明明早餐來來去去都係過啲嘢，但價錢就越嚟越貴，正經食返餐有時仲貴過食中午。無奈間中都想正經食，左睇右睇，都係依間早餐至抵！ 早餐冷熱同價都唔適合凍飲，牛乳炒滑蛋多又滑，牛油方包仲軟熟，但外賣好濕，用紙袋分開裝就好；生滾沙嗲牛無落粉都唔會硬，沙嗲味適中，一丁果然夠多，粉同油都留俾你落驚你唔信係真。 依個餐絕對飽肚，我估比市價平十蚊，如果午晚餐可以轉吓款，相信會更好幫襯。

今期新款興趣不大，都係食返啲經典嘢，遇到芝士火腿薄餅剛出爐，芝士果然濃厚，但薄皮就係冷藏質素，無口感；小食併盤越做越差，雞翼同薯格都好乾，腸仔變水煮，下次記得要落返下面食；西冷比之前紅，仍無紅水，口感更軟，醬汁又多，薯粒同小食一樣乾；三文魚柳同之前一樣，宜家附近海產類都唔適宜食，平平地係唯有食冷藏貨。

星期六，覆診難得出開去，本來想挑戰日本排隊店，點知App預約爆之餘，一開舖連網上攞飛都即爆，現場攞飛要等二百個，唯有轉場。唔想隨便食茶餐廳，但中午又真係無咩選擇，臨近生日難免想要特別體驗，聽聞依間出名多服務，就想試吓無預約會唔會都有生日安排。 講真因為出名排隊，而且價格唔平，所以一直無食過，亦唔知點預約，就算宜家已有多間分店，去到都預咗等，點知唔洗。帶位時指示出面自助小菜、生果及醬料吧免費，入座後熱毛巾，問要唔要加十五蚊任飲已講唔洗，但枱旁放咗一支水，一支檸茶，記得網上話等位期間已可自助享用小菜生果，亦會上檸茶，所以期間就照攞嚟飲。 跟枱職員一嚟放底iPad，建議輸入會員，這樣點菜模式會紀錄，有甚麼特別問題都會記底，以防日後再犯，而且只要簡單資料。這時問到生日安排，佢問想大搞定細搞，因為另一位今個月生日唔想，就決定細搞。雖然應該無關，第一個驚喜係午市套餐，之前睇過週六係無嘅，但佢話依啲要睇情況，確實依個鐘數仲有空枱。當日張傳單非常皺，但內容同網上睇過同其他分店嘅一樣，本來以為要一人一個餐正煩惱，佢就話三個太多，叫住兩個先攞。點了手切牛小排同精品肥牛兩個餐，拼盤選D，E，主食兩份都撈麵，協助下選了清油麻辣（小辣）同大骨湯。可能依間較新，網上搵唔到佢個張午市套餐，但見另外兩間都一樣，可以見到有寫明自助生果小菜免費，再下面細字有自選調料$18/位，活動須知更有不包含鍋底調料飲品，除假日、六、日不供應外，就算之前上網睇過好多細節都無留意，而當時亦有出入。 上菜好快，落完單上了碟小菜，就係自助吧內容，出去補一碟，發現部十秒機挑戰玩完，除咗之前講過會後上嘅撈麵，其他都接近到齊，牆上亦貼上生日快樂同氣球。出品實物同圖分別唔大，新鮮，精品肥牛無特別，係手切牛小排比較吸引，色澤同油花都美，手切必有嘅問題係厚，但佢厚得嚟煮熟唔會硬，無釀肉粉味。 講返十秒機挑戰，要留意到先有，出去攞小菜時見到有部機，一開始以為係顯示等候時間之類，見我地望旁邊職員先講解玩法，我明明聽到佢話按一下放手，再按一下就停，點知事實係前面要按多下歸零先，所以第一次當然吹了，之後佢只話唔緊要再玩多次，這次差少少，本來都算了，之前先得閒玩多次，中了！但職員先講每枱只可玩兩次，要我地問跟枱職員有無，事後睇機面真係有貼到，但之前只留意店員講解無睇到，十秒奬品係免一個菜，但我地食套餐自然無，最終送了火鍋湯底料，選了清油麻辣，之後開食發覺都幾辣，返到可以分兩次用。 https://youtu.be/LuJPiFMD7SY 撈麵表演，嚟到必睇，雖然隔離左右表演都睇咗幾次，表演完突然用國語問要幼定寬，實時理解唔到，選了幼後佢又講廣東話，無奈。幼就係將麵條撕開一半，放落鍋後五分鐘食得，質感係唔錯，仲好吸汁。 期間有四、五枱都有生日慶祝，一直唔知幾時到我地，食得差唔多就送上果盤，話我哋想低調，就簡單拿了紙版同果盤俾我地影相吹蠟燭，再有長壽麵，應該係撈麵寬版再加隻蛋，好難夾同口感好差。明明三人食兩人餐，但當時已覺飽，下過意頭野都努力食，同切得有啲心意嘅果盤，後來再上了葵瓜子同薄荷糖，坐咗都有三頭鐘，期間都保持加水倒水。 整體體驗唔錯，就連廁所都如傳聞中設備足，只係我用過隔剛好較污，依啲都無問題，到俾錢時覺得價錢奇怪，所以先上網作了上面嘅了解。首先一開始擔心嘅湯底收費無，但價錢點嚟？原來除兩個餐收費，還收了調料、飲品同加一，但可能兩個餐，只收了兩位，雖然收費有啲奇怪，感覺間間唔同，但都係出面火鍋店會有嘅收費，只係同一開始講解有出入，不過結果應該係比另外兩間平，雖然見唔到Gel服務。而禮物上其實正常每枱都會有，只係用甚麼方法同送甚麼，都係開心嘅。

