認識左滾得棧呢個品牌都好幾年，由油麻地個間鋪認識到尖沙咀新鋪，剛剛先知原來佢已經不經不覺成立20週年，尋晚食飯先知呢係呢個咁特別嘅日子有幾個優惠。 即日起至4月30日，只要提早1日係Whatsapp或致電訂座，憑訂座碼「滾得棧生日快樂」，即可享全單9折，4月生日的壽星們更可享全單88折優惠，機會絕對難得，最正係有朋友咁啱四月生日，正好攞到優惠。 尋晚食飯照食左佢最出名嘅手切牛，仲有新提出嘅火焰雞煲，入面好足料，有好多多蝦，豬膶同石貝，個湯有酒味仲有蔗汁嘅甜味，食之前又有點火儀式，有得睇有得食。 仲有其他一路都咁出色嘅火鍋料如雲吞，梅菜豬肉餃，餐前小食，當然少不了時令嘅刺身，食完之後再整個椒鹽魚骨，更加係送酒嘅佳品，大家留港消費記得試下呢啲港式滋味。

Little Napoli早就介紹過，自從佢攞咗米芝蓮推介之後，越來越多人識得呢間嘢，好多人都會特登去跑馬地食pizza，適逢有朋友搬過去，我諗應該可以多啲機會食。 之前都見過來自薄餅發源地拿坡里的總廚 Gavino Pilo 今晚佢坐陣特別放心，仲要擺哂pose俾我哋打卡。 Margherita，係最經典款，用DOP(Denominazione di Origine Protetta)聖馬札諾香濃茄醬、Agerola 水牛芝士、羅馬羊奶芝士、新鮮羅勒同橄欖油烤製而成，味道比平時嘅芝士味重得多，用上佢哋家鄉方式成塊食，特別正。 你有冇想過pizza可以向活火山致敬？Vesuviana 就係向意大利南部卡帕尼亞(Campania)的著名活火山致敬，這款絕對係第二間找不到的原創口味，用上意大利茴香豬肉腸、西蘭花葉、煙燻Agerola 水牛芝士、羅馬羊奶芝士和辣椒碎，辣辣地幾開胃。 Boschiva應該一定俾到你最好嘅記憶點，用上巴馬黑毛豬頸肉Coppa 做pizza主角，你應該一定無試過。聽主廚講巴馬黑毛豬肉肉質鮮嫩，肉味好強而力，肉質肥瘦相間，加入同樣味道強烈的火箭菜、磨菇、香草後更特顯其pizza的特色。 當晚有個新pizza Nerano 用上黃番茄醬，醃製的意大利青瓜，意大利鮮乳酪，碎 Provolone 乾酪，風乾豬面頰肉和羅勒，又係好新鮮同與別不同嘅配搭係新鮮感你，不過呢個係期間限定，唔知之後會唔會放入menu。 當日食左六七隻pizza，勁滿足，最正係多啲人，下次希望朋友housewarming一定要食多幾隻試多啲唔同嘅味。

