成日話好少黎香港島哩邊，但機會總係接踵而來，今日又黎到灣仔喇，做完野又到午飯時間，我唔客氣了 再次喺附近，上次食過哩間嘅【巴東牛肉】，賣相係怪咗啲，但味道的確唔錯，就做返次回頭客啦 今日我嘅目標係【海南雞飯】～

上次黎【莎巴】係happy hour時段，望住菜譜，花多眼亂，樣樣都好好味咁，我用咗成個字先決定到食乜 今日黎到門口，見到set lunch有海南雞飯，真好彩，唔駛煩～ 我未到12點就入坐，入面唔係好多人，快快坐低落order先～【熱咖啡】一杯～

熱辣辣嘅一杯咖啡，附上牛奶一小杯，黃糖一包～咖啡味道冇乜特別，但還算濃郁，亦冇奇怪嘅苦澀味，比一般貨色要好嘅出品除非你有特殊喜好，如果唔係牛奶就唔駛加喇。糖我就成包落喇，落完都唔係點甜

差唔多同時上檯嘅係【mussel 忌簾湯】一碗，湯味還算鮮，冇局部鹹，質感整體適中，味道中規中矩，一碗湯居然有成8粒左右嘅mussel，都幾慷慨，不過都唔係咩新鮮貨 湯夠熱，飲落都算舒服～

湯飲到差唔多，主菜【跟餐版海南雞飯】就上檯了 份量對我哩個大男人黎講係比較少的，先試試啲油飯。。。雞油味幾香，比尖沙咀【好時沙爹】嘅出品要黎得香，食落味道都唔錯，食到有少少薑，但感覺淡咗少少，不過哩個只係一時間嘅感覺，因為一碟飯嘅味道係要睇整體加嘛 當我夾一件雞同啲飯一齊食嘅時候，居然會俾到我一種完全唔一樣嘅感覺。淨係食雞嘅話會覺得幾有雞味（講緊肉連皮一齊食嘅情況下），雖然唔係件件都滑，但味道唔錯，不過感覺上好似唔多夠油香。。。但兩者配合一齊食嘅時候，雞嘅味道就彌補咗飯唔夠味嘅問題，而飯嘅油香同時令啲雞油香起黎，好！食得好舒服，上上之作 順帶一提，雞嘅味道同口感同【好時沙爹】嘅出品頗為相似，雞味一樣地足夠（總覺得近年啲雞冇咩雞味，同20幾年前街市貨差得遠，唔通係宜家啲雞食得藥多），一樣唔係件件滑，唔通係海南雞嘅特色？ 付上嘅薑蓉味道偏淡，但同雞飯一齊食嘅話，佢適當咁增加咗整體層次感嘅同時，又唔會影響咗本來食落好舒服嘅感覺，唔加可惜 值得一提嘅係甜辣醬，係甜中帶辣，味道調得啱啱好，完全唔會過甜或者過辣，又或者有甜辣不相容嘅奇怪感覺，口感清醇，食落非常舒服，係我食過最好嘅甜辣醬 唔知係自家出品定係買返黎嘅呢

雞飯食完之後，侍應收走空碟，set lunch嘅甜品就隨即奉上。（服務唔錯）今日嘅甜品係【椰汁糕配椰絲】，清甜嫩滑嘅椰汁糕，配上懷疑用黃糖處理過嘅椰絲（比一般食到嘅白色椰絲要甜少少，自家製造？？？），一清一稍為甜，一滑一粗，粗中帶幼，層次分明，又一誠意之作 埋單，盛惠75加一，83蚊～以哩個套餐嘅高水準黎講的確物有所值 但以好似我咁嘅男人黎講就只有6成飽了，食完總覺得差咗啲乜咁（可能飲返杯水之後感覺會好啲。。。。。。啊，佢地冇俾到水我），所以我行咗出門口之後，我就繼續搵食了

有事要去民政處做宣誓，放工喺葵芳附近，住喺彩虹附近，就決定黎深水埗了 搞掂啲無奈野，心情放鬆了，5點幾，當然又係搵食時間啦，不如去維記食麵啦，平日哩個時間應該唔駛排隊。。。但突然靈光一閃，記起附近有間冇去過嘅拉麵鋪，即刻睇下記錄先。。。西九龍中心同一條街？實在太好了，就過去啦，過兩個街口就到喇，真方便（話就話方便，其實深水埗咁多舊樓，咁多大街小巷，西九前面條路咁闊都叫做【街】，唔熟哩邊迷路一啲都唔出奇 ）門口條黃色嘅banner非常搶眼，想miss咗間鋪都難，故意油成灰色嘅牆，配上啡色嘅窗框加上同色嘅盆栽位，粗糙有個人風格得黎感覺舒服隨意，幾特別吖~ 好切合混亂嘅主題呀 門口告示話晚市5點半開始，仲有15分鐘俾我周圍望 注意力俾掛喺門口哩張告示吸引咗過去，下面嗰行細字尤其重要【早上麵條已售完，感謝】。。。咁即係仲有晚市啦，在想如果係週末嘅話，會唔會日市嘅時候就已經賣曬晚市可以賣嘅麵呢，我好懷疑。。。平日黎就可以唔駛擔心太多喇～尤其係哩個時間都未有人排隊，就更令我放心喇 又一溫馨提示，我一項項咁睇，再睇返自己。。。。。。唔係講緊我，冇事，可以繼續等喇，但自認為唔適合嘅食友們就要有自知之明喇，因為我食完得出黎嘅結論係。。。。。最好係追加200克嘅麵，芽菜蒜蓉豬背脂都要加夠3倍分量咁先食得夠過癮！！！如果唔係只會換黎一臉無奈而已 咁當然哩個只係個人提議，每個人對食嘅追求都唔同，食量亦唔一樣，性格亦唔一樣，所以只係純屬參考，俾大家多一個想象方向而已～

