呵呵呵，又一餐拉麵… 今次笑得出，說明味道不錯。 話說當天搬咗嚟上環但啲煮食爐未送到嚟，就同女友落街逛逛搵下嘢食… 見到喺蘇杭街嘅熊拉麵，諗起幾年前食過佐敦果間冇乜特別。如果唔係門口有張海報寫住有款期間限定「香魚湯拉麵」，湯底用上飛魚、竹筴魚、柴魚、鯖魚同埋沙甸魚，好似幾好味咁… 都唔會想入去試多次。 見到店裡面（對比其他拉麵店）罕有地用上幾張6人長枱，我哋2個人就被安排坐喺中間嘅位，左右都係唔識嘅人，同對面嘅女友有種距離感，我就唔太鍾意… 我點嘅「香魚湯拉麵」用上曲捲麵條，而且同其他正常選擇唔同，係比較粗嘅麵條，可以吸收大量嘅湯汁。 叉燒有3個選擇：梅頭瘦叉燒、火炙肥叉燒同埋角切叉燒粒… 梅頭我怕太瘦有渣，而送飯一流嘅角切放响拉麵入面啲口感又會變得虛無縹緲咁，所以揀返肥叉燒。 個湯底雖然好濃味，但魚嘅香味唔係好高… 可能係自己期望過高掛～話雖如此，成碗俾我食哂（麵嘅份量唔少），如果呢碗變成唔係限定，我會長期幫襯嘅。 女友點嘅「熊拉麵」，係好正常嘅博多拉麵風嘅豚骨湯底… 呢下就覺得奇怪喇，我仲以為熊拉麵來自熊本添～ 麵條係典型細至中細麵，湯底亦都係典型湯底，冇乜令人驚嘆嘅味道… 係依家喺香港大行其道嘅博多拉麵味道。 今次食拉麵冇叫替え玉，因為女友想食餃子… 但見連女友都差唔多食完都未見影，我哋就度東張西望嘅搵緊啲伙記，估唔到被煮麵嘅師傅見到我哋（亦即係話店舖內果幾個伙記都見我哋唔到），師傅高聲問我哋係唔係漏咗單… 唔知佢係唔係就係負責人，之後有個女嘅喺咁埋嚟say sorry。 等咗一段唔短嘅時間後，碟「熊自家製餃子」終於上枱喇～個size 比平時日式餃子大，如果「熊拉麵」是博多風，我就真係諗唔明點解餃子唔係博多一口餃子風喇… 然而，餃子餡料俾到我哋一個幾好嘅驚喜，喺鬆軟多汁嘅豬肉裡面加咗某種酸酸嘅醃菜，加上奉上嘅特制醬汁有少少辣油係入面，夾埋一齊有種令人胃口大增、想一食再食、大滿足嘅感覺。

有次返咗去石塘咀（以前喺度讀書）搵個朋友，撞正下晝兩點佢就問我想食啲乜。咁等緊佢返屋企攞嘢果陣喺7號差館附近轉咗兩個圈，就話有間台灣嘢喺對面馬路、一間有幾個人排隊嘅魚蛋粉同埋佢隔離一間疑似懷舊冰室但有少少貴嘅茶餐廳有少少興趣。 結果我哋去咗試下呢間夏銘記，見佢上晒報紙話復業、又子承父業咁，由油麻地搬過嚟西營盤嘅魚蛋粉鋪，聽聞佢未結業前有成四、五十年歷史，而且朋友話成日都見到一好多人排隊。去到見到好幾個排隊人士都有返咁上下年紀，心諗都唔會有衰，因為年長少少嘅人好少會貪新鮮，所以食呢間都好難中伏吧～等咗唔洗十分鐘就輪到我了，但朋友未到我就讓咗下一組人入先。喺呢個時候老闆好好人咁問我要唔要入去等（我婉拒咗，始終想同朋友一齊入去嘛） 坐低之後，有位姐姐見我哋左望右望就向我哋推薦紫菜魚三味，而我哋亦好乖咁嗌咗2碗（一碗走青）。由於我細個果陣習慣咗食魚蛋粉必定叫枝忌廉（一間喺士丹頓街叫細記嘅，有冇人記得？），所以少不免今次都嗌咗枝。 碗粉黎咗，發現魚三味其實只有魚蛋3粒、墨魚丸1粒、魚餃1粒同紫菜一少扎…因為餐牌上冇寫所以不免少少覺得被騙了嘅感覺，心諗早知就要魚蛋魚片河啦。 不以為然咁加咗幾滴辣椒油提提味嘅同時，聽到一個（疑似）熟客仔向老闆購入2樽辣椒油，講到好正咁… 我即刻喺碗粉度再加少許辣椒渣，果真好香辣～（諗下諗下，過2日返去入返一枝半枝貨先） 魚蛋係有魚鮮嘅香味、咬落有嚼勁、但略嫌太細粒；墨魚丸就好好味，完全食得出自家製嘅味道出嚟，可惜得呀1粒到喉唔到肺；粒魚餃就毫無特別之處，可以撇除… 啲紫菜就OK… 碗河粉幾都算大碗，一個女仔食勉強夠飽。 $37一碗值得嗎？ 我覺得唔值… 如果舖頭開喺上環/灣仔/天校都仲可以理解，但對西環小街坊同舖租嚟講over咗少少。與其係入去坐喺度食我估我會對外賣淨魚蛋/辣椒油有興趣多啲。