時間未到，人已到，因為原本計劃行程去唔到，本來以為過唔到嚟，仲通知店家如需提早關門通知便可，見一直無回覆，叫人都到咗，就試吓，好在附近環境尚算正常，好多人真係行街，總算放心。 約咗晚市開門時間，為免企門口所以行到夠晒鐘先到，已有一枱入座，被安排到角落落地玻璃位，外面聲音入哂嚟，背景音樂又大，不太舒適。坐低職員放低餐牌，轉頭就回來落單，因為餐牌從未改過，一早睇定可以即時落到，兩份Set Dinner。 是日餐湯，洋蔥湯及包，一上湯已見大量洋蔥，但飲落係牛骨粉定濃縮牛骨湯膽？同越式湯底味道一樣，係無油面，洋蔥有少炒過，見到少許燶位，但明顯連金黃都未到，更唔好話最佳甜度，之後蒸煮加入，湯入唔到味，變咗食煮洋蔥。餐包扁平，法包脆皮，內質筋性，微暖，口感唔錯，但湯太差，做唔到提升。 頭盤，半熟吞拿魚伴三文魚子，半熟吞拿魚有用煙燻處理，望落中間雖然紅，但咬落質感已改變，少帶韌性，微微煙燻味帶有鹹香，味道剛好，三文魚子帶有鹹鯹，配上淡味芥末醬，去除到鯹味。 主菜之一美國頂級西冷牛扒12安士，叫了七成熟，感覺似八成，但厚身牛扒不易處理，火候很平均，切開有少少血水，之後是深色的肉汁 ，質感軟熟，容易切，入口牛味濃無脂肪感，本身醬汁扁濃，但倒到扒上連同留出嘅汁，味道剛好。烤蒜如傳聞般出色，每粒蒜都軟熟，沒了特有怕被人聞到嘅味道，烤到一切爆汁嘅原串蕃茄仔甜度完全帶出，但原串無法原粒入口，一粒粒更方便。年幼得入面豆都未成形嘅四季豆？口感脆脆的，每樣都發輝到作用。 主菜之二美式燒烤醬豬助骨配薯條，火箭菜沙律，望落好深色，擔心會太濃味，原來唔會，醬只在表面，無入味，味道遍淡，食到豬肉原味。切先係最難，佢肉多，肉質亦好，所以唔會好似食開嗰啲一切就得，要用佢俾過把扒刀先切得到，枱面個把全無反應，而且切時太大動作，連薯條上嘅鹽都飛起哂，氣管受刺激，想飲水，但只有收費的支裝礦泉水，果然不能期望有暖水。薯條炸得夠脆，如上面所講已無鹽味，點茄醬都唔錯。火箭菜直食帶苦味，連同肉食又另一感覺，非常合適。 是日甜品，奶凍，奶味幾香，滑，質感唔錯。見網上寫該月生日可獲贈自選甜品一客及寫上生日祝福語，預約時雖已通知要叫甜品先有，但原來跟餐甜品唔計，要單點，奶凍、蛋糕加雪糕球？放係一齊寫甚麼都難看吧？仲要食得落，最後放棄。 食物整體可以，半熟吞拿魚伴三文魚子最為驚喜，但作為頭盤味道遍濃，又無供應水清清口腔，可能你會講點解唔買礦泉水，相信好多人最近同我一樣氣管敏感，飲凍水會刺激氣管，礦泉水是硬水，效果可能更差。職員有認真服務，但唔自然，被安排在死角位，一開始附近無其他客，佢不停在兩柱間探出看進食情況，行為明顯得有壓力，相信亦無人西餐會食梗快。玻璃外見到來往的車，本身已沒風景可言，不停來往的警車同救護車更令人神經緊張，越坐越想快啲走！隔音成本高做唔到無辦法，建議裝上稀疏窗簾，午市有光可以透入來，晚市看不到行過的車，只有移動的燈光透入，音樂柔和啲會更舒服。一般餐廳職員會輕鬆走過，不經意地望餐桌情況，如果位置唔許可，裝CCTV都好過人肉CCTV，以茶記嚟講當然無問題，但以依個收費嚟講服務同環境都唔舒服，從來未試過有依種感覺。