仲有好多時間，我決定乖乖地企喺度門口等，影下相咁咪好，企咗陣之後，大概仲有5分鐘先正式營業，就有位服務員同我打招呼喇，安排我喺等候用座位坐低後，就俾咗張點菜紙我慢慢研究喇～第一次黎，就唔問今日嘅是日推介係咩喇，就玩5選1啦～雖然話係5選1，但基本上就係有冇芝士粉嘅分別，總覺得芝士味同啲豬背脂嘅味應該唔會好夾，排除咗芝士先～【全部入】都唔要，就好似食雜錦麵咁，好聽就包羅萬有，唔好聽就係連唔想食嘅都要食埋，何況咪一樣有芝士
宜家就係多肉同兩片肉嘅選擇喇。。。都未試過哩間啲叉燒好唔好食，好食嘅話，今次又食得滿意嘅話下次再講啦～宜家簡單喇，要唔要蛋？呵呵。。。。。。緊係要啦 就要【混亂玉子拉麵】啦，麵要粗嘅5mm，門口都寫得好清楚啦，唔鐘意粗麵嘅唔好入黎嘛，咁佢地一定對自己嘅粗麵好有信心架啦，幼麵係俾啲真係接受唔到粗麵嘅人食嘅姐～

上次去過另外一間食拉麵，食完覺得啲湯多咗少少，啲麵唔多夠，何況有食友話哩間啲湯偏濃嘛，就俾多15蚊加100克麵啦

然後就到唔駛額外加錢嘅配料喇～ 加就一定要加架喇，但加幾多先夠呢。第一次一下子唔好加到咁盡，話唔定人地一開始已經設定好重口味呢，保守少少好啲，就兩倍吧 芽菜一樣要保守啲，如果佢地煮爛咗啲芽菜，咁啲芽菜就會出曬水，啲湯咪會淡咗囉，1倍算喇，食唔曬咪又係浪費 哩間鋪嘅裝修好特別的，你話佢地隨便咩，其實又一啲都唔隨便，相中嘅箱係裝飾品唔係貨，你睇佢擺到幾整齊就知道，上面仲要用膠紙粘塊板上去，應該係用膠紙喺後面粘的，就睇佢唔似用釘，又唔擔心俾風吹落黎就知道我應該冇估錯。故意營造出黎嘅感覺都幾舒服嘅～門口位置有賣未煮嘅麵，等有興趣買返去自己煮嘅客有多一個選擇，至於煮唔住得出同堂食一樣嘅味就各下自理喇 我當然唔會有興趣啦，拉麵哩味野堂食咪好囉，食麵食裝修食氣氛嘛～

我填好份落單紙影咗幾張相之後就可以入坐喇，入面清一色係吧檯位，可以睇住廚師大大們煮麵嘅開放式設計已經可以話係傳統了，哩間咁闊落嘅店當然冇例外啦～檯面上放咗幾隻杯，對上仲有壺水添，倒杯飲下放鬆下先～筷子匙羹七味粉醋等等檯面上一樣都冇少，比較特別嘅係居然有條魚乾仔放咗喺啲隻醋入面，幾有創意吖，可惜嘅係我冇去試下加咗哩隻醋之後可以為碗麵嘅味道帶黎點嘅轉變，只因為碗麵我食得好滿意，埋頭苦幹嘅時候連哩啲調味料都完全忘記了 麵黎喇～都好大一碗啵，試下啲湯先，嗯，係偏味道偏濃帶酸嘅味噌豬骨湯，口味仲要偏向味噌鹹香的，鐘唔鐘意哩種味道真係見仁見智，有人鐘意豬骨湯，有人鐘意味噌湯，又好難話你既然用咗豬骨去熬湯，咁就理所當然咁話一定係要煮碗豬骨濃湯麵出黎嘅，碗湯同啲麵配合好食咪得囉。我食野一向憑感覺，覺得好就好，欣賞下人地想要嘅味道咪幾好～

