今日係信德地茂小廚食完晏，同事話落下層嘅許留山睇吓，好喎，小妹返工放工時時經過，但咁耐都唔幫襯過。

喺門口左望又望，款式太多，一時間唔知揀邊樣。見到呢個名「金枝鳳柚」幾有氣勢，印象中未試過，就叫咗個金枝鳳柚布丁，店員問小妹加$7蚊就有兩粒芒果糯米糍，都好呀，就加錢要了兩粒試試。

金枝鳳柚布丁($11)
賣相一般，外表同普通芒果西米布丁無大分別，食落味道似楊枝金露嘅超輕怡版，味道太淡，內裡有好稀疏嘅西柚絲，西柚絲無苦味，帶少許甘甘地味道，全靠西柚絲先睇得到同芒果西米布丁係有一丁點唔同。食完呢個甜品無乜太強嘅feeling，同個幾有氣勢嘅名「金枝鳳柚」唔多配合喎！

好彩加錢要了兩粒芒果粗糯米糍，外表睇落不錯，點知一口咬吓，嘩好酸呀！點攪呀，完全無expect個甜品會酸囉，都唔知吞下還是 …。好在另一粒正常番，其實糯米糍個皮係橙色有芒果味，幾煙韌，幾OK好，面上沾子椰絲，可能是雪過嘅關係，椰絲硬硬的，有些少黐住喉嚨，要飲幾啖水，抖了一齊先OK。

咁嘅水準就算送比小妹都未必食囉。

今日食晏同事話有度啲牛腩好正，但係唔記得叫咩名，離公司幾條街啦，橫掂小妹未試過，一於去試吓。

行吓行吓先知原來離公司幾條街嘅係歌賦街，呢條街好似為食街咁，有好多間有特色食店，同事講緊果間牛腩好正嘅店子就係九記，果間傳說中好味嘅清湯腩，幾乎中環人無不知曉。

小妹記得好耐之前嚟過一次，排咗好耐隊等位先食到一碗麵。今日無果次咁多人，都要等十分鐘先有位。等位期間，店員哥哥間中用地道嘅「問候語」招呼熟客，小妹真係有啲唔慣！

等到位啦，入到店內，地方不是太大，奇景出現啦，一張細細嘅枱，竟然容得下八個健碩身材嘅男士，好嘢；小妹坐果張枱因為有條柱只可坐六個，小妹同另一個同事身形都算fit，不覺太擠，其實是同事比小妹瘦嘅關係。望望枱面有一個鐵盒，有點像小時婆婆家裡裝麻雀籌碼嘅鐵盒，打開一看，原來用嚟裝匙羹呢。

小妹叫了個清湯牛腩伊麵，凍檸茶，同事就要清湯牛腩河粉。

清湯牛腩伊麵($29)
碗麵分量都比其他店嘅細啲，面上有好多蔥粒，湯真的好清味道淡淡的，連牛腩都白雪雪，似老火湯嘅湯渣，原來食落仲似，好腍，牛腩味稍為淡一點，伊麵不錯，無益味，浸了湯仲有少少爽。食完成碗無傳說中講到咁誇咁好味囉，都OK，係淡咗啲。

檸茶就一般無乜特別。好彩本來想同同事share叫碟油菜，同事無興趣所以無叫。隔離幾個阿叔個個都要咗一碟，點知啲油菜嘅菜亂糟糟地求其放係碟上，都不特止，啲菜望落無條似樣，好似啲雜草一樣，嘩，真係好難想像係傳說中嘅九記出現。小妹本來想影低此「奇景」，可惜阿叔食得太快啦，同事又一早食完等小妹，外面又多人排隊等位，小妹惟有同同事走啦。

傳說嘅嘢有時都要親身驗證吓先知道到底有幾多成真嘅，小妹今日機緣安排下得見其盧山真面目，相信都有排「回味」，不會太快舊地重遊啦！

小妹放工約咗friend去尖沙咀睇戲，未夠鐘四圍逛。行過Starbucks望見有新款蛋糕，嘆番件蛋糕先，好過四圍行。

其實有好多新款嘢，不過心諗睇完戲可能會同friend食啲嘢，而家都係食少少好啦。所以只叫了Chestnut Roll，Coffee Cake 1971，Raspberry Chocolate Éclair，同要杯最佳配搭嘅Iced Cappuccino with Whipped Cream。

店員好smart，聽見小妹話試吓新嘢先又一個人嚟，就問小妹一隻碟裝晒好唔好，要幾多隻叉咁，於是就一隻大碟裝晒啲蛋糕，嘅環保方便，賣相又靚啲，一隻叉OK啦，環保得來又唔駛太多論論盡盡。

