終於"的"起心肝寫"喜喜"，她都算是我在銅鑼灣搵食的飯堂之一。推介的食物組合如下︰
1. 雞批浮台+香蕉pancake 餐
2. 茶餐
3. 下午茶3Q撻(細雞批、細蛋揵、細椰撻)
4. 番茄牛脷意粉 (今日我要推介的！)

最鍾意係番茄汁夠多，應該是罐頭番蓉和新鮮番茄HALF/ HALF，好味！牛脷切成條狀易入口，而且淋得來夠爽(好矛盾!!!)總之就係煮得剛好，唔會咬唔開，又唔會淋得滯！配埋佢地的滑滑熱奶茶就最正！

Bill Tai Tai  一向都喜歡吃粥，久不久就會叫一次粥餐清腸胃，所以當一粥麵落戶大本型時都頗為欣喜
但今日吃的不是粥餐，清清地叫個魚蛋米，加杯熱檸茶，再跟碟油菜。食物味道不是最強，但是水準穩定的中規中舉。魚片和魚蛋都頗彈牙，如果想清清地食個dinner，這裡是油塘街坊不錯的選擇啦。

今日開張的大福屋之所以引起Bill tai tai的留意，主要係佢又係主打"魚介豬骨湯"，早前去"台風"食麵，吃左個沾麵麻麻地，但我諗魚介豬骨湯都會係未來拉麵潮流，且看大福屋又會如何啦！

今日雖然去開中環做野，一早經過但趕住做野唯有過門而不入，晚市再來吃過，留影一張啦咁。見門面有晒花牌，都幾靚靚仔仔咁，都頗有期望。

終於到左放工時間，太約5點半左右，店舖坐左7-8個左右，我就一個箭步衝入去吃！ 一早諗定食咩唔好徙時間，叫左個大福屋系列濃厚原味$62 (要加一)，有開張優惠coupon 原來想試埋半價餃子，得我一個食唔晒就留返跟老公再來時用(如果好食的話)。今日就用左個like facebook送汽水的優惠先。

等左10分鐘，麵來了！正！好夠熱！講真上次台風一役，佢扣分的地方都係因為沾麵湯不夠熱，我今次就吃個湯拉麵穩陣d！呷口湯！不錯，有"魚介"味，是鰹魚的味道，叉燒普普通通，麵都幾彈呀，我加左放在檯面的生洋蔥，個味又唔同左，好在off duty，如果唔係口臭臭對客就唔係幾好啦！ 

總的來說都幾份量、味道都不錯，會再encore ！

今日中午食孤獨飯，返OFFICE之前在APM的PIZZA EXPRESS開餐。話時話，從來未惠顧過這間，事關LUNCH的話，離OFFICE太遠，食DINNER，又往往會離開工作地方去第二度。

言歸正傳，有2個LUNCH SET，1個係LIGHT LUNCH $62,另一個係EXECUTIVE LUNCH $72，兩者的分別就在於一個有小食/ 湯，其實都幾貴，且看PORTION有幾大啦。

我叫左個番茄芝士長通粉$62，野飲有汽水同特飲，檸茶/檸水/ 咖啡其他就要$10，我就叫左個可樂就算數。

PORTION真係少得可憐，長通粉得幾條，一小份沙律，一睇就知唔飽，因為要再收加一，所以死忍住唔再叫野啦。

Even 份量係咁，味道一般，2:15pm 都full左8成。可見apm 真的搵食艱難。

一場來到元朗探朋友的BB，食完晚飯大家自動波就去左B仔涼粉(佳記)，差不多7年沒有來過，想不到B仔的版圖已經延伸到一望無際，九曲十三彎的角落都有人坐的地步。

一行10幾人只好兵分兩路，等左10分鐘左右就有位。等候期間於身邊掠過的B仔涼粉已經仿佛為大家提供左"必食推介"項目。

一坐底，為食的老公大人即刻叫左份雞翼尖來吃。因為睇唔到有個辣字，老公食左幾件就停手，等到B仔涼粉來才繼續！

重頭戲終於來了！好大兜！見到已經留口水！生果很新鮮，唯一留意到的，是B仔已經不再有芒果係裡面啦。其他水果都好好食，不過少左芒果就梗係差少少咁啦。結果5個人分，每人都可以分到2碗半左右，60幾70蚊，夠5個人食，真係好鬼抵！下次會再來吃!!!

去荃灣做野做到過左食飯時間，去左新開的日本拉麵點試食，2點幾，完全不用等位，去到門外，有些嚇窒，因為外觀並不吸引，殘殘地，又話新開？

入到去，全是BAR檯，只有20個位，Bill Tai Tai 都係高妹一族，爬上去個BAR SEAT都吊吊地腳，唔係太方便著得太斯文的女士、老人家同小孩，可能佢地唔係麵店的TARGET 呱？
小店只有5款麵，我地4個人叫4款，淨番一款番茄麵無咩特別。店舖指明”沾麵”係每日限定30碗，就叫”沾麵”$83試下。等左8~10分鐘，沾麵來啦！好大堆頭！一睇就知食唔晒！我仲叫多左個半熟蛋添，賴野… 雖然店舖有指引教人吃”沾麵”，但係麵條不是太”索”到湯，好似”麵”’湯”分離咁，點都沾唔勻。個湯方面係非常濃郁，濃到非常”杰”身，呷一口係gel住個口那種，唔似”一蘭”豬骨湯可以一飲而盡。個湯加左魚去煮，有朕魚腥味，魚類愛好的Bill Tai Tai完全沒有問題，同行朋友就唔係太接受。另外麵條非常粗身，拍得住中式油麵，但係卷曲版本，沒有咁油。大概吃了2份1 ，我已吃不下去，太飽了！塊叉燒有女人手掌咁大，完全沒有吃過，除左因為完全沒有味之外，係因為叉燒以外，仲有4~5大粒叉燒粒，吃叉燒粒和半熟蛋都飽左9成了！再加上叫拉麵送汽水，滯住左都飽啦。