有次接女友放工，佢話好攰連食飯嘅能量都冇（我都係剛收工而未食飯，好肚餓呢） 途經呢間嘢，記得行過好多次見到個個揸住勁大塊pizza，但係每一次自己都係食咗嘢…加上塊pizza咁巨型，唔係好肚餓都好難食得晒嘅感覺。 喺門口猶疑咗一刻（因為有2邊counter，同埋冇idea叫邊款好），一眼望落去見到個display有嘅款色唔算好多，只有大半塊4 Cheese, 一塊Margheritta，一整塊Paisano's同大半塊Godfather 剩低。鑑於女友係唔食橄欖嘅，所以買咗2塊Godfather返屋企，承惠$80。 等咗一陣等佢翻熱，跟住店員就用一個紙碟裝住一塊pizza再各自放入自己嘅紙袋裡面…因為實在太大塊了，所以拎得有啲啲吃力。 女友果塊好靚仔，但係… 自己果塊就「西」埋咗一邊，所以冇計，只可以對接食。 啲料好夠又配搭得好，番茄醬隻味好濃而pizza底雖然拎到返屋企冇再翻熱都仲有少少脆。加上個底係絕對冇pizza hut果啲咁高筋，所以食整塊就啱啱好唔好太飽。我終於明白點解咁多女生都可以一人一塊喇。

同事極力介紹，話既然我係拉麵愛好者，去開大坑一定要食呢間咁話… 咁呢日我哋去完中央圖書館睇展覽就決定過嚟食晚飯。 其實應該唔難搵，但唔知點解喺門口行過2次都冇為意… 好彩等咗唔夠5分鐘就有位～被安排坐喺近門口嘅位置有好有唔好啦，因為有少少迫夾。但老細（同事話肥肥哋、做樓面嘅喺老細）好細心，見到我哋兩個都有褸同袋就話如果冇貴重嘢可以交俾佢掛起佢哋。 同時老細又好落力咁推薦當日嘅限定「花椒薄切牛柳拉麵」（真名唔記得喇）。我心諗「咁得意？花椒同牛喺拉麵上面work㗎，咁似啲北方口味嘢嘅？」但見老細興致勃勃咁就決定信佢，叫咗一碗試吓。 賣相係好特別嘅，面頭有啲日本蔥絲同花椒粉，啲牛似係燒過，聞一聞個湯底聞得出花椒味，已經覺得好有興趣食落係咩味～ 頭一、兩啖其實覺得隻味怪怪哋咁，果種既香亦痳嘅味道喺第二度係冇食過嘅，啲拉麵嘅粗度揀選得啱啱好，而每一啖都會令人一啖一啖咁接著口食落去。 香痳嘅口感令我覺得女友嘅「白」冇乜特別。個湯底係幾濃味，但竟然飲啖冰水再食多啖拉麵個口感係如此衝擊！由於幾鍾意個湯底，所以加咗個替玉。當然要指出係未必個個鍾意食啲咁重口味嘅食物，坐我斜對面個男仔好似唔太覺得佢好食咁。 女友碗「白」，冇特別感覺～

為咗慶祝過咗人生某一個關口，所以我哋二話不說就揀咗とん吉最貴嘅定食賀一賀佢：叫咗2個鹿兒島特等厚切豚肉定食～ 有少少覺得上枱時個賣相唔係太特別，可能係我唔識影，但始終依家個個都相機食先，とん吉會唔會考慮整靚啲啲碗/盤/碟呢？ 塊扒多汁又幼嫩唔在講，最正係啖啖肉感覺真係唔同啲，寫寫吓諗返起都搞到我肚餓。 嗌咗厚切都有擔心過食唔晒架，但之後好彩冇後悔到， 因為心裡面始終會覺得既然食豪啲應該豪到底。不過食到後尾竟然俾我食哂碗飯仲剩低一舊仔豬扒，好彩佢哋可以免費添飯～ 最後食完仲有生果送… 雖然老面嘅唔應該有要求，但略嫌啲生果唔當造之餘切得太近塊皮～

