影片
港鐵尖沙咀/尖東站 B1/ N5 出口
繼續閱讀
營業時間
星期一至日
10:00 - 00:00
以上資料只供參考, 請與餐廳確認詳情
轉頭去睇戲，貪方便由係 Isquare 食啦，左逛右逛，上埋網搵資料，是但就試您啦。門口細細，但入內發現高樓底，地方勁大又寬敞，檯椅密度又低，仲有卡位窗門位，非常有私人空間，空氣流通，坐得舒服。居然坐到張廿二號檯，我既 Lucky number！早餐都可以打邊爐，lunch 打邊爐一點都不出奇啦。我最愛就係打邊爐同燒烤架，食足四季都無問題。廣東點心、小炒、粉麵飯樣樣齊，連鮑蔘翅肚都有。日式刺生、壽司都有，花多眼亂，但價錢似乎過高喎。要睇晒五、六份菜牌真係要花點時間，十幾分鐘後我都耐性爆破喇 ﹗決定先試點心，後打邊爐！一寶蝦餃，鮮蝦仁塞得滿滿脹卜卜，兩三隻爽口蝦仁混上筍粒，蝦用鹽醃過係咸左少少囉。 蒸得乾爽無過火，餃皮嚥韌不濕不爛，合格。蟹籽燒賣，新鮮蝦仁味道，豬肉結實足料，無話多多肥豬肉，不油不膩，好味啖啖肉！竹笙魚翅灌湯餃，無蔥無芫茜合晒我口味！高湯香甜熱燙燙，淋上浙醋更醒胃。餡料夠份量，魚翅、豬肉、冬菇、瑤柱、等等，美味滿足。蒜香排骨，肉多骨少勁開心 ﹗蒜蓉惹味香口撞上甜甜彈牙多汁豬肉，還間中夾雜脆卜卜軟骨，又唔肥膩，好好食。高湯鮮竹卷，清爽濕潤，餡料甜美，腐皮香口嚥韌。唔似得傳統蠔皇鮮竹卷，芡汁又油又厚又杰，味道偏咸帶濁。川芎白勺魚頭窩，味淡如水，藥材味微弱到基本上係飲唔出，不香甜又無魚味，水汪汪！彷似汪洋大海，淨係得隻寂寞魚頭浮下浮下，無配料既？師傅係咪忘記左呀？頭就夠晒大啊，夠巨形 ﹗連隻魚頭都係淡荗荗既？雪藏貨？幸好啖啖肉又充滿骨膠原，點豉油食還可以，都開心既。手切肥牛，賣相一流，顏色深紅而脂肪紋清晰可見。拖一拖粉紅色嫩滑入口，味道麻麻，牛味淡到不得了，泛著微弱牛乳味道，沾上大量金銀蒜指天椒豉油都蠻惹味刺激的 ﹗HKD500 蚊碟手切肥牛完全唔值，小肥牛仲好過佢囉！活南非鮑魚，要成 HKD98 隻，叫兩隻試試啦。又堅係就鮮甜彈牙既，特濃鮑魚海鮮味，但唔值依個價囉！活蟶子皇，洗唔乾淨有砂呢，識唔識洗架，要擘開裡面洗架 ﹗都好大條喎，烚一烚，廿秒一見離殼就要即刻食喇，否則浸過火變到香口膠又硬又韌唔食得。天然鮮甜海鮮味道，彈牙滑滑又多汁，好好食但最衰要自己討砂囉 ﹗桂花蚌，最好味係您喇，但都要成百蚊碟 ﹗爽脆又帶脆滑，一咬爆汁，香甜無比，餘香久久不散，食到唔想停口。Lunch 斬到一頸血，飲茶點心還可以，而且點心真係幾好食！但火鍋刺生免喇，質量差之餘，收貴特貴，物非所值，高級既價錢、中級品質、低級服務！依間火鍋似乎係專攻強國自由行遊客，本土港人唔多適合。傳聞某某港星有份投資囉，不過都唔關事啦。
繼續閱讀
上星期日要去尖沙咀攪D嘢，正當行經The One附近收到 "一寶中日高級海鮮火鍋" 宣傳單，寫上大中細點一律$18於下午茶時段，於是即刻上5樓試下先。當日叫咗5碟點心，當然全部係大中細點之內，一於食平嘢。首先講下叫咗碟牛肉腸粉，嘩一見到碟嘢，我個反應即刻話 "嘩!乜咁好嘅，有2條蘆筍"，D腸粉個皮好薄，好透明，又滑又好食，牛肉算多，唔錯。另一推介，就係呢碟名叫"真係菠蘿飽"，的確真係有菠蘿係入面，有又叉燒，真料做到皮薄涵靚，諗起都想食。整體來說，叫咗呢5碟點心，都不過失，而且亦勝在夠熱，尤其是"菜苗鮮蝦餃"，一來賣相不錯，二來個皮又好薄，三來又好足料，四來又夠熱，總之正呀!我當日差不多3時去食，食咗1個鐘多D。不過最驚喜係，臨埋單前竟然有紅豆沙甜品送，好香陳皮味，太滿足喇!