多好時入到Starbucks，你會發覺啲員工nice得來又smart，好深印象果次係屋企附近果間，有個好麻煩嘅客，連我唔係serve佢都有啲炆陣，無理取果隻，店員竟可tactful地令佢安靜落嚟，佩服，更欣賞是Starbucks嘅企業精神及員工素質！難怪分店網持續擴展；產品不斷推陳出新亦是成功嘅不二法門。

小妹由無咁甜開始試啲甜品。

Chestnut Roll ($22)
粟子卷裡除了軟滑蛋糕，粟子蓉外，仲有大粒得嚟粉腍嘅粟子粒，感覺軟滑得嚟有層次感，唔會成個都鬆軟，有啲實在嘅感，有咬口，粟子味濃得嚟又不太甜，好正。

Coffee Cake 1971 ($28)
唔知點解叫1971，同個蛋糕有咩關係呢，真係唔知；個咖啡蛋糕幾重咖啡味，有啲似千層糕，面係簿脆加cream，底係三層蛋糕，質地幾豐富，脆面同軟滑蛋糕啱啱嚟一個contrast，但又不會互搶遮了對方嘅特色，幾好。

Raspberry Chocolate Éclair ($12)
紅莓朱古力棒，紅莓只得少少碎碎係面上，未食睇見面嘅朱古力醬已經feel到係最甜嘅一個。用叉cut開裡面全部都係cream，成個根本就似一個Chocolate Puff。好在cream不太甜，不會太溜，皮軟軟的，幾好，幾特別。

Iced Cappuccino ($28) with Whipped Cream ($3)
杯嘢賣相好吸引，加咗cream係靚啲。除咗靚，實際係杯咖啡滑咗，小妹無加糖，因為個cream本身係少甜嘅，等食咗一半蛋糕先開始飲，cream開始容，越飲越好味。超正！

真係太嘆啦，要朋友call先捨得走。食咗咁多嘢一百蚊有找，坐得又舒服，服務又好，Just want to say thank you all for your kind hospitality.

時時聽到人講A貨B貨，估唔到車仔麵都有A B貨。小妹就領教過，A貨B貨都做得似樣啲，幾可以假亂真；有啲A貨B貨車仔麵就完全唔掂，可能要降grade成C、D貨囉。小妹今日可以食番個正版正貨車仔麵，感覺真係好似入咗名店shopping一樣，超興奮，始終品質有保證。

中午放工有啲事攪，再到觀塘廣場度買電腦產品，順便去廣場地下呢間舖頭食番碗至愛車仔麵，可以話每次嚟買嘢，必定食碗車仔麵。

今日嚟到兩點多，仲排緊隊買車仔麵，小妹排隊都起碼排咗5分鐘。是日要了

豬紅豬皮牛肚魚腐粗麵
小妹加咗腩汁，先飲啖湯，有牛腩汁嘅香又夠晒味，只係今次個湯暖暖地，以往嚟次次都熱騰騰；豬紅入口輕輕咬吓已碎又爽滑，真係豬紅而不是雞紅，而家好多店子都用上雞紅，雞紅就只煙韌，膠膠地而唔會爽，真係豬紅好食啲。

豬皮同牛肚不會太腍太爽，剛剛好嘅彈口而滑，這兒嘅豬皮食過咁多次都未見過有毛出現，絕對食得安心；而且豬皮同牛肚已經索晒汁，食落已經好夠味，有啲店子嘅好似剛灼熟算了，夠爽而沒味道。

魚腐偏偏的一塊，食落帶點甜味，爽腍嘅，雖然有啲甜味，但唔會覺得怪怪的，格格不入那種。粗麵是麥色的，不是鹼水麵那種，無鹼味而好爽。

寫這篇嘢時已經係隔咗一日，仲記得好清楚因為每種材料本身真係又好又特別，有晒車仔面特色，有時間大家都試番碗俾俾意見。

係隔離昭隆食完果份的的色色嘅早餐，都係唔多掂，要加多個三文治先OK，事關小妹今日有事要成兩點多先食晏晝。

咁就行過隔離嘅永樂園買番件出名好嘅魚柳三文治做早餐先，再整多杯凍奶茶，拎返公司食。

烘底魚柳三文治加芝士
打開已經聞到一陣好香嘅芝士味，大大件魚柳，真材實料無花無假，小妹要烘底嘅，脆脆又煙韌，魚柳不會炸得太乾太實，啲醬加埋芝士實在太好味，無懈可擊，Feel得到用心製作，有Heart果種。原來除了招牌熱狗果種必製醬料頂呱呱之外，呢個三文治加芝士醬料亦不比佢遜色。