當佢連餐牌個樣都麻麻，其實真係減低咗衝動。台式便當，台灣食都唔係間間好樣，記憶好深係傳統便當用紙盒裝睇唔到樣，豬扒便當用膠盒裝睇到樣，明明內容一樣，最多膠盒大少少，但見得人同唔見得人，價錢差幾十蚊（新台幣）。 價錢以晚市計可接受，一直想等佢出特價餐先試，但佢堅持到，炸物嘅香味一次又一次濃烈，相信都係主因。圖片只供參考真係參考，告訴你只有更差，沒有如果。即叫即炸嘅便當，滿心歡喜聞住香味返去開箱，天堂同地獄永遠係共存。 百芳豬扒便當，深色到奇績唔燶嘅炸豬扒，告訴我返炸過幾次，豬肉無豬味係必然，炸多幾次就做到肉乾，半隻鹵蛋唔入味，少量雜菜算常有配塔，醃菜得一款較重味，粟米同粉絲屬少見，粟米口感唔錯，粉絲辣辣地幾過癮，總份量都多。 香酥炸雞腿便當，配菜同份量都一樣，炸雞腿另裝，體型叫唔錯，但皮脆硬厚，肉還算可以，但唔多。 夜市花枝丸，做優惠買滿一百加十蚊？應該差唔多，炸得最出色，所謂嘅老蛋，成粒皺晒，好多年無食，台灣夜市就一定未見過。 餐飲三選一，阿薩姆紅茶同碳焙烏龍都無糖，雖然叫熱飲無稀釋會比較濃，但佢明顯係茶葉浸太耐。 如果你想感受或回味台灣風味，依間絕對會影響你印象。