話說前排約朋友食生日飯，T先生話佢去搵廷師傅，因為大公館又有一個新一季嘅menu，有些人嘅taste 唔需要懷疑同擔心，即刻少少地，兩個人食一局。 大公館小碟前菜三款，靚到無朋友，玫瑰蜜餞燒雲腿、鮮花椒慢煮蟶子皇、淮山合桃山渣盒。法國玫瑰蜜的雲腿，加上整得靚靚的饃饃包，山渣皮造型嘅小手袋，入面包住合桃加上淮山蓉，下面放上一片勁清新的淮山，不過最愛還以萵荀片包住強烈花椒調味的蟶子皇。 呢個花膠小青柑燉水鴨湯，非常特別，佢個小青柑都食得，因為包住好大件豬肉同水鴨，仲要有好大塊花膠一齊燩，個湯好好飲好出色，成隻小青柑都食得，正。 外形滿分的百花羊肚菌炒龍蝦球，最出色唔係炒龍蝦球，雖然溫度同質感都高質，但羊肚菌釀上墨魚膠配龍蝦又係一個唔錯嘅配搭。 是晚最愛的一定係龍井煙燻脆皮白鱈魚，鱈魚用上龍井茶葉鍊油後再去醃製過，之後再配上炸龍井茶葉同炸珍珠葉，件白鱈魚嘅質感極佳，應該無人不愛。 金勾魚湯玉銀環用上大虎蝦乾在上面，夾係件日本大根蘿蔔上，入面有菠菜苗同魚湯，好睇得來又好食。 單尾主食係鳥巢鵪鶉蛋鹵肉拌手工麵，用上炸茶樹菇、仲有用鹵水醃過的流心鵪鶉蛋，加上台式鹵肉拌淮山麵，只可惜係個淮山麵太細碟，如果唔係咁精美，應該會更吸。 甜品我較愛含雪燕骨膠原又養顏的雪燕牛油果燉牛乳，金沙冬蓉手袋酥係勁靚，酥皮搓成手袋形狀，想起全盛時期的8，酥皮內有冬瓜蓉加鹹蛋黃。 大家睇完有興趣真係要試下，天天供應，不過星期一至星期四仲有個特別優惠價，想知再同你講多啲。 大公館 地址: 荔枝角長義街9號D2 Place 1期10樓A號舖

香港四大名雞，Louise/Neighborhood/Batard/Belon，間間都有自己嘅粉絲，你睇完我嘅排位都知道，我最鍾意一定係Louise，你又有冇preference ? 近期好多朋友都推介我食Cafe Bau嘅平原雞，講到非常出名嘅平原雞，好多人都有好多意見，之前都係飲食界嘅朋友茶餘飯後嘅話題。 皮薄而肉質較為彈牙，皮下脂肪少，鷄香味濃郁，係佢嘅特質，Cafe Bau呢度菜式用上呢個討論度咁高嘅主角，又有冇令人失望？ 上星期同一班朋友嚟咗晚飯，終於食咗呢個名物，我之前冇試過米芝蓮中餐廳嘅平原雞，我唔知道究竟個質素係乜，但至少呢晚係Cafe Bau食嘅唔算失準，唯一投訴嘅係點解咁少飯。 可能佢用上二澳米，個飯實在幾精彩，自然覺得唔夠大份。 如果計埋Cafe Bau共五強，你最鍾意又係邊間呢？ 下篇文再同大家講吓除咗雞之外有咩好食。

曾經好喜歡西環嘅娘惹嫁到，到而家佢搬咗去上環，都一直跟住師傅去食，反而九龍就一直唔多食到正宗的娘惹味道。 朋友介紹我旺角有間叫鐵飯碗，聽個名完全唔似食馬來西亞嘢，原來佢嘅譯音Tiffin同馬來西亞好有關係，呢到唔學術唔講咁多，總之呢個名原來係食正宗娘惹菜嘅一間餐廳 旺角嘅鬧市正宗，仲要係一間好大好有空間嘅餐廳，最重要係價錢唔貴，又幾好食，食完一次立刻想再去。 Call幾個人先到多啲野，食個囉雜先，呢個地道馬來西亞蝦醬蔬果沙律，用上嘅生果同醬汁，你已經感受到其正宗。 秘製沙嗲烤雞串，有種勁正嘅甜味沙嗲，撈飯應該好好，我加落去蕉葉椰漿飯炸雞槌到食，汁都撈埋，而且佢嘅炸雞絕對正宗，椰漿飯撈花生同魚仔特別好食。 未試過鐵飯碗砂煲伊麵，原來都係一個幾正宗嘅選擇，至少我未試過呢個感覺嘅伊麵，下次有機會去馬來西亞要再試吓。 鮮果油條蝦嘅蝦多士炸得唔錯，我唔知係唔係正宗，但又幾好食，幾特別，比起中式嘅蝦多士冇咁油膩。 我熱愛呢度嘅正宗檳城炒貴刁，喜歡佢有豬油，仲有馬來西亞嘅臘腸，炒嘅鑊氣都好夠。 班蘭咖央厚多士同馬來西亞榴槤咖央厚多士就看中唔中你口味，我個人覺得榴槤咖央厚多士熱辣辣幾好，不過多啲榴槤應該會更精彩，班蘭咖央厚多士當天味道就唔夠熱。 菜方面食左三個，馬來風光炒通菜當然要食，怡保炒芽菜的確食到肥仔芽菜嘅感覺，不過最出色係白灼秋葵配參巴醬，好辣又惹味。 試左幾個飲品，怡保白咖啡同斑蘭咖啡都係正常發揮，朋友的美祿都話好濃味，不過最好係like Facebook 就有薏米水送。 仲要有好多菜式，例如咖喱，怡保河粉等等都未食過，有冇興趣一齊再嚟掃餐牌？

