅 而且仲好滑好creamy，仲有少少咬口！麵包都好好味，好軟熟，仲係熱架！👍🏻 酥炸生蠔 - 好香口，但唔覺油膩，入面嘅蠔肉感覺好新鮮，大大粒，好滑唔韌！ 流心芝士醬炸雞 - 較普通，如果芝士再多d會仲好！ 鮮蜆配意大利扁麵 - 有辣椒、蒜片、欖油，因朋友唔食辣，所以落單戈陣要求唔辣或者少少辣，味道剛剛好，朋友都食到，蜆都好新鮮爽口，意大利麵充滿蒜片同欖油香，好食！ 蜜汁燒德國鹹豬手 - 侍應推介呢個豬手畀我哋，話呢個豬手唔係炸，係焗既，所以唔會有熱氣嘅感覺！果然肉質仲好嫩滑juicy，豬皮仲好膠質，食完個咀好漿口！配菜嘅紅蘿蔔、椰菜仔好鮮甜！ 餐廳環境唔錯，適合朋友仔聚餐，因為份量都幾大，所以幾個朋友食就啱晒！另外，食物質素都好好，食得出用高質材料，絕對係荃灣區值得去嘅西餐廳！

放工想去睇波鞋，但又唔想熱辣辣去波鞋街行，所以叫Honey陪我去新城市廣場行吓。行街前當然要醫吓肚先啦，原來呢度開左好多新餐廳﹗而我哋睇完餐牌後就被呢度嘅喇沙吸左入去﹗😋 咖哩喇沙手撕雞湯麵 - 馬來西亞喇沙著重咖哩湯底，而呢個湯底嘅咖哩係超級香濃，材料十足﹗魚片彈牙，雞絲同豆卜份量算多，我揀左滲滲，即係油麵加米粉，啖啖麵都索晒湯汁，好好味﹗
馬來辣蝦白毛豬肉湯麵 - 食麵最重要先呷一啖湯，第一啖湯已經好重蝦味，可想而知係用左好多蝦去熬湯﹗而且蝦嘅份量又好多，整體都好好食﹗
榴槤芝士蛋糕 - 我自己唔係榴槤愛好者但都試左一啖，我覺得好重榴槤味，仲有榴槤絲，但鍾意食榴槤嘅Honey話唔夠濃，無乜味🤷‍♀️ 美綠可可 - 通常食馬拉野都會有，但覺得呢杯唔夠濃，可能美綠粉唔夠多所以味道有D淡。

10月1號公眾假期竟然BOOK到羽毛球場打波，仲要係近屋企嘅東啟德，梗係要去啦﹗打波前先到新蒲崗搵食，經過呢間珍昭掂門口有馬家開飯嘅相，一於入去試試佢﹗
全日餐樣樣都好吸引，今次就試吓呢度嘅招牌「最掂叉燒煎雙蛋飯」同埋「昭掂拾味酥雞」啦﹗

先嚟「最掂叉燒煎雙蛋飯」，一見到個厚切叉燒已經好想食，啖啖肉又夠稔，一D都唔靭！而煎雙蛋好滑，加埋甜豉油撈飯一流﹗
落完單先醒起尋日先食完鹽酥雞同KFC，肯定熱氣死﹗呢個「昭掂拾味酥雞」雖然望落好炸，但一D都唔油，外層炸到脆卜卜，雞脾肉好嫩滑，不過略嫌雞胸肉好鞋口，但配埋蘋果醋燒烤汁食絕對加番分，酸酸甜甜咁，令炸雞唔會太漏太油膩，點點吓差唔多全部醬食晒﹗薯條係粗薯條，但入面有D鬆散嘅感覺，唔夠實在。
其實仲有好多野想食，例如「菠蘿山楂咕嚕肉飯」、「蔥油雞扒煎蛋飯」、「香蔥辣魚拼蓮藕煎餅飯」等等。下次再嚟新蒲崗打波一定會再嚟食﹗

上個月本來去大阪旅行，順便去神戶、和歌山食好野，好不幸地關西機場關閉，旅程被迫取消而轉戰越南，但我哋仲好念念不忘日本美食，既然無得去日本，唯有喺香港食餐好野補番數！朋友極力推介嚟呢度食海膽，咁就嚟呢度食豪佢啦！

呢度似居酒屋咁，地方唔大，大約有18個位，咁啱被安排坐吧枱，可以近距離睇住師傅煮野食。但因店面太細，侍應不時行過都會掂到...
十層海膽杯 - 白飯魚薄脆好香，脆卜卜。黑魚子集海水鮮味、咸香於一身。再食北海道紫海膽，入口軟滑順口，非常鮮味，一d苦澀都無，仲足足有三層之多，絕不姑寒！第一次食海葡萄，夠爽口！帶子好鮮味，三文魚子唔腥，粒粒脆卜卜，吞拿魚拖羅入口即溶，仲有松葉蟹肉，海水鮮甜味喺口腔久久不散。$398 係值得既！👍🏻

楊枝甘露沙律 - 有蘋果絲、芒果同柚子粒粒，蘋果絲非常清爽，芒果唔酸甜甜地，加埋柚子粒粒，成個沙律好清新，好開胃﹗

芝士年糕 - 見到師傅喺焗爐拎出嚟，新鮮滾熱辣，真係要等佢攤凍少少先食得﹗一咬落去好軟熟，好似食緊燒棉花糖咁，外面仲燒到少少脆，芝士味唔算濃，但咁樣先唔會太漏﹗一人一個真係唔多夠喉﹗🤤