兩大塊叉燒擺喺最上面，就先試下哩件肉吧，夾件試試，嗯。。。好滑啊，煮得好入味，調味啱啱好，帶住豬肉本身嘅甜味，食落非常地滿足，但脂肪含量好高，極其邪惡嘅一件肉呢～ 不過真係好好味，哩件肥豬肉，我食得好享受

食過啲肥膩野，食一啖芽菜清清佢先，芽菜放喺湯表面，好似冇煮過咁，就係食哩種新鮮清脆嘅感覺，食啖芽菜飲啖濃湯，配合起黎感覺其實幾得的

跟住一啖湯一啖芽菜嘅節奏，終於見到啲麵了，等我避開啲芽菜，試試啲麵先～嗯，口感中等偏軟嘅粗拉麵，同啲湯一齊食，味道少少偏濃，但食落好舒服，同時間夾啲芽菜，哩個配合其實好適中的 當然唔可以唔記得嗰啲邪惡之最嘅豬背脂啦，豬背脂就係一粒粒煮到好入味好軟嘅肥油，又滑又嫩，味道帶甜，同又香又鮮嘅湯，仲有清脆嘅芽菜都非常地配合，一啖麵，一啖豬背脂，真係邪惡倒極點呀！！！ 仲有嗰啲新鮮嘅蒜蓉，混入啲湯入面，真係香到不得了呀 太邪惡喇，太興奮喇～一邊食麵嘅同時我就順手將唯一一片紫菜壓落啲湯入面，當食到片紫菜嘅時候又係另外一種風味呢

隻半熟蛋嘅造型真係幾靚，有流心嘅感覺，蛋味都幾香，同少少湯配合咁食，本身較淡嘅雞蛋即時變得好夠味了

我跟住個節奏繼續埋頭苦幹，就好似之前所講咁，我對碗麵實在滿意，令我唔覺得有抬頭望下其他野嘅需要。。。嗰啲調味料就留返下次吧

美好嘅時間過得特別快，不知不覺就已經食完了，最後望住碗底仲有少少湯剩低，咁我當然飲埋佢啦，但亦代表仲有加多啲芽菜或者麵嘅空間，下次再決定加邊樣啦，不過我知道蒜蓉同豬背脂一定要加到盡，芽菜最起碼加到兩倍嘅分量，咁就真係過癮喇 今次因為唔想啲芝士味影響我對豬背脂嘅感覺果然有先見之明，下次再試下加咗芝士碗麺嘅味道又會變成點吧，不過到時候可能又會發現又加多啲芝士粉先夠味吧。。。。埋單啱啱100蚊，有食開日式拉麵嘅食友應該知道通街都係哩個價錢架喇，雖然始終覺得一碗麵賣成舊水一碗點都係有啲貴，但食得滿意總比食完冇feel好太多了

今日禮拜日深水埗食完午飯就想過黎九龍城食甜品喇，去完附近一間出曬名嘅西式餅店食咗一件45蚊嘅西餅之後仲未滿足，就走過黎哩間潮式糖水鋪試試味喇～ 一間咁出名嘅糖水鋪我都只係第一次黎真有啲懷疑自己係唔係香港人，不過唔緊要，今日就黎彌補一下哩個缺失啦～

時間尚早，入面人唔多，簡單明亮格局，感覺幾舒服，我就自動自覺咁坐低睇餐牌了，好多選擇咁啵，睇下先～

咦。。。。。。咦！價格好似唔係好街坊wo，最平嗰碗都要25，一般嘅都30左右，45都有，再貴啲都仲有，係真唔係呀，有壓力添 不過突然想食啲熱野沖喜下，想價錢，不如揀碗好野開心下好過啦。見到有【冰花綠豆清心丸】wo，未食過清心丸啵，有冇呀？事頭，冇清心丸呀。。。 失落咗一下，再揀，見到檯面嘅廣告，湯圓好似唔錯，我亦好中意就湯圓啦，跟咩好呢。。。。。。事頭！黎碗【馬蹄沙湯圓】吖，熱嘅！今次有喇～ 嘿嘿 喺屋企唔知點解就係唔想煮湯圓食，馬蹄沙就更加冇可能啦，下話～ 出黎食野食屋企煮唔到或者唔想煮嘅唔駛我講都知道係常識啦，普通野老婆會煮俾我食加嘛，駛鬼喺外面食呀！自己老婆永遠係最靚嘅！自己老婆煮嘅飯餸永遠係最好味嘅！唔駛講都知道係常識啦！