中環嘅餐廳應該多不勝數，就如銀河星宿，宇宙間來去自如，來往如驛。

選一間好啲嘅地方食扒或者食Fine dining，應該就與舉頭望天一樣，有難度，但並非不可做到。

選一間farewell餐廳，可能更難，因為係會給人記一輩子的回憶。

幸好這次的回憶不錯，選了一間好傾偈的餐廳，服務又好，食物都水準甚高，這間是在大館附近的
La Parrilla steakhouse。

未叫嘢都已經有前菜俾我哋，佢哋自家製嘅麵包都做得唔錯。前菜有是日精選湯，牛肉他他，芝士再加上沙律，基本上應有盡有，我選擇咗湯，朋友選擇咗熱溶芝士，全部都俾到你合理嘅預期值。由於今晚好早晚飯，所以我自己冇叫到扒，叫左Entrana sandwich，thin skirt呢個部位都算唔錯，肉味幾濃，簡單加上蕃茄同蔬菜嘅Baguette，絕對係一個精美有餘嘅午餐。我極力推介C小姐食butchers cut，不過最後佢話驚食唔晒，選了carbs De Res嘅Hanger steak，不過佢比較喜歡熟，所以選了medium well，而且又唔會過熟，炭香一流，呢個係絕對出色的一個扒，我覺得勝過上次Hugo的出品。Side點了湯同薯條，全部都好唔差，唔會虎頭蛇尾。可惜時間唔夠充裕，因為工作嘅關係都係匆匆來去，雖然唔係好長時間，但係都講咗好多其他工作以外嘅嘢，farewell嘅意義，可能都只是儀式感，因為未來不是不見，只是告別的儀式，或者未來才有機會再見。
又或者，對這個地方對這裏的人物都是短暫的告別，祝你和你們都一切安好。

上環嘅呢條摩羅上街係其中一條我好鍾意嘅街道，呢度除咗勁有特色之外，仲有好多好食又有特色嘅食肆，剛剛最紅有好想去嘅Fine dining 米芝蓮一星嘅Mora，之前如果你記得我介紹個地道嘅華樂冰室，今日介紹返呢間仟穆。

除咗自己選擇想食乜嘢串燒之外，當然最好係揀一個廚師發辦嘅菜單，喜歡重口味食內臟嘅一定要選三黃雞內臟燒廚師發辦菜單，另外廚師發辦九式串燒菜單就食啲皆大歡喜人人啱嘅串燒。先上場嘅日式沙律嘅同酒煮蜆就大概感受到餐廳嘅質素，特別喜歡酒煮蜆嘅新鮮度，當然如果你唔食餐都有得單點。當晚食廚師發辦九式串燒菜單嘅有雞胸軟骨、雞皮、雞翼、雞腎、白鱔、蘆筍、牛脷、雞心、五花腩。