一次要獨自去葵芳辦點事，所以午餐要係商場搞掂，喺地下行咗一兩個圈結果都係食返自己最愛食物～拉麵。 呢度之前拍拖經扶手電梯上上落落望到其實覺得間鋪頭個位置好奇怪，好似夾硬塞間食肆喺度咁。而且睇落某個角度嘅食客只要抬頭一望就好容易會睇到搭緊電梯嘅女士裙底，所以第一次同女友經過此地已經提醒佢著短裙唔好用呢條電梯。 眼見張餐單淨係拉麵都有1、2、3、4、5...13款拉麵，其實都已經有少少中伏嘅感覺。因為一間傳統拉麵鋪係極少提供多過3款拉麵，而且見到呢間竟然用上2、3款口味同風格完全唔一樣嘅湯底… 見九州風嘅拉麵喺香港打得火熱，所以就改為試下較北海道風嘅鹽湯拉麵暗，轉下口味之餘還掂間鋪頭名就係賣緊鹽味拉麵，應該冇死喇掛～另外再加一隻玉子。 拉麵一上枱，我通常未撈勻會先聞一聞，隨面飲半啖湯嚟試下。但今次聞落冇味，飲落都冇味，只有兩個可能性… 一喺就中伏、二就係我病咗冇哂味覺。而拉麵食得出係街外嘅行貨麵條… 塘心蛋就流心，但冇味，正常塘心蛋係應該有被豉油醃過，但呢個塘心蛋就冇嘅。 枱面上有好幾樽唔同嘅調味料，有黑蒜、柚子胡椒等等，枱上嘅標示話可以用呢啲調味料mix and match唔同嘅湯底，我照住喺碗拉麵落少少黑蒜，味道即刻大大提升，但我唔buy咁樣食拉麵。個標準調味應該由拉麵師傅準備好而唔係由客人控制。

女友知我對焙茶情有獨鍾，所以買咗個焙茶牛乳麻糬撻同焙茶糯米糍俾我試吓… 焙茶糯米糍麻麻地，略嫌甜得濟，焙茶味唔夠濃、味道欠奉。 但我幾鍾意個焙茶麻糬撻，雖然可能因為加咗牛乳，所以茶香都係唔夠濃，但係個麻糬就真係好Q，食得好過癮、好好玩。同埋食一個已經好飽，趕時間果陣當小小嘅午餐或者下午茶食啱啱好。

Urban City Diner 係東涌 Citygate 其中一間新開嘅餐廳，亦係美心品牌Urban Bakery 嘅升級餐廳版… 位置非常方便，一出東涌地鐵站就見到，前身係Spegetti House… 亦即係話，間野由一間由大家樂集團管理嘅轉成美心集團嘅，我哋香港人都真係活在大財團嘅「關照」之下。 最初嘅Urban Bakery 就係用色香味俱全嘅牛角包打入民心，接連推出各款新口味嘅牛角包嘅同時，又接連喺香港各區插旗… 增加曝光率嘅同時又增添粉絲，之前仲喺中環參一腳開埋Urban Bakery Works 呢間Café 添。 想當年我嘅心亦都被一個極之「邪惡」嘅牛角包抓住… 估唔到已經幾年唔喺市區返工嘅我，會喺離島區再次遇上佢～ 「黄金奶油流心牛角包」參上！！ 唔係講笑架，呢個流奶牛極為邪惡，先唔講佢之後出嘅變化版本，齋講流奶牛已經可以頂得到一餐嘅份量！喺一個香噴噴嘅牛角包入面有金黄色嘅流沙，果種震撼！果種完美感！仲有就係… 食完之後果種內疚感！！ 鬆脆嘅牛角包用上牛油，流沙奶黃又用上牛油，再加上鹹蛋黃… 好肥！但好滿足。 今次因為要趕返工所以只買咗外賣，但服務都幾好，落完order 就算知道我喺攞走，個店員都問我要唔要焗返熱佢，焗好後仲幫我包到靚靚仔仔咁。返到公司先食雖然已經唔暖，但牛角包依然鬆脆，最重要係咬開果陣啲流沙「BABA」聲咁流出黎～睇到隔離兩個同事眼都突出黎，要我下次買埋佢哋份！ 其實$23一個牛角包對於我黎講唔係好貴，可能因為我知道佢有幾好食… 但對於東涌嘅居民黎講可能標價有點過高。始終係離島，租金應該唔會好貴掛？ 諗起之前睇過篇報導，講到美心集團第三代國王伍偉國笑說Urban Bakery $13一個牛角包一日賣成二千個，但如果隔離開間美心賣$9一個牛角包就幾十個都賣唔到… 證明一樣野，我哋咪就係一群羊群心態嘅小綿羊囉～