海膽燒岩蠔 - 見到師傅將生蠔先放入焗爐焗，再用燒槍燒，蟹籽食落卜卜脆，海膽好甜，焗蠔一D都唔靭，好食﹗


三文魚夾餅創作壽司 - 齋睇個名其實都估唔到係咩，原來係三文魚粒粒加沙律醬，再加兩塊薄脆，又一清新之選﹗



清酒鮑魚雞翼 - 第一次見鮑魚釀入雞翼，即刻覺得好名貴﹗雞翼燒得剛剛好，入面嘅鮑魚似係鮮鮑，雖然唔覺有清酒味，但好爽口彈牙，有創意﹗


雲海板上飄 - 食冷麵好驚佢會太稔無咬口，但呢個一D都唔會﹗聽侍應講好似係將三文魚子、海膽打汁，再與冷麵撈勻，食落好爽口，好夠味，配埋北海道紫海膽一齊食，好想再食多碟﹗😋


海膽雪糕 - 原來海膽變左雪糕會係鹹鹹地咁，奶味唔會好重，但好滑，味道剛剛好﹗

呢餐海膽餐非常滿足，原來海膽可以有咁多玩法，師傅真係好有創意，仲有好多野想食，有機會一定要再嚟試晒佢﹗

喺新蒲崗打完波又肚餓喇！唔想食太飽，但又想有d野落肚，又咁啱經過華園，又唔洗等位，咁就入去啦！ 我地一行5人，啱啱好坐晒最入面張枱，如果遲一步先嚟就要等位喇！真係估唔到呢度連晏晝都咁多人食！ 睇餐牌實在有太多嘢想食，所以望吓周圍嘅推介啦，原來呢度係米之蓮推介食店之一！見到牆上有芒果腸粉、芒果河粉好吸引，但竟然今日無，咁我就食芒果豆腐布甸啦！ 芒果有d甜有d酸，豆腐味唔夠濃，唔夠香。食完芒果先食布甸，完全遮蓋左布甸嘅豆腐味，失望！ 同場仲有芒果涼粉西米，偷食左幾啖，無乜特別。 而朋友們嘅都係無乜特別⋯但作為平民甜品鋪，以價錢嚟講，都唔可以期望咁高嘅⋯

閨蜜今日好突然咁約我放工去街，話要買份禮物畀佢個同事，farewell佢wor，見今晚放工無野做，咁就陪吓佢啦！ 搜購完一輪已經8點幾，係時候要食飯，行到過嚟厚福街睇吓有咩食，見到有我想試好耐嘅德美，咁就即刻上去睇吓有無位啦！竟然唔洗等就有位，好彩！ 得兩個女仔又唔係好肚餓，所以只係叫左少少野！ 煎鵝肝帶子壽司 - 鵝肝同帶子出奇地夾，帶子好鮮味，入面爽口嘅青瓜絲增加左口感，好味！ 壽司盛合 - 美 - 成個盛合好吸睛，壽司新鮮，玉子燒甜甜地，唔會太大舊所以唔會太漏。 中拖羅 - 雖不至於有入口即溶嘅感覺，但唔會有腥味，味道唔錯。 汁燒魷筒 - 較為失望，因為味道有d怪怪的，可以唔試。 炸雞軟骨 - 唔算油膩，雞軟骨爽口，配啤酒啱晒！ 飯後甜品係加左黃豆粉嘅蕨餅，唔會太甜，唔錯！ 整體上壽司質素唔錯，係熱食爭d d，可以唔叫。另外，對比差不多級數嘅日本餐廳，覺得價格有d貴，總之試過就算喇～

自從佢開張無耐食過Fish & Chips後就念念不忘，因為我覺得佢嘅味道同英國食嘅Fish & Chips有得fight，所以成日都想食番，但夜晚佢哋會唔開，lunch又可能無晒位，所以好難食到。 今次都唔例外，lunch hour 差唔多等左半個鐘先有得坐低，but..........點解餐牌無左Fish & Chips嘅！！唯有叫番個黑松露醬薯條補番數啦！仲有蟹肉沙律、照燒雞扒飯、雞肉卡邦尼... 先嚟黑松露醬薯條，份量好多，薯條即炸，條條都好飽滿，黑松露醬好香，唔覺意就蘸晒！👍🏻 跟住係蟹肉沙律，蟹肉好新鮮，感覺似喺隻蟹拆肉出黎咁，絕對唔係蟹柳！沙律菜都好新鮮！ 照燒雞扒飯都係驚喜之作，雞皮煎到好脆，肉好嫩滑，醬汁甜甜地好好送飯！ 充滿芝士嘅雞肉卡邦尼意大利粉，意粉掛滿晒醬汁，非常濃郁但又唔覺漏，意粉硬度剛好，唔會過稔👍🏻👍🏻 呢度lunch價錢唔會好貴，包一杯飲品，如果食lunch嘅話最好早d到，因為店面細，大概只可坐到20人。另外，最好出返Fish & Chips啦！😁😁

朋友生日想食日本野，見呢間既食評講d反卷壽司好好味，所以就約佢黎呢度食啦！ 呢度枱局似居酒屋，好熱鬧！入座起計時90分鐘，所以要催朋友快d收工過黎。 叫左3款壽司，樣樣都好好味！ 除咗壽司，仲叫左其他小食試試，但相比之下，味道唔夠壽司好味，屬普通之作。最好味既係燒雞泡魚乾，其他野都係爭d d 咁⋯ 如果係壽司癮起既，呢度係唔錯既選擇，但如果鍾意食日式小食既，就唔洗考慮呢度喇！價格有d overpriced，話限時90分鐘，真係會要你夠鐘就走，因為出面真係有人等緊⋯