雖然天氣好熱，就係因為呢啲熱辣辣嘅天氣先想同另一半啤啤佢。咁啱經過呢間串燒店，就入去試下啦，唔好見佢地方細細，但食物既種類都幾多。最後叫左呢幾樣野食 羊架：熟既程度岩岩好，咬落好juice，一啲都唔靭，鐘意食羊既朋友可以試下。 小龍蝦：炒得非常惹味，好岩用黎送啤酒，越食越辣但同時越食越上癮，惹味到連底下配嘅青瓜同蓮藕都俾我地清埋。 蟶子：個size 好大隻 好抵食，唔好燒得太熟。100分 啤酒🍻既種類都有好多牌子可以揀，絕對加分。 花甲粉：比想像中既份量多，本身好肚餓就岩哂，食落小小辣啱曬我口味。 而其他肉類同海鮮類串燒亦都燒得啱啱好，唔會燒到燶曬同乾爭爭。可惜得兩個人食叫唔到太多，下次我地會再返去試其他未試嘅串燒😋

入左將軍澳探朋友，2人小聚想叫餸食飯，下由朋友帶路，去左呢間「大灰熊廚房」。一入餐廳，就見到兩隻獨木舟掛左係牆上面。坐低睇menu, 原來有獨木舟租借連餐飲sets. 下次約埋朋友玩獨木舟可以預約下，玩完上岸仲有飯食☺️ 餐廳唔算大面積，一張大圓枱，另外附設卡座～ 格局比較清靜，傾計會好舒服。 我地最後簡左2人套餐，有小菜2款，（選擇有好多）湯，飯同餐飲。 ▫️拔絲咕嚕肉 ：出品好靚，咕嚕肉斬得剛好一口蘇咁，好易食，酸甜度夠哂balance ~ 最欣賞係連青椒同菠蘿都切到細細塊，作為女士既我，特別易吃～ ▫️小炒皇 ： 賣相靚到呢😍😍 真心好耐無食過似樣既小炒皇了～～ 蝦球超爽口～～ ▫️西湖牛肉湯 作為主菜前湯飲，味道唔會太濃👍 牛肉碎適中～

鬼金捧 天氣轉熱之後都有一排無食拉麵～ 今日唔知點解突然好想食。記得之前經過金馬倫道有一間拉麵店，好快就搵到。當時下午一點鐘，無咩客，不過到我地碗麵到時，開始坐滿。 開放廚房一眼睇到，店內燈光比較暗，不過加埋祭典音樂，在望望牆上掛門「魔鬼頭」感覺又幾激昂。 QR code 落單的確幾方便，仲有紙圍裙供應。menu 好簡單，都係叉燒拉麵，同埋以辣為主。 價錢亦是合理範圍。 當中仲有芫茜拉麵😄 我同另一伴分別點了「味玉麻辣麵豉拉麵」同「增量叉燒拉麵」，增量款既叉燒有兩大塊，而且超厚。 湯底唔錯，落單時可以簡大中小辣或者唔辣。拉麵質感亦係我鐘意既粗圓身拉麵，口感好煙靭😋叉燒唔係簿簿一片片既，係類肉豚角煮（東坡肉）咁，肥美之餘又唔會食到成口油～～ 半熟玉子好夠味，如果唔夠仲可以追加～

祝大家人日快樂～～ 限聚令下～索性留在家同屋企人渡過「人日」～我特登去左K11 買左個彩色繽紛既蛋糕返屋企同屋企人一齊慶祝大家的生日🎂 店員提醒，要盡快拎返屋企放係雪櫃～ 點解會簡個七色彩虹蛋糕？因為覺得彩虹🌈係開心快樂既寓意，希望人人疫情快走、咁就真係好似見到彩虹咁開心😃 今次簡左呢個名為「Rainbow at Dawn 」既美美粉紅蛋糕🍰 士多啤梨牛油蛋糕，入面放左乳酪mousse, 比一般蛋糕既Mousse 醬滑，用黃桃同果茸做夾心～酸酸的，不過口味非常清新～ 岩哂唔食甜既媽咪。

支持小店 ｜健康 ｜營養 ｜有機 ｜健身 ______________________________ 集合膳食+健身 的 餐廳（健身中心暫時關閉直到政府放寬） 餐廳以Cafe 同健康餐單為主，裝修簡潔得黎又夠Chill~ Open kitchen 的設計下，就足以證明餐廳對自己的信心有多大。 原來一份看似簡單的沙律，已經有哂均衞既營養～ 就算是麵包也是堅持選用 #手工酸種麵包🥯 營養豐富之餘，絕無人造添加物。 烹煮方面，亦堅持少鹽少油，但不失香咪，再配合自家製健康醬汁調味～ ▫️三文魚扒五穀酸種包 ▫️青醬堅果蝦仁長通粉 ▫️甜椒粉磨菇雞肉長通粉 *套餐：脫脂奶甘荀薑湯/紅菜頭乳酪水果沙律 💬總結：經過幾日大魚大肉，每日都覺得好攰，但今日食完呢份健康餐，估唔到成個人好似叉足電咁😎