眼見坐側邊的男士，吃得非常津津有味，好快就吃完好滿足咁走左，莫非”台風”的目標客群唔係我地？
總括來說，在云云拉麵店中叫做有點新意，但此份量的確叫人卻步，下次有機會同老公大人一起吃，可能兩個人share都ok!

10月份的生日快真係停不了，姊妹聚相約左係Cafe Gray Deluxe。
金鐘PP上到4樓再轉LIFT，一來個格局就唔係Bill Tai Tai 平日吃的cheap cheap 茶餐！基本上tea time 只有2個menu，一個係$365 for two的tea set, 一個係$206 per head的，7個人吃3個2人set 再加多杯餐飲就just fit!

姊妹推介coffee是不錯的，叫左熱latte，很滑、很香，不錯的！
期待的tea set 來了！三層裝得很精緻，看上去比淺水灣的high tea set size 較細，最上層是鬆餅，上面鋪上粗粒咖啡糖，食感不是一般的英式鬆餅，內裡比較乾身，頗為美味，但我還是想念淺水灣的tea set 鬆餅！鬆軟和傳統才是我杯茶！

其他的食品合格有餘，但沒有什麼驚喜，總的來說，是吃"環境"多過吃"食物" ，吃這種居高臨下的modern city的感覺，$200/位也是很值得一試的！

難得一天紅假，一於食到盡！跟好友逛街至旺角，走入旺中帶靜的煙廠街，只為了吃此店的甜品，好友推介。
就在好景商場後街，彷彿已不是旺角，人流驟然梳落，正適合此小店落點。
之前吃了其他小吃，就點一個要花店心思做的原味拿破崙，酥皮偏濕，頗為失望，不過內裡的吉士甜度剛好，都ok好味，但不推介。

朋友試了夾餅伴雪糕，相對來說，無論份量、味道、價格都更勝一籌！細食者，兩個女孩子可以share。夾餅是即烘，都唔會差得去邊。好味！如果行旺角行到累，又想避開人群，此小店是不錯的選擇！

看雜誌試新餐廳，中午去左新開於九龍灣淘大的"RINGER HUT" ，一聽名字完全聯想唔到餐廳是賣什麼食物的，餐廳來自日本，原來大有來頭似的，不過同席一起試食的日本料理達人就唔係咁諗！雖然日本有成600幾間，不過CHAMPON此麵食始終不能入"拉麵"流，不能成為日本料理的代表。主打CHAMPON (簡單來說就是"日式雜菜燴麵")，根本就係一個唔知點解的日文，無理由餐廳東主會以為個個香港人都會識讀識解！又難記，又難點，竟然沒有中文翻譯！？店主未免有欠細心！

再講主打用左7~8款野菜煮的這"CHAMPON "，外觀都OK，頗為大堆頭，不過，睇真D ，咁似媽媽家常用家中剩餘雜菜煮的家庭料理嘅？一試個湯，以為會有很多蔬菜煮成的鮮甜味，不過好明顯地加入左味粉係湯裡面完全蓋過了野菜的鮮味。而作為一個lunch來說都算是飽肚、實在。

另外一款招牌食物是"雜菜兩面黃"，這樣說真的不過份，根本就是兩面黃，不過係用非常幼的麵條，炸得很透徹，夠脆口。味道方面，topping 是一樣的"燴雜菜" ，不過不失啦。值得稱讚的是上菜速度很快，很適合趕時間一族！最後講一講推介的"芝士餃子"令人非常失望，餐不如跟餐那三隻煎餃，因為上面的芝士都是超市貨色，非常普遍，可以不試。總括來說，短期來都唔會再來了...

好友相邀，早早預約Bill Tai Tai 去淺水灣high tea 慶生，本人當然著得靚一靚skip 個lunch 直等到high tea時間。
預約3時半，完全不用等位。坐底發現其實只有一個選擇，就係承惠$268 (加一前)的high tea set!

單就presentation 已經令人精神為之一振！high tea set放在傳統的三層架上，非常賞心悅目，未吃先加分！吃前預計，以沒有吃lunch 的大食妹的我而言，應該唔夠飽，不過估計錯唔啦！因為三層食晒都真係好鬼飽！ 介紹下個tea set，底層是咸點，上面兩層是甜點，一口的size 真的非常合適，恰到好處，令你會有回味而不過膩之感，要知道更好味的東西，在很飽的情況下吃都會大打折扣！

整體來說，所有食物都非常好味，要特別推介的是芒果杯，上面是芒果布甸，下面是一層椰子味的布甸，非常配合！芒果味道天然，不是香精味道，一定要在半飽時吃，倍添滋味！high tea set 跟一杯咖啡/茶，是日選配左house brewed coffee，不錯的，不過要伴三層tea set 食，未免一杯不夠喉啦！

總而言之，非常感謝好友們的邀請，是一個非常滿足的生日tea!!!