想完啲真理之後，我點嘅熱甜品就上檯喇～事頭幫我落單嘅時候老實講句，我真係對今餐完全冇期望的，眼睇餐牌，好似好精彩咁款，但每次見到咁多款咁複雜嘅，多數都只會帶黎失望，就好似冇幾耐之前喺灣仔【莎巴馬來西亞餐廳】飲過一杯叫【珍多椰汁冰】嘅飲品，淡而無味，只有微微椰汁香，食完濃野飲佢感覺上係好飲過水的。。。 但講返擺喺我面前嘅哩碗 馬蹄沙糖水，真係。。。食返啖先。 。 。 。 。先唔講味道。。。因為糖水入口俾我最強烈嘅衝擊唔係黎自味道（當然先感覺到嘅係溫度，但冇咩好講，因為好夠熱），而係。。。真係好真材實料呀！！！ 成啖糖水都包含住大分量煲到爛曬嘅馬蹄花，啱啱好嘅比例同口感！熱辣辣！甜味啱啱好，來自冰糖嘅清清甜甜的～～～ 真係冇得頂呀！！！每一啖都傳黎和諧溫暖嘅感覺，有種想合埋雙眼，好好感受嘅美妙心情～ 直情有想直接走過去俾雙倍貼士嘅興奮感覺！ 實在太好了～～～ 一碗馬蹄沙煲到哩個程度都已經冇咩進步空間了。。。。。。。。。（回味中） 回過神來，先發現嗰4粒大小若隱若現嘅湯圓，一直留喺哩邊等住我。。。宜家我先留意到哩碗糖水嘅造型真唯美～ 一片片的青絲漂浮在水面上，四塊白色的大石頭就隱隱約約散落在湖底那邊，石面上的點點灰色理所當然地成就了那份缺陷美，感覺有夠詩意的~~~ 就等我試下那池中石頭嘅味道吧。。。嗯，係一口一粒嘅size，皮唔會太薄，算係適中啦，芝麻味亦濃，亦夠香，唔會太甜，整體算唔錯架喇，但我個人比較中意西貢食街【甜源居】嘅【麻蓉湯圓】多啲
食到底先發現原來仲有好幾粒蓮子喺個底度wo，真係令我有啲驚喜，老闆都幾闊綽啵 蓮子已經認真去芯，所以食唔出苦味，當然有好好煮過嘅蓮子我唔可以仲要求佢仲有新鮮嘅甜味啦，煮得夠爛就得架喇～

本來覺得30蚊一碗好貴，宜家就真係真心咁覺得物有所值，非常滿意嘅一碗甜品，係難得的感動～感恩了

大坑，這地方的名字我是聽過的，知道是在銅鑼灣附近，但確實在什麼地方我就真的沒概念了。很久之前就很想來嘗嘗這家知名已久的分子雪糕專門店的出品了，所以知道今天要到香港的這邊來，前一天晚上就先做好功課了，但所謂的做好功課就只是上上網看看地圖而已。什麼什麼，都看地圖了，還說什麼看看地圖而已啊！其實沒來過這邊就只靠看地圖的食友們都應該心裡有數，從銅鑼灣Sogo那邊走過來，再走一小段，看地圖時就會很容易被那條天橋影響到，亂七八糟的路線一大堆。我之前又貪便宜，要了一個無限上網的便宜手機Plan，上網慢得要命，所以今天來這邊之前對這家店的位置還是迷迷糊糊的 不管了，都在銅鑼灣了，在Sogo那邊過了對面馬路，然後憑著感覺就走過去，天又黑黑的 還是那句，人品大爆發，我居然沒有迷路，看見一個小路牌說右邊過去就是大坑就往那邊走，然後在那邊的小路隨便一轉，啊，找到了。。。。

看著這個好像是餐牌的東西，2014好味回顧。。。。。。那今時今日的餐牌呢？走到收銀台那邊的類似餐牌的小板子也是寫一樣的東西。。。。。。問服務員不就好了嘛，煩惱什麼 服務員妹妹就跟我說這個就是今天的餐牌了，好，讓我看看有什麼吃的。。。不要笑我，當我看著【腐竹雞蛋糖水】的時候，我還真懷疑這個是什麼，今天走了超過7個鐘頭的路走到這裡，又是第一次來，我還真完全把什麼是分子雪糕給忘了，看著這個餐牌，整個人都矇了，哈哈哈哈。 好了好了，醒過來了，我來是想吃分子雪糕的，那些ABCD後面寫的是雪糕的味道，真是的，幸好沒有因為這個而去問服務員妹妹，要不然就真的要找個洞鑽進去了 再一次好了好了，都好像挺好吃的，【金之莎】就不要了，其他3個都好像不錯啊，選擇困難又犯了，第一次來，全部都想吃呢，自己一個人，又不好意思跟旁邊不認識的小姐說我們買不一樣的味道share吃，最後就將就一下買【焦糖海鹽牛奶脆脆】好了

看著店員，東搞搞西碰碰，''嘰''的一聲，刮刮刮，嗯，啊，好了，可以吃了 嘗嘗，嗯，很好吃啊 甜味剛剛好，不會太甜，焦糖牛奶的味道跟那些脆脆粒粒配合起來口味挺複雜的，脆脆粒粒放的很大方又不會太多，跟雪糕混在一起吃著吃著，一點都不覺得哪種放得太多了，真的是很有誠意很認真的作品，是我吃過最好的雪糕。雖然44元以一小杯雪糕來說價錢是高了點，但是還是值得的，當然如果便宜點就更好了