雞翼絕對係神級嘅出色，佢嘅燒白鱔比起好多出名嘅日式串燒店更加出色，而最重要係嘅佢嘅味道啱啱好，唔會太重味太鹹。
三黃雞內臟燒有特別嘅係雞喉嚨、雞大動脈、雞掌心、橫膈膜、雞肝、甲狀腺，係Yardbird都食到好多呢啲部位嘅串燒，但好多都要預訂，而質素同味道都真係差唔遠，個人特別喜歡雞掌心同甲狀腺，我記得好似唔係好多餐廳有呢個選擇。

尾聲嘅雞湯烏冬先係重點，食完真係唔夠喉，個雞湯嘅濃郁同溫度幾令人難以忘懷。甜品就正常啦。餐廳員工都非常有禮貌，同佢哋傾吓偈仲會請你飲杯sake，唯一我覺得唔好嘅就係我坐係門口嘅位置冷氣太勁，影完相啲串燒相對較為快凍，餐廳可以留意一下。

有一排冇講過中環嘅餐廳，不如又講下一間新開幾好嘅中菜。[IMG:54]
有朋友推介過呢間木子園，地點非常方便，就正正喺中環核心，平日嘅lunch set好多朋友都讚，不過最多人推嘅竟然係呢個週末嘅兩小時任食半自助餐。
[IMG:51]


首先有幾個冷盤前菜俾你熱身，紹興酒糟醉雞，食到停唔到口，另外仲有鴨胸沙律，陳醋青瓜拌雲耳，再加好好食嘅四喜烤麩。[IMG:52]
之後有大量嘅點心俾你揀，珍寶蝦餃王同蟹籽燒賣自然係必然嘅選擇，個人好喜歡魚肚四寶雞扎，仲有好多點心例如鳳爪，灌湯小籠包，紅油抄手，蘿蔔糕等等，另外仲有好多包點如奶黃流沙包、紫薯包、叉燒焗餐包同馬拉糕。








湯品方面我好鍾意佢嘅酸辣湯同蟹肉粟米羹，不過好易飽，唔大食嘅唔好亂飲太多，因為後面先至係重點。


最緊要嘅係北京填鴨任食，你絕對冇聽錯，仲要係熱辣辣喺你面前即切即食，你以為好似酒店自助餐嗰啲片皮鴨咁凍冰冰又求其，絕對不是，呢隻片皮鴨絕對係非常有質素，基本上每個客都食幾round，不能錯過。










另外一個重點就係食點心以外，每人有一個主菜，黑松露蘆筍炒帶子、水煮牛肉/魚、孜然羊肋排、櫻花蝦海鮮炒飯、酸菜魚片、茶樹菇上湯小材料、上海粗炒、菠蘿咕嚕肉、乾煸四季豆、霸王辣子雞、宮保雞丁，仲有鹹蛋蝦球任你選，我哋今日都算多人試咗好幾個菜式，個人最推水煮魚，基本上係平時一大份嘅a la carte份量，你絕對食得出佢嘅火候。




另外朋友點嘅鹹蛋蝦球都幾好，孜然羊肋排好有深圳嘅那種地道味覺，還有宮保雞丁都好好送飯，只不過實在太飽，食唔到好多嘢，食完呢度都幾有興趣試吓呢度嘅晚餐。



去到甜品已經投降，大家share咗個楊枝甘露同埋蛋白杏仁茶，都係幾好嘅結尾，最好都預留少少位食個甜品。


如果你星期日都鍾意食brunch飲酒，加$188 任飲汽水，果汁，支裝啤酒，意大利氣泡酒，紅/白酒，烈酒，最緊要有唔錯嘅house 紅/白酒，送主菜一流。

聽講呢個brunch都開始咗冇幾耐，未算好多宣傳，遲啲多人知嘅話應該都會幾受歡迎，有興趣快啲先睹為快。[IMG:53]