呢間居酒屋木系裝修超靚，入到去好有溫暖感～ 餐廳仲有每日活魚直送～想食活魚刺身既朋友，千祈唔好錯過。 屯馬線開通後，我多左出沒九龍城一帶～超方便😻 先叫左客▫️雜錦刺身沙律🥗 魚生好鮮，沙律汁調較得唔錯～佢為第一道refreshment 係唔錯既～ ▫️蟹粉豆腐 呢個要推介～好香好香既蟹味，食落聞到蟹殼香（估計是蟹殼煲湯再用Dashi 煮汁）（錯左唔好鬧我，我估架咋😹）配 ▫️鵝肝壽司 又係最愛，真心好想order 多一份。幾欣賞佢地既醋飯，溫度keep得唔錯👍 之後就叫左幾客串燒！其中一款係店員推薦！真心未食過～就係用鳳爪掌心（肉球）的串燒😍😍 口感好似食雞軟骨咁～用汁燒處理。（唔知下次可唔可以試下鹽燒呢？） 青椒仔夾埋木魚花一齊食，真係想叫返杯啤酒飲（可惜今晚要做柴可夫） 厚燒牛舌同鹽燒雞翼亦係水準之上。最後最後～ 當然係海膽蟹肉炒飯😻😻 記得要撈勻哂海膽先食呀～ 餐廳位唔多，但椅桌之間好闊落，坐得好舒服。另外見到有一間private room (目測坐到6-8位）

呢間容記小菜王，係太子道西近大角咀，平時行經見到大大間，見到係米芝蓮推薦餐廳，一早已經bookmark 左。今日就同男友來吃。 門面超大，遠距離已經望到～ 屋企平時少煲湯，見一盅湯都係$48～ 日淮山杞子燉螺頭湯：清甜，熱辣辣，非常足料～瘦肉都比幾多下😍 龍躉花甲煲$238：好嘢味，夠香，有鮮甜既花甲～價錢有呢個水準同味道，真係要比多個Good! 鐘意食魚頭既我，食到停唔到口😋 海鮮濃湯雜菜煲$108 ： 有小元貝、珊瑚蚌、蝦。擺左好耐都仲熱。蔬菜都好新鮮。 成餐飯由叫人落單到上菜，都好順暢～ 唔需要等太耐。

行經旺角，見到呢間地庫的韓國燒肉店，一直以為得尖沙咀先有。見午市套餐都幾抵食，就去左幫襯。 今日係平日，餐廳客人唔算多，不過餐廳就好大。 見到午市都有人食燒肉。不過我同男友決定叫套餐客飯。 午市套餐都會跟前菜，佢地既泡菜都幾辣下。但非常好食。 ▫️海鮮豆腐鍋 基本是我的最愛，好似每次食韓餐都會點一份。呢個餐跟飯，同汽水～ 豆腐鍋既湯好惹味！仲有蜆仔tim. ▫️石鍋烤牛肉 同樣是跟飯，另配汽水～ 烤牛肉既汁撈飯一流～

香港其實真係好多工廈餐廳都好有心做！平時都真係唔識去，多數都係朋友帶路。今晚我又非常好彩，仲要趕在6點無堂食前一晚食到。餐廳係工廈入面，走到最盡頭（第一次可能真係會行過龍） 事緣朋友火炭附近住，佢幫襯開呢間華耀冰室，食物同價錢抵外，就係餐廳充滿人情味～員工事頭都好有善。 本來其實打算食碟頭飯，竟然見到有一人前火鍋🍲仲要個價錢抵到喊…最平$59已經食到🥺🥺 配菜仲有生菜、金菇、冬菇、炸魚皮、南瓜、豆腐，再配米線/米粉/出前一丁。 真係益街坊價！ 我同朋友各叫左自己喜歡既湯底，麻辣同沙嗲～ 朋友就簡左滑雞，我就簡左豚肉～當然最後share食😛 另外今日lucky地，送左一客醬爆牛丸我地食～呢個牛丸真係超好味。 「特級豚肉」又係推薦，食落好滑，我地以為食緊魚，真係好想知啲豬肉係點整～ 雞件都幾多下。 總之呢餐真係超滿足之餘，埋單時都真係總諗緊：真係咁平？ 離開時，店員都會講「下次再來，bye bye」。 終於明白點解我朋友話成日來幫襯呢間冰室。😋

今日屋企有人生日，大家心血來潮話要食生蠔～呢間蠔灣早前已食過一次堂食📓除左堂食外，仲做埋送貨服務～ 無論堂食、外賣都一樣咁新鮮～ 今次既外賣生蠔🦪同海膽，屋企人讚不絕口😋😋 賣單都係$1300 ______________________________ 上網搵到呢間蠔吧可以叫外賣～多款時令生蠔，開埋比你返屋企慢慢嘆！仲有好多唔同產地既海鮮🦞加拿大海膽❤️ 西班牙紅蝦❤️ 今次叫左2打海膽，共4款，每款6隻～ 打開一刻屋企人都嘩左出來～排列得靚靚仔仔～用檸檬🍋擺位分辨邊款打邊款～ ▫️Tia Maraa: 食落脹卜卜就知幾飽滿～ 非常爽口～鮮甜味足😻 ▫️ lambert :礦物味十足，肉質結質～聞落仲好香 ▫️ la perle noire ：呢款黑形珠，果然是我最愛～味道清香礦物味十足～海水味濃👍 ▫️Gillardeau: 肉質彈性肥厚，食後味道能長留在口中～是最有層次味的一款。 ▫️加拿大海膽：味道濃厚，不用加半點醬油，建議加少少🤏海鹽在海膽面頭～風味更佳更鮮甜！ 估唔到2打生蠔送到黎屋企，都仲可以靚靚仔仔，真係可以拍得住酒店/Fine dining 質數✨ 日後係屋企開P或突然想食，都可以好方便🌟