炊豕店 (已搬遷) 新店位置

店仔細細嘅炊豕店, 得十多個位, 店舖設計係以懷舊香港作主題。  長型嘅舖位一邊係「進餐區」而另一邊係「微型懷寶展覽區」, 實行眼睛嘴巴皆滿足!對面石灰牆上寫著「炊」（音吹）：燒火做飯「豕」（音始）：家豬也, 謝謝你教識我「每日一字」!另一邊牆就打上一些舊木條做裝飾, 其中一條木條更寫住「我們都是食豬大的」...... 哎喲! 我係食牛大喎~炊豕店只係簡簡單單咁提供幾款食品, 主打應該係秘製豬扒...全店有最底消費, 基本上叫份主餐已經會過額, 另外每人會送飲品一杯, 由罐裝汽水至熱茶都可以選擇。我今餐嗌咗套秘製豬扒配肉燥汁跟白飯用公雞碗裝嘅豬扒飯, 豬扒竟然可以有半飯碗咁寬大, 但係又無其他食家講到咁肥。  忍唔住口一啖咬落去, 豬扒係肥大酥軟又肉厚, 我最鍾意食呢種豬扒, 瘦蜢蜢有乜好食, 怕肥要健康就食清蒸啦!  豬扒醃得入味, 微帶甜香, 心諗係用乜鬼嘢醃, 咁特別嘅~肉燥汁俾得唔夠多, 撈唔到飯, 不過腩肉煮得又肥又香, 塊豬皮重有毛毛~食完碗飯即刻醒晒, 始終好味歸好味, 要小心三高!