今日因為去文化中心聽音樂會所以黎咗尖沙咀，聽完6點幾，係時候食晚飯喇，之前去完【好時沙爹】出黎之後見到哩間鋪，感覺良好，幾有feel就想黎試下~ 上次見到間鋪嘅時候係夜晚，凈係記得個招牌好光好搶眼，但確實喺咩位就唔肯定了。唯有周圍搵啦，上網睇下資料顯示係喺麼地道，我又對尖沙咀唔熟，所以都搵咗陣，當然皇天不負有心人，終於俾我搵到喇，但我依然唔記得間鋪確實喺邊，如果下次再想去，睇黎又要再一次周圍搵了入去坐底，餐牌就喺眼前，為咗可以好好選擇就先order野飲先~ 有冇啤酒啊？冇啤酒賣wo，就只有白酒，仲要成枝賣，令我有少少失望添 因為間店俾我嘅感覺係好異國酒吧feel的，冇啤酒賣總覺得怪怪的，但想清楚一間新店，地方又唔大，又冇擺檯櫈出門口（可能唔俾），冇申請酒牌嘅可能性都幾高的(唔知香港賣酒嘅食店係咪一定要申請酒牌呢？印象中好多食店都有賣酒的）冇所謂，就俾罐可樂啦~ 再研究有咩食，有好多唔同嘅小食可以選擇，Seafood類嗰列大部分都係小食，先黎個今日餐湯【Fresh Oyster Soup】先~ 小食黎份【Crispy Soft Shell Crab】吧，等陣仲想去食甜品，再要份【Fiesta Seafood Pasta】應該就差唔多喇，啊，發現哩度冇甜品供應添 老闆提醒我，以我點嘅菜，我又得一個人，其實可以跟餐叫的。係咩？真係貼心喇~ 我第一次黎，唔係咁熟，就依你講嘅做啦，我負責俾錢就得架喇 

先上檯嘅係Pasta，放喺一塊砧板上面 哈哈，講笑講笑，似唔似食友們自己睇，買相唔錯，都幾有意思吖~ Spaghetti上面有三隻Mussel同兩隻蝦，旁邊仲有啲草呢，嘿嘿~ 試試意粉先，口感係偏硬嗰種，配上啲汁，感覺係唔錯的，老闆都知道每個人嘅口味唔一樣，所以已經擺咗枝Tabasco喺檯面，食客就可以依自己嘅喜好去調味喇~~~ 分量對我黎講就少咗啲了，但食物分量係依食店風格，食物整體賣相等等唔同因數決定的，所以我都好理解，想大份我就已經走咗去【意粉屋】了（其實意粉屋嘅分量對我黎講都係少咗啲）至於啲Mussel同蝦嘛，一食就知係冷藏貨，大細還可以接受，冇乜特別，以哩個價錢，哩個地區嘅快餐店黎講，唔係又細又霉嘅便宜貨就已經可以收貨了。跟住上檯嘅係軟殼蟹，哈哈，見到隻蟹我就不其然想笑，好可愛啊~~~ 一隻蟹仔坐咗喺個盒仔里面，後面仲有啲草添，好似坐得好舒服咁wo，咁我打唔打擾你好呢 因為跟餐叫嘅關係，所以只有一隻，單叫係有兩隻的（$36），唔知兩隻坐埋一齊會係點嘅呢，不過我個人比較容易熱氣，唔會一次過食咁多炸野，就要其他食家post上黎先有得睇了~ 隻蟹仔其實一啲都唔細的，大細啱啱好，所以當我同佢初次見面嘅時候會有想會心微笑嘅感覺。。。咬一咬，表面炸得脆脆的，蟹肚裡面又軟軟的，一啲都唔乾，又唔會太油，外脆內軟的炸得真係唔錯，口味屬於偏淡嗰隻，可以食到蟹本身嘅味道，個人覺得幾滿意，又正因為每個人口味唔同，所以檯上面嘅鹽同番茄醬已經隨時on duty了最後姍姍來遲嘅蠔湯終於出現了，親切的女老闆特意提醒碗湯好熱的，要小心啲飲，貼心嘅服務真令人覺得窩心喇~ 味道好香，夠濃，熱騰騰的（非常地），少少creamy，我之前未飲過蠔湯，生蠔就食唔少，唔知道蠔湯應該係咩味，亦想像唔出用蠔黎煮湯會係咩味，但味道又真係唔錯啵，如果檯面多枝胡椒粉就冇得頂了，不過我相信如果問佢地嘅話應該有的，始終張檯係快餐店形式，只係啱啱好咁大而已，所以檯面上我都睇唔到有食薯條用嘅Mustard~~~ 屬於前菜類嘅餐湯居然最後先到，但以另一個角度黎睇，哩碗湯，佢地係即叫即煮，煮完就上檯，真係誠意搭夠呀，從哩碗用紙盒裝住嘅湯，你可以睇到老闆對想開好間餐廳嘅熱誠，對入哩客人嘅真心誠意，一間小店，每次接到order就去重新煮一碗湯，比啲煮埋一大煲，有客人要就攞去翻熱好太多了，所以我一啲都唔介意，哩碗湯飲得舒服，飲得窩心~~~ 何況都唔係好遲到姐，份Pasta都未完全食完買單，盛惠92蚊，價錢合理，俾得願意，下次再見~~~ （如果客人離開嘅時候聽到佢地嘅一句，歡迎下次惠顧，咁我就冇挑剔了，不過成間店得兩個人，又要接單，又要收錢，又要煮，又要攞上檯，顧客食完又要收拾，就唔好太多要求了）