一間出名甜品嘅餐廳，價位平時唔會食，有次下午茶，價位明明唔吸引，款式亦少，但叫未試過想試，仲偏偏叫主食。 茶餐自然跟茶，見佢寫熱茶或冰茶自然係餐牌‘茶’度選，但又話唔係，講咗幾隻茶，明明同茶類頭幾樣個名一模一樣，但又話唔同，要餐牌過啲要加錢。佢飲品好似都出名，但都係特飲姐，唔通跟餐有專用茶包，餐牌過隻勁啲？精神唔好，至今日都未了解到。 煙火腿粟米忌廉燴長通粉，明明心目中二選一，可能選咗隻最差，可能兩邊結果一樣，但依份嘢食一啖就反胃。醬濃，再加芝士薄片，原本滿心期待，但食落真係濃烈嘅忌廉，濃濃芝士自然吸引，但變咗忌廉，仲要濃到點醬梗，睇住五十幾蚊份上至強行食咗一半，返到去反胃咗成晚。 難食成梗，本來得出答案係我自己傻，係甜品主場食主食，加上當日精神唔好，甜品又無食過自然唔敢亂評，但命運讓我今日中咗推廣，無論如何都堅持係最後一日俾大家一次機會。 白菌煙腩肉鮮蛋意大利麵，簡稱卡邦尼，作為優惠尾關感覺最抵，始終點都要叫多樣，叫甜品感覺開心過叫野飲。首先份量明顯比下午茶少，之前用醬，今次用汁，味道其實一樣，只係比例平衡咗，但當附近幾枱都傳來同一隻味時，其實都幾反胃，睇嚟本身對佢依隻汁都係反感。但扁意粉值得一讚，雖然份量少，但口感同麥香，都有手工嘅感覺，相信唔太吸汁，但上汁係我食得落嘅主因。 食完主食到上甜品，見個場唔滿，廚房又無俾嘢出，預佢十五分鐘原來太少，等足半個鐘，期間先出得幾杯飲品，可能背後做咗好多野，表面嘅裝飾又要佢費心，但其實點都感受唔到美感。士多啤梨乳酪厚焗鬆餅配士多啤梨雪糕，首先果醬似手工，果肉亦多，甜味自然，糖漿淡淡其實存在不大，轉換唔到口味，鮮果帶甜，反而底下嘅淡乳酪加果乾碎酸到驚訝，唔搞梗多，就上面加啲果醬外加份糖漿其實仲好，至於主角厚焗鬆餅，係好棉密，但成舊濕濕地粘粘地，唔好同我講半熟，空氣感自然無，好多餅店嘅蛋白蛋糕都做得比佢好。 最近真係無咩精神寫嘢，但佢厲害天時地利人和，真係唔寫唔得，其實都好奇係多方面影響下都梗多人去食，但做優惠客都少咗仍係事實，唔怪得佢最近越嚟越多搞作。

尖沙咀中午搵食，好多都排隊，唔想行太遠又要搵間似樣，真係難！海港城入面，食到依間超貴。 薯條偏鹹，就算有兩隻醬亦好難平衡，漢堡用日式麵包非常軟熟，但欠缺口感，肉味又不足，咬落只有菜同芝士味。鐵板質素算可以，始終佢出名係日式甜品，忌廉包、吉士包，反而出名嘅價錢又合理，但食完主食就食唔落了。

依間鍋貼話八點關，但七點去已洗梗嘢，試過買返去食已硬哂。以為早收會早開，當佢早餐店今次一早去，但原來九點半先開，剛剛開舖，一次過買幾樣返去，睇吓質素會唔會好啲。 榨菜肉絲雞翼麵，有幾種麵，唔特別講就俾上海麵，粗切榨菜幾多，肉絲都見到，估唔到仲搭生菜，成碗麵不過不失。炸雞翼另上，兩隻偏細，但皮薄微脆，肉質滑，仲帶少許油，算唔錯。 炸豬扒，單點一嚟要兩件，本來見多人叫都有啲期望，可惜皮唔脆，肉充滿加工味。 炸韮菜餃，外表好似炸到好硬，但咬落又唔會，皮炸得透，脆感剛好，入面有韮菜同肉香，無入到油，比預期好。 生煎鍋貼，今次果然唔硬，皮微軟，厚薄適中，每一口都咬到肉。但食完上面炸餃後感覺比下了，當然炸餃就貴啲。 紅油抄手，當你以為佢啲餃全部好食，就錯啦！餃本身無問題，但點解有肉鬆？可能地方問題，但肉鬆同蒜一齊嘅味道真係好奇怪！成本係高咗，售價都多咗，但兩樣加起一齊就算浸湯都救唔返，完全浪費。 整體質素差都幾大，麵要飽肚無問題，質素較好有炸雞翼、炸韮菜餃同生煎鍋貼，但都唔到覺好食，堂食可能好啲，但過度唔適合慢慢食，難怪個個都走去食八方。