繼續閱讀
今日同個多年無見面嘅朋友食飯！一般打邊爐嘅食市都好嘈傾唔到計㗎！就算卡位都係咁話！見到雜誌睇到佢地有outdoor獨立屋仔房間好靚！所以今日就算2個人都要嚟感受一吓！ 一入到間屋仔！嘩！玻璃屋咁！好浪漫丶好有Feel！部長都好有禮貌推薦啲海鮮套餐！不過我就鐘意散叫！湯㡳我叫咗原個冬瓜盅金華火腿瑤柱！個湯底整體都夠味！不過可以再濃味啲！幸好鮮菇味都搭夠！然後都係例牌菜！叫啲刺身做小食！好似我呢啲邊爐精！刺身已經食到厭！都係求新鮮食完唔痾就ok！大帶子同花籠龍蝦刺身還可以㗎！個龍蝦頭就加落個湯底度滾湯丶好甜！個龍蝦頭爆曬膏！最好食係呢個！其他牛肉、海鮮、餃子丶豬肉丶蔬菜菇類都算可以！埋單2個人要2500左右！不過不失啦！
繼續閱讀
同幾個朋友仔食晚飯，店內有魚生order,由於天氣凍，所以都係打邊爐好d....湯底有好多款，有平有貴啦，但當日做promote一蚊湯底，咪無order特別嘢，清湯算，食物方面，點左d四寶丸，唔錯，幾彈牙唔會霉，新鮮手打，就算叫多round,都keeo到好味。。另order左兩碟豬肉，一碟豬頸肉，量足，但味道無乜特別，跟街外一般酒樓差不多。。。牛就有手切肥口，同一款平價牛肉(唔記得乜名，百零蚊碟啦!)，手切肥牛味道當然無問題啦，但又未去到非食不可，其實佢有好多款牛肉可選擇，但有d一碟要幾百，貴左少少，所以無order呀，大家有機會咪試其它吧。。。招牌餃子王，真係掂，又大，成個饅頭咁，重料，有二三隻蝦在內，得！。。仲叫左d乜鬼馬油炸鬼，又係幾好食，脆卜卜，面頭又有d墨魚肉，幾吸引！！最後又叫左d菜，菇，烏冬等食物，都係新鮮料，食左係咁多，但可能個量都大，幾飽。。。唯一係自己卦住吹水，無影食物,可惜
繼續閱讀
相約了三數好友享用火鍋，首嚐 The ONE 的一寶中日高級海鮮火鍋。一行七大一小提早一天訂枱，在沒有特別要求不獲安排入座 VIP 房，地方寬敞，私隱度高，用餐環境令人滿意。是晚點了兩款湯底，南北杏大白菜豬肺鍋味道清甜，大白菜帶翠綠爽口，豬肺滋補美味。火焰花蟹鍋以花雕入饌，既生色(火)亦生味(酒香)。湯中加入兩只花蟹煮製，蟹肉結實鮮甜，湯汁味道亦與海鮮食材十分匹配。海鮮生料試了南澳帶子、美國桶蠔及脆鯇骨腩三款。南澳帶子色澤通透，雖未算很大隻，但食味甜美新鮮。美國桶蠔一客五只，最大那一隻有七吋長，十分飽滿吸引。蠔肉蠔香豐碩，亦富質感，令人滿意。脆鯇骨腩魚鮮味足，爽滑得來又有魚骨部分享用。肉食方面，先來金牌手切肥牛(脊)，肉色略深，牛香OK嘅，但口感較韌不夠腍。鹿兒島黑豚肉肉片比較肥，食味普通。午餐肉是至愛火鍋生料之一，選材厚身不肥，富口感，食味不俗。菜蔬點了粟米、菜心苗及竹笙。粟米夠甜，OK。菜心苗夠綠嫩，煮久一會，腍身清甜。竹笙脆口，沾滿湯汁精華特別好吃。雜項墨魚兩食，手打墨魚滑及手打墨魚麵製法味道亦差不多，兩者墨魚風味足，口感彈牙。出前一丁公仔麵是另一必食生料之一，吃火鍋不以此作結，總是感覺欠缺了什麼。當然，$68兩個出前一丁，在家吃應可吃多月了。餐廳贈送木瓜雪耳糖水及椰汁糕。糖水足料滋潤，但甜了少許。椰汁糕則甜度合適，味道不錯。飲飲食食，本應不提洗手間鉄事，但洗手間中的溫馨提示實在耐人尋味，不得不和網友分享。
繼續閱讀