幾年前睇左【瘦身男女】介紹哩間鋪ge報道，我就非常想黎了，但我真係好少去香港島的，所以苦無機會。。。

今日終於有機會喇，因為有啲事要去灣仔入境事務處一趟，我又點可以再錯失哩個機會呢

我同老婆推住BB車就走過去，走呀走，因為行小路ge關係，唔熟路走過龍，走到去Sogo添
只好走返轉頭，我老婆算係冇乜耐心ge人，佢開始有野講了。。。。。。過咗鵝頸橋入人多區佢就更懷疑我改變唔識路的 好好好，我承認我只係睇咗地圖一次，基本上係估估下的

但好好彩，一下就俾我估中了，哈哈，Lucky~~~ 

街市係揾到了，亦睇到應該係上邊，但樓梯好長啊，我又推住BB車。。。。。。頂硬上！

終於上到黎了，揾到間鋪，之前睇咗好多食評，話哩度係街市熟食檔，衛生要忍耐云云，我就予咗會又熱又污糟的了，但一到又完全冇o個種感覺wo，有冷氣，地方有食環處管理又點算污糟呢，係凳多咗啲，推BB車唔太方便囉（怪得邊個）

坐低後我又開始擔心了。。。。。。行咗咁耐如果唔好食就大鍋了

我老婆根本唔知哩度好咩好食，當然就我發辦啦~ 當然係要order最出名ge燒鴨批飯同咖喱羊飯啦

食得喇食得喇 我老婆怕騷唔食羊，碟羊當然我食啦，大大碟，哈哈~~~
我食咗一啖。。。嗯。。。。老婆你可以試下了，冇乜騷味。
老婆：味道唔錯啊
我   ：味道是OK的，但我比較中意食騷啲囉 
當然最後大部分都係我食曬啦，味道係唔錯的，但未到眼前一亮ge程度囉，我住o係南非10幾年，o個邊好多印度人，又去過好幾個咖喱出名ge國家，又o係住香港好多年，所以我真係食過好多種咖喱所以，俾佢80分吧

我當然唔會放過一試哩度燒鴨ge機會啦~~~~ 
老婆：好味~~~ BB都中意食
我試咗一啖。。。。。。好甜！好嫩！好多肉汁！好好味啊！！！！！！！！燒到連應該會少少乾ge鴨批握位都好嫩呀！！！

真係覺得一隻鴨可以燒到哩個程度已經無可挑剔了！！！！！！！

好彩頭先冇放棄去其他地方隨便隨便咋

我老婆都非常滿意

早就聽過哩間鋪嘅大名，但間野嘅地點真係唔太就腳，尤其係嗰邊附近冇咩好做，所以一直都冇去嘅打算 最近因為新工作關係間唔中就喺附近出沒，但都係日光日白一個人，就隨便買份早餐吧。

粢飯凍豆漿就係我今日嘅早餐了。

好大一個粢飯見到就精神。

一咬落去就有一股熱氣湧出黎，晨早流流真係令人精神一震 嗯(⊙_⊙) 好脆嘅油炸鬼，熱辣辣，又香口，軟軟嘅飯，加上味道正宗嘅肉鬆。我食過唔少食店嘅出品，從質量，飯 肉鬆油 炸鬼嘅比例，哩間所賣嘅粢飯，係我食過最好的！！！ 本來覺得有啲貴，但真係物有所值 豆漿夠凍，甜味亦適中，飲得都好舒服

真係好多年冇食過韓燒，年紀大了，新陳代謝減慢，食嘅時候好過癮，食完要減返就唔係咁容易了，何況咁熱氣，上次已經係8年前嘅事了。最近阿媽返咗黎香港，我老婆之前又冇食過韓燒wo，適逢其會，我地3大1嫩，就去過癮一次吧～ 今日嘅目標係觀塘APM旁邊，One Pacific Centre 9樓嘅老牌韓燒連鎖店【韓和韓國料理】了

步出升降機，當堂眼前一亮，【韓和】兩隻大大發住紅光嘅招牌出現喺眼前，配合乾淨得發亮嘅黑色玻璃反光幕牆（其實係黑色牆磚外加大幅強化玻璃），真係氣派非凡！令人眼前一亮啊～