同集團兩間一齊開，但依間總覺無嘜客，但今個下午茶想食意粉，所以都無咩好考慮，但原來行入去空間好大，客都唔少，所以佢唔係無客，只係位多。 時間上其實都可以當晚餐，所以小食類都唔太考慮，但以下午茶嚟講佢種類真係幾多，就算係同集團嘅另一同樣品牌，起碼都差一倍。 餐飲定餐湯？二選一，餐湯基本紅白，紅係意大利菜湯，無肉，用碎肉機碎嘅菜比平時都碎，味同PizzaHut嘅完全一樣。 即磨咖啡，好香，味道特別，入口都幾滑，見佢枱面有介紹係自家配方。另外亦可選香滑奶茶，或加錢升級。 柚子蜜味芝麻烤雞翼，追加食物有好幾樣，見佢特別就試吓。味道普通，就係柚子蜜加芝麻，調得唔過火，肉質算滑，但外表好厚，脆得嚟硬，唔似烤出嚟嘅效果。 香辣欖油煙鴨胸炒天使麵，最快到主食，料幾多，唔太辣，天使麵正常口感，整體唔錯，大大隻碟感覺份量唔多，但其實好飽肚，當然主餐牌仲大份。 日式芝麻燒雞炒珍珠飯，珍珠飯好入味，滿滿燒汁同帶滑雞肉，芝麻面有裝飾作用，但整體無層次，好易覺飽。 意式鮮茄肉醬焗扁意粉，等得耐咗啲，望落都覺醬汁唔夠，成份主要係蕃茄，肉醬唔太見，亦唔係肉醬意粉味，係鮮茄意粉味，扁意粉比較吸味，但口感較軟。 整體上味道其實唔差，只可以話有待改善，始終你太差都講唔到差嘜，亦有可能佢用咗舊冰室嘅標準，感覺都係傳統上覺得香港人適合既做法，但近年新開嘅其實都唔會梗做啦！價錢合理，座位寬敞，算係食得過。

做咗成年五週年，午市爆丼五十蚊加一，雖然睇啲料好似幾多，但午餐嚟講唔算平，唔值得專程過去食。今次叫係順路，試吓實物係未真係大放送？ 飲品賣點係樂怡仙地，得佢有少許酒精，但其實雪櫃飲品啤酒以外任選一罐，一定係韓國果汁性價比高；沙津用紙碗裝，唔環保，份量只能說是伴碟，菜新鮮，芝麻醬都足。 蒲燒鰻魚、和牛、溫泉蛋盛丼，個名梗長，份量就唔多，仲話爆丼，梗細個碗都唔算爆呀？但一定夠飽，基本係一座飯山，加兩件鰻魚，四小塊牛肉片係面，仲要好似裝唔哂梗溫泉蛋又用多個紙碗，係未和牛就唔知，只知係烤肉，油脂唔多，軟熟度同醬汁味剛好，比普通烤肉好食，鰻魚用火槍燒過，中式彈牙口感，好多碎骨，整體味道都可以。 赤蝦刺身盛丼，好遲先到，但刺身丼個碗竟然同上面一樣，而且真係爆！隻蝦大大隻好吸引，其他見到色澤都知唔錯，依個丼就真係值。 精選甜品，可以選雪糕或意大利芝士蛋糕，明明選了蛋糕，但無論唔見前面幾隻字定後面幾隻字，都同現實有出入！應該叫朱古力奶凍，朱古力幾足。 整體其實都失望，首先十二點開門首枱入去，已聞到成陣醬汁味，望真原來枱上電磁爐附近都係醬汁漬！衛生令人擔心；主食味道唔錯，尤其刺身丼真係值，但等太耐，放飯嚟真係唔洗食！而刺身丼同熟食丼價錢相同之餘連份量都相同已少見，仲要熟食料係少啲真係唔明；明明出名甜品好食，但依個精選甜品真係收唔到貨；最後門口明明有貼WeChat Pay，但付款時話無，又話可以俾卡，但門口又寫明二百蚊以上先得，真係唔明！最後俾現金算。