凍奶茶
有茶味又滑，清甜令你飲後仲有啲滑滑甜甜留係口內，好嘢，正！

講講吓，小妹都好懷念招牌熱狗王，舊老細最鍾意食熱狗飲咖啡，經常買熱狗醒小妹食，食得太多見到熱狗都怕怕，唯獨永樂園出品嘅熱狗可以幸免，從未生厭，佢獨有酸甜嘅醬料應記一功。

這個早餐超正，隔離果個相比就真係 … 教曉小妹什麼叫求其，一早揀永樂園唔好貪方便，淨係掛住唔駛拎有位坐，食好嘢有時係要有啲付出嘅。

星期六要返工都有好處，早餐人少少唔駛等，返晏啲慢慢食，今日一心去昭隆度食早餐。

以往係中環返工，舊公司同事鍾意叫下午茶昭隆美食碗仔翅，小妹試過都真係幾好。點知今次個早餐就真係 … 大失所望。

去到昭隆座位不算多，得幾個客，望望餐牌都唔知食乜好，唔係好吸引，諗住揀碗火腿雞絲通粉穩陣啲，要多杯凍奶茶。這兒嘅食品全用即棄餐具，都幾唔環保。

火腿雞絲通粉
用外賣碗裝住，感覺已經細份好多，全碗粉都嘅得兩條雞絲咁多，仲有火腿絲同青豆咁，啲湯又無乜味，真係非常之「清淡」囉。食完同無食過分別唔大，唉！

凍奶茶
奶茶茶味一般，不過不失咁；比起碗粉好好多啦。

以呢個價錢咁嘅份量，大家樂果啲抵佢好多，又唔駛行咁遠。阿爸成日講，香港人食嘢好嘴刁，查實邊度人都一樣，分得出你啲菜色係咪用心整，有無求求其其，是是但但算了，想蒙混過關絕對不易。

小妹前兩日病咗，睇醫生係屋企休息；果日下午茶落街買啲野食食完先食藥。經過呢間舖頭，都幾多著住校服嘅學生幫襯，小妹心諗啲野食應該都幾抵。今日又無乜心水，就去呢間食啦。

呢間舖都幾細間，坐十個八個人已經覺得迫迫夾夾，好在都攝到個位。啱啱坐底阿姐已介紹有魚蛋、燒買、餃子再加台式特飲都好抵食。但係小妹好想食甜品喎，都係要格仔餅配珍珠奶茶，有啲寡，加多個馬豆糕。

格仔餅($18連台式特飲珍珠奶茶)
要少醬嘅，小妹試過有次勁多醬，食完之後整日都反胃不舒服，格仔餅醬都是花生醬加沙糖，食得太多幾容易攪肚痛，呢度嘅格仔餅好似啲三文治要烘底咁，面果層脆脆，裡面又軟腍腍喎，幾特別；味道不太甜，都幾好。

馬豆糕($6)
充滿家庭風味嘅馬豆糕，同小妹媽咪整嘅一樣，可能媽咪整嘅仲好少少，勝在多一份親情同關心；不會太甜，馬豆都腍。

珍珠奶茶
多茶味少奶，可惜啲珍珠太大粒，支飲管又成日啜住啲珍珠，好難先飲到兩啖奶茶；攪到成杯飲完仲剩番好多珍珠，幾晒食物。

不過令小妹想起讀書時代就係咁，零用錢不多，小妹已經係好啦，零用錢淨係要嚟飲飲食食，不過唔通放學同同學去据扖咩，都係食普通嘢，車仔麵、快餐、下午茶餐、甜品就最啱預算啦！雖然不是什麼富豪飯堂，幾多星食店，已經好滿足。好彩到而家小妹仲有呢份情懷，但願情懷常在。

食完麵，食埋個甜品就心滿意足地回家。好多次經過Agnes b Café，心裡好想試吓佢啲嘢食，因為好多理由而無試到，今日一定要試到先得。

法國菜真係分得幾仔細，法國餐廳嘅菜色會高檔一啲，賣相華麗而吸引，Café 或露天茶座嘅會比較樸素休閒一點，但兩者都注重味道，食物精緻不會太大份，絕對不會有馬馬虎虎嘅感覺。

有好多款Pastry可揀，鮮果、芝士、朱古力、Tart、Mousse等應有盡有，賣相簡單樸實絕不花考，大部份款色都有Agnes b嘅招牌朱古力係面。小妹唔想食太多朱古力，清清地揀了芒果、士多啤梨同朱古力Mousse三款，再加一杯凍Cappuccino。