角落放住一個廣告易拉架，各分店嘅地址電話，營業時間，分段時間收費等等資料都清清楚楚咁列明，簡潔易明～ 今日係禮拜三午市時間，係最實惠嘅時段

步入正門，置于眼前嘅係食物擺放角，三張超過10米長嘅深灰色長檯平衡擺放，碗碟調羹等等餐具亦簡潔地安放喺長檯面下方櫃格入面。高樓底嘅假天花配合上圓形嘅巨型燈罩，非常地有時代感，同時極具派頭！ 真係有啲懷疑我係咪入錯星級酒店嘅西餐廳 喺我依然身處迷幻當中嘅時候，禮貌嘅侍應小姐就引領我地入座了，相信因為帶有嬰兒手推車嘅關係，當時餐廳只有大約3成滿嘅情況下，我地依然被安排坐喺全餐廳最角落嘅卡位嗰度，的確非常細心～

大小適中嘅平板電視，置于同門口招牌一樣嘅黑色反光幕牆之中，再配合上淡顏色嘅木牆，設計非常醒目，華麗中不失溫馨，我真係非常欣賞！
卡位旁的是大幅強化密封玻璃窗，我地身出9樓，景觀非常開揚～ 每個卡位窗邊都放置一盆盆栽，令整體感覺非常舒服～ 設計師功力十足，如果窗外嘅係維多利亞港嘅景色，而唔係重建中嘅觀塘→_→ ，真係難以置信我正身處一間實惠嘅平民化餐廳

黑色反光檯面，入檯式燒肉爐，黃色烤爐外框連抽氣孔，紅色嘅檯紙，純白色嘅圓碟加醬油碟，黑色杯筷。。。配合起黎頗有格調，紅黑兩色主題從門口開始練貫到檯面，設計師功力令我再次深感佩服 加上內置抽油煙機嘅烤肉爐，能夠非常有效地將油煙抽走，食完唔會成身燒肉味，哩種體貼真係。。。有一種本來就應該係咁架啦！該死的點解我地以前要忍受食完之後滿身烤肉味嘅無奈！！！ 安排坐喺最入面令到BB無處可逃，但又有個窗檯位俾佢玩同睇風景，我同老婆終於有啖好食了 不過從哩個位行到出食物擺放檯就遠咗啲喇
老婆肚子餓了，先去給她拿點開胃菜吧～ 涼拌木耳青瓜小番茄Kimchi都醃得不錯，不太鹹辣嘅味道雖然欠缺個性，但大眾化嘅口味令人食得舒服冇脾氣 切成一件件嘅火龍果同西瓜就睇都覺得精神。 【椰汁西米粟米糕】【芒果布甸】【杞子糕】甜品應有都有 雪糕今日分別有【香草】【朱古力】【Cookies】3種 口味，都屬食得舒服嘅大眾化口味。

食物碗碟擺放得井井有條，我最欣賞嘅係包住燒烤肉食嘅生菜同蒜頭，好新鮮，韓燒點少得佢呀 生肉方面，牛肉雞肉豬肉魚肉魷魚選擇繁多，切嘅方式亦好有創意～ 以雞肉為例，有普遍嘅雞件雞翼雞柳條，最特別嘅係廚房居然將雞腿用電鋸連骨切成一件件，令每細件雞腿中間都連住一細粒骨頭，造型非常可愛 肉亦醃得好醃啱好，唔會太鹹，樣樣都好好味，我最欣賞嘅係【牛仔骨】同【龍脷柳】，牛仔骨一向好評處處，龍脷柳又厚又嫩，我阿媽同BB都話好正

食物種類繁多，可以post上黎嘅相又好有限，我就點出令我印象深刻嘅其中幾道菜吧～ 其中一樣就係哩味【豬腳薑】，之間嘅雞蛋為保持形狀煮得唔入味可以不提，但啲豬腳就真係好好味，可能係用高壓鍋煮的吧，豬腳煮得入味得黎又夠爛，令我年紀漸老嘅阿媽食得好舒服，味道亦唔錯 （評分 : 8.5/10）

第二樣星級菜係哩道甜品【薏米糖水】，煮得偏稠口感一流，味道清清甜甜，類似土茯苓嘅味道非常香，啖啖嘅薏米用料慷慨！如果喺外面食，30蚊一碗都覺得值得 食得非常窩心 （評分 : 9/10）

跟住要介紹嘅係無心插柳嘅【熱豆腐花】，我一般食自助餐都係習慣東食食西試試，務求試勻每一味餸，當我食哩味豆腐花嘅時候只不過抱住隨便試試嘅心態，但一食就愣住了。。。好滑，真係好滑，令我想起【公和荳品廠】嘅出品 再試一啖，我係冇加糖漿同黃糖的，令我可以試清楚碗豆腐花嘅味道。。。。。。錯覺嗎？是味覺有誤嗎？哩碗豆腐花嘅豆味比【公和】嘅出品豆味更濃！！！ 又夠熱，感覺上佢比名動香江嘅【公和荳品廠】嘅出品更加出色啊 （評分 : 9/10）
最後不能不提而容易被遺忘嘅就係哩道【海鮮辣湯】，哈哈，一定係因為費事俾人批評話【冬陰功】冇哩樣冇嗰味料而改哩個咁嘅名吧 哩碗湯煮得好夠味，海鮮味好濃好甜好香，辣味唔重，真係好好飲，飲得好舒服 值得一提嘅係連啲配料都煮得好入味又唔乾，切小片辣椒嘅辣味已經被煮曬出黎，一啲都唔辣，取而代之嘅係海鮮味，瓜呀，魚柳呀都煮得又嫩又入味，值得一贊 最難忘嘅係啲蛤蜊，一般海鮮辣湯入面嘅蛤蜊係又細又乾巴巴根本唔食得的。哩味湯嘅蛤蜊size有人大有細，大嘅唔講，就連啲細粒嘅都俾廚房煮到嫩嫩的 真正值得推薦嘅一道湯！！！ （評分 : 9/10）
埋單每人低於200蚊簡直超值！

