雅憩花園餐廳 (路環市區)

博殺過後到雅憩花園餐廳, 原來它就是劉華同舒淇喺游龍戲鳳到過的餐廳… 一心諗住食桑拿醉蝦, 點知侍應話未有蝦… 咁我地係早左啲嘅, 四點左右… 咁唯有order燒乳豬, 非洲雞及sangria …唔知點解每次食葡國菜都要飲sangria先感覺是完整的…
餐廳是半outdoor的, 夏天應該會有點熱, 樓面有兩條粗樹幹, 吊扇型的燈, 牆上都掛有葡國色彩的畫, 配上格仔檯布, 很有特色的… 最可惜係落大雨, 影唔到教堂前的景貌

食得啦… 燒乳豬, 外皮很脆, 份量十足, 不會太咸, 但有點肥… 非洲雞, 肉沒有很’鞋’, 但濃濃的黑橄欖油味, 不是我杯茶… 由於, 雨下得很大, 用完餐, 繼續慢慢品嚐那sangria… 聽到隔離檯能夠order桑拿醉蝦, 我們當然追加… 呢間店雖然有點遠, 夜晚都好多人訂位, 席間, 他們正在忙著晚上訂檯的安排…
突然, 侍應送上一個玻璃器皿, 內有浸在酒的蝦, 蝦仍在動, 我與友人對望, 心裡都有著一樣的疑問”等它醉了就直接吃?!!”… 查問一下, 等陣會端上一個放有火山石的熱鍋, 再把醉蝦煮熟… 感覺都幾殘忍… 唯一慶幸, 他們沒有在我們的檯上做呢個動作… 蝦是新鮮的, 香香的酒味, 吃不停手總結: 地點有點遠, 但值得一試... 來這裡, 還可順道試埋安德魯的葡撻

百福麵家 (南灣)

今日嘅行程除左博殺, 就是特別揀左兩間未試過嘅餐廳, 其中一間係百福麵家

選擇百福麵家, 係因為鍾意食蟹粥, 之前都總會幫襯氹仔橋嘅峰景餐廳, 不過已經執左lu… 吃過其他的, 都不是太喜歡… 今次這一家, blog友說真材實料的, 於是決定一試… 它原來就處於新葡京附近… 入口不太明顯, 它在投注站及報紙檔中間, 真的, 一不留神, 就會行過… 一進門, 樓面不是很大, 侍應們都是有禮貌的, order左一個蟹粥及牛腩麵… 等緊嘅時候, 望下其他人食咩, 有他們的招牌雲吞麵, 海南雞飯… 感覺上有些是熟客…牛腩麵, 都係試啖湯先, 是清清牛腩湯味, 不會是味精湯的感覺; 麵是爽口的, 沒有鹼水味, 好吃… 牛腩不會太肥, 很嫩, 不會是難咬的那一種, 吃完成碗都不會有油油的感覺等緊蟹粥嘅同時, 有段小插曲, 隔離有位食客投訴他order的原盅燉xx花膠湯(沒聽到全名)找不到花膠, 侍應們查看盅內湯料後, 堅持說是這樣的, 建議食