Adora ($30)
心形嘅朱古力Mousse蛋糕，啲Mousse好滑，軟硬適中，用叉拮下都不會黐住，Mousse裡面有啲椰絲，變成可以趙得嘅Mousse，加埋有啲vanilla嘅香味，簡單中顯得不簡單。心形設計好配合這個朱古力Mousse，The heart is really soft, so smooth! 一個溫柔嘅心，邊個會唔鍾意喎。

Carla ($30)
芒果軟心蛋糕，味道幾複雜，軟綿綿啲vanilla蛋糕裡有啲芒果粒，切開中間睇見啲芒果蓉咇緊出來，雖然係果蓉，但係食落又有點似鮮果肉，一啲酸味都無，又唔會太甜似浸過糖水一樣，食得出嘅清新。

Paris ($30)
士多啤梨Tart，賣相反而是比較花巧嘅一個，啲士多啤梨唔係好熟，有點點酸。士多啤梨周圍有啲果仁片伴着，果Cream Tart都幾好味，Tart底係硬果隻，小妹比較鍾意硬一啲，同上面個cream有個contrast，而且又唔會食到碎晒咁麻煩。

Iced Cappuccino ($35)
杯嘢個賣相並不吸引，Starbucks仲好一啲，價錢又差不多，Starbucks可以係面上加個甜嘅cream，一來賣相靚一點，而且杯飲品無咁dry，而家就太過dry啦，其實小妹對咖啡唔係好有研究，唔知道是不是越好越淳嘅咖啡味道會越甘越濃，帶點苦味果種喎。若果係，呢杯就不錯囉。

小妹淨係知咖啡同蛋糕係perfect match啫，若果要果汁，Agnes b都有果汁系列，就會變成甜併甜，感覺無咖啡咁好。

店員知道全部都係小妹一個食嘅時候，已經將蛋糕逐碟分開上，若果用一隻大啲嘅碟放埋一齊，賣相應該會更吸引，又環保一啲。

食完個休閒Loving Dessert，整個人會否真的relax一啲，多少都有啲掛，而且聽日國慶假期唔駛返工，可以盡情relax啦！小妹慣咗假期唔戴表，唔受時間嘅束縛，向“Life in the fast lane” say no。

小妹公司今日放工有培訓，要差不多七點半先走得；前日Lunch食完咖哩夜晚攪肚痛又痾，成個人無乜力，唔想四圍走，最簡單就係到APM嘅FOOD COURT食飯，然後搭VAN仔返屋企啦。

到FOOD COURT時差不多八點半，仲有好多人。行了個圈睇吓食乜好，小妹好想食炒年糕，梨花園嘅炒年糕係辣嘅泡菜炒年糕，走辣就無咗意思，尋晚個肚先唔舒服，唔敢再食辣嘢；就揀咗南京路嘅上海炒年糕囉。

除咗上海炒年糕，小妹仲要埋個雞絲粉皮添。

上海炒年糕($42)
一聽見係上海嘢，就會令人覺得啲食物好油膩；但係呢個炒年糕真係好清淡，一來可能真係多菜少肉嘅關係，而且用咗好少油落去整，唔會油光滿面，令立立，汁嘅味道有啲似茶餐廳嘅菜遠牛河果種味道，有點港式，不過係小妹鍾意嘅味道，因為真係好少油，有啲年糕黐埋咗，小妹要用筷子將啲年糕撈吓汁先無咁黐口咋。

雞絲粉皮($30)
賣相幾OK架，花生醬汁裡有粗粒嘅花生，伴著又凍又爽脆嘅青瓜絲、雞絲咁，又香，口感不錯，可惜係有啲粉皮太韌，韌到趙咗好耐先食到果種。

整體都幾好，下次再嚟希望個粉皮全部都軟軟滑滑就好啦！

「太極兩儀」是恒常的道理，小時讀書已受教。其精妙之處有如孫子兵法般可廣泛、概括地援引，連菜色也可﹖無錯，正如這個白雪黑糯米。

小妹食完飯，係APM逛了一圈，想食番個甜品抖抖。就去到滿記買咗個白雪黑糯米。

白雪黑糯米裡面有椰奶沙冰，黑糯米丸內有黑糯米，玉米，芋頭粒，好香口，軟腍得來又煙韌，好有口感；加上椰奶沙冰，有椰奶的香同滑，令成個甜品味道豐富而不單調；而且小妹最鍾意凍冰冰的甜品。

唯一不足是幼幼的沙冰粒裡內有少少比較粗身的冰粒，若果全部都是幼幼的，就perfect啦。

黑糯米加白椰奶果然係絕配，恒常的大道理也可用於日常生活的細節裡，放諸四海皆準。