這天約咗兩個朋友去太古城踩冰，本來係想踩冰前去EAST 32/F嘅Sugar 食晚飯。但因為冇訂位，驚Sugar 冇位所以過咗康怡Shabu Sai 打邊爐。因為太古城附近得佢一間日式火鍋店，所以就算上網見到相唔係咁吸引都去咗食。 一去到門口先下晝五點九，同職員講要三人一鍋特上牛肉放題（$179一個人）後就被安排入店內。 點了個蕃茄/壽喜燒湯底，蕃茄湯個樣勁橙色，一啲都唔似平時煲湯煲出黎嘅茄紅素顏色… 先黎牛肉豬肉片各一碟…覺得啲牛肉外觀都幾靚，但唔知係咪因為個蕃茄湯好酸，蓋過咗應有嘅牛肉味；咁諗住喺壽喜燒果邊淥啦…點知完來果邊係好鹹，所以一齊放棄咗果邊。豬肉味道幾好，薄切得黎淥完仲好有豬味。 至於出面可供選擇嘅配菜好少… 蔬菜只有黄芽白、白菜仔同椰菜可以揀，好幾款香港人食火鍋經常點嘅蔬菜都冇… 而其他配料非常行貨，生魚片、冬菇、紅蘿蔔、蕃茄、豆卜、粟米、迷你芝士腸、青口、兩款魚滑、魚蛋（咖啡魚蛋果款）、公仔麵、烏冬、蕃薯… 至於野飲就得幾款你飲，甜品有薑味好勁嘅蕃薯糖水同夾雜咗頗多水份嘅軟雪糕。 Shabu Sai 俾人嘅感覺係只想做到人有我有就夠嘅感覺，完全冇特別之處。

話說之前行過SOGO Dalloyau個counter見到有款新出嘅不含麵粉嘅朱古力蛋糕LE RÊVE CHOCOLAT，估唔到會同東京神級伴手禮Ken's Café Tokyo嘅朱古力蛋糕一樣樣。所以諗住搵日買一個黎孝敬阿媽，因為之前去東京冇買到俾佢～（當時冇搞清楚營業時間） 其實呢款不含麵粉嘅朱古力蛋糕個recipe好多地方都有，但要做得好食似乎好難，如果唔係Ken's Café Tokyo都好難連續四年攞到 Tabelog 嘅年度冠軍，獲頒東京伴手禮No.1嘅榮譽啦。 Anyway 星期六中午十二點幾去到問佢洗唔洗預訂（因為Ken's Café嘅係要起碼一日前訂嘅）店員話唔洗仲話即時有貨... 一個$188，我記得Ken's Café一個蛋糕¥3,000，咁$188都唔算好貴吖。俾咗錢之後個店員就講解一下個蛋糕有三種食法：冷藏、室溫同加熱... 冷藏嘅食法係存放於1°C-4°C雪櫃內，然後切開享用、室溫嘅食法係雪櫃取出後，放於室溫20°C-25°C陰涼處等20分鐘後切開享用、加熱嘅食法可以用微波爐用心800W加熱30-45秒或者用焗爐用150°C加熱15分鐘再享用。店員亦有說明個蛋糕嘅材料係法國運黎，但就喺香港焗嘅。 本來我哋係想動用焗爐架，但又嫌麻煩... 用微波爐又怕整到個蛋糕變乾，所以索性用室溫嘅方法食（懶人大哂）。 未切前外觀比Ken's Café嘅深色，切開後顯然見到啲氣泡，唔知會唔會關熱力唔夠平均事。咁我哋四個人就切八份，每人兩件啦，一食落口超朱古力，但同時間覺得好甜，甜到個頭有種Sugar Rush嘅感覺。最慘係食咗半件之後已經開始力不從心，因為好滯！朱古力味好濃厚嘅同時，好似一啖啖砂糖擺入口咁。當時我心入面已經心知不妙架喇，所以喺咁同媽咪解釋Ken's Café絕對冇咁甜... 可能一年飛日本幾次（而家有一折機票），所以成家人都習慣左日本嘅甜品，甜度恰到好處... 所以可能食啲法國傳統recipe嘅甜品覺得太甜。但其實香港人好多都食開日式野食，而且個蛋糕咁甜都唔符合現代人健康嘅要求啦，所以如果DALLOYAU可以稍為修改一下款蛋糕嘅糖分會好好多。