煲咗飯但我又突然冇心情煮餸，老婆又唔想煮，咁不如落街食吧。去邊間呢？隨便一餐，就【大快活】啦，味道唔錯價錢又合理～

老婆食咖喱食上癮，出親街都想食，就先黎份【咖喱雞飯】吧，我就要【焗豬扒飯】～

俾完錢，阿姐除咗飛之外仲俾咗塊牌我，話搵個位坐坐，佢同事就會將我地點咗嘅餐送過黎架喇～ 大快活幾時開始有送餐服務架，太驚喜喇 特別服務嗎？

彩德邨的位置以前是石礦場，地理位置高，風景還真的不差，下面就是九龍灣地鐵站，大快活內一幅幅嘅大玻璃，非常開揚
我地搵個梳化位坐低，話咁快我地點嘅餐就送上黎喇～

一向對【阿活咖喱雞飯】好有信心，之間又試過好多間餐廳嘅咖喱，好耐冇黎食過，就再重溫下哩間嘅出品吧～ 望住哩份咖喱飯就記起之前沙田連城廣場嗰間【嚐味】嘅出品，【嚐味】嘅雞係一粒粒的，哩間係一件件的 一件件的，煮得又入味，咖喱味又香又濃有層次感，完全冇寡寡嘅感覺！連鎖快餐店嘅出品居然比大部分餐廳都要好，確實不太正常 啊係，碟入面嘅紅雞蛋係哩間分店開業5週年大食會，係某啲店員特別送給某啲老客戶的

【焗豬扒飯】味道亦好，洋蔥菠蘿番茄配料樣樣新鮮，份量亦足。焗豬扒飯嘅豬扒當然唔會太厚的了，但肉味夠具質感，加上炒蛋飯，配合番茄醬嘅味道十分令人滿意 啊係，加配椰菜小番茄一份

今日去過唔少地方，由淘大商場食午飯，到去APM捐血，再去海港城買馬卡龍，5點半喇，哩度就係我為自己定嘅最後一站【好時沙爹】 好耐之前已經聽過哩間食店，之前唔喺香港住，每年返香港一次，一次唔記得，下個機會就係一年後了，宜家返香港定居，終於俾我搵到機會黎了～ 對我哩個對尖沙咀幾乎冇概念嘅人黎講，【地鐵站地圖】，就係我嘅恩物，走落地鐵站地圖前一睇。。。咪就喺嗰度囉，一出地鐵站行冇幾遠，【好時中心】個名就喺左手邊出現了，行入去，左望右望，真係死城一樣，今日係咪真係公眾假期黎架，冇人嘅。。。咁間食店喺邊? 我大把時間，隨便行下，總會搵到嘅～嗱，咪搵到囉，上一層，就喺個角落度，好易搵姐～ 行入去，時間仲早，客人唔多，可以慢慢食了，坐低，睇菜譜，食咩好呢。。。海南雞飯？?？ No，上個禮拜喺西貢食過，食其他啦，好多野都好好食咁，最後決定食【叻沙】，個字點讀？ 陳百祥個別名? 阿叻？ 照讀啦。。。。。。 。。。我要份叻沙。。。 。。。喇沙一碗。。。 塊面有冇紅呢。。。 唔知。。。。。。 再黎碗。。。o麼。。。o麼。。。喳。。。喳。。。。。。（突然對自己啲中文好冇信心😓） 等咗陣，碗喇沙就上檯了，幾香啵，飲一啖湯，好味道 好香濃嘅。。。咖喱味? 反正好味，少少辣，辣得啱啱好，啲湯好好飲，食啲米粉，口感ok，再飲啖湯，再食粒魚蛋，真係好好味，冇想過原來喇沙係咁好味的 最後成碗俾我食曬，正！！！ 食完之後，佢地可能唔記得我碗【喳喳】，提醒一下，一分鐘內送到，試下先～ 椰汁味清清甜甜的，食啲番薯，唔錯，食落好舒服，甜味啱啱好，仲有一條條滑滑嘅野。。。唔知咩黎，不過冇所謂，整體感覺唔錯，影咗張相俾老婆睇，佢都好有興趣，下次一定要帶佢黎～ 【好時沙爹】，下次見～