今年嘅米芝蓮其中一個推介係大家都好熟悉嘅生記飯店，好多人都奇怪，點解佢會重新上榜，原因佢搬咗舖之後，米芝蓮就當新店處理，位置就喺大家應該都好熟悉嘅三湘大廈。
新店比舊店大好多，有勁多房，幸好有朋友識人，攞咗一間細房，比以前舊店更加舒適，當然地點上可能冇咁方便，但係我又覺得其實交通都四通八達，唔難去唔難搵。 當日太過輕敵，冇諗過七點幾蝦多士都已經賣晒，不過幸好都有其他精彩菜式，大家去食飯記得要預留。 冇食幾年，當然最掛住佢嘅上湯枸杞浸厚切豬膶，比起漢發麵家我覺得佢嘅豬膶做得較為高貴，而且個湯加上豆苗後特別鮮甜。
第二個菜式一定係掛住佢嘅家傳手藝生煎蓮藕餅，呢個係絕對出色，基本上完全冇失色冇退步。 燒味又係出色，同附近嘅喜萬年各有特色，我都幾鍾意佢哋叉燒，乳豬同古法鹽焗雞，後者嘅脆皮，尤其出色，叉燒係半肥瘦嘅感覺，好得。 好多人都話佢嘅咕嚕肉好出色，可能之前食革新會個咕嚕肉太強，呢個冇上次咁好嘅經驗，但係如果你唔係非常高要求呢個絕對合格有餘。 另外佢嘅柚皮都係傳統嘅手藝，同好多間城中出色嘅中菜同樣做得好好，仲有杏汁白肺湯都係傳統嘅好野。 不過最出色嘅係佢嘅砂鍋菜式，食咗個砂鍋菜煲已經感受到佢嘅厲害，最推介嘅係佢嘅砂鍋鮑魚雞粒焗飯，食到好飽驚我哋都食咗幾碗，一定一定要試。 喜歡加多個椒鹽魷魚鬚同甜品白糖糕，都係當天favorite 。 最重要食咗咁多嘢都係幾舊水一位，又坐得舒適，幾日後推薦左朋友食都好鐘意，絕對係同朋友聚下食飯嘅選擇。

之前介紹左間好出名嘅任食，未必好多人好呢一類咁暴力嘅選擇，想食精啲嘅，今日就可以睇下食物質素高d嘅火鍋店啦。大公館你一定聽講過，原來佢都有火鍋，名為大公館手工火鍋別館。無諗過佢哋嘅質素都幾出色，先講個湯底，選了兩種湯底，花膠雞湯絕對有城中個間以花膠雞知名嘅連鎖火鍋咁出色，朋友們差唔多飲左大半先捨得加湯，不過我最愛佢嘅另一中國式麻辣，個種牛油香，絕對有成都嘅原本風味。特別要講下佢叫得手工火鍋，好多野都係自家制造，招牌四寶丸同鮑魚雞粒餃食完都會有深刻印象本地新鮮牛肉同牛頸脊當然無得輸，同平時出名食牛嘅火鍋店有過之而無不及，個人喜愛牛頸脊多好多，牛味太濃郁。有朋友不吃牛，選了來自日本嘅薩摩和牛翼板肉，那種可愛攞設令我想起寬巷子，呢度價錢也相對平好多。西班牙黑毛豬腩片都不錯，係非牛人士好選擇。西班牙黑毛豬午餐肉炸得都幾好，就咁食同火鍋湯好嘅洗禮，都有各自嘅特色。相信呢到嘅海鮮新鮮好出色，我未食過咁好食嘅白鱔片，另外日本刺身級嘅帶子都令人回味。

就算普通的食材如新鮮紫淮山，千層枝竹同順德魚麵都幾好，特別係千層枝竹，好吸湯。甜品就勁打卡，完全顯示到佢嘅手工特色風格，甜心都做得幾有心，和牛雪葩同流心南瓜球，前者特別靚，不過有人喜歡有人覺得甜，我自己就幾鐘意，主調係士多啤梨，應該你無乜諗過，南瓜球就同好多星級點心甜品一樣咁好。可惜個晚去到，客人唔多，下星期好似又凍番，可以考慮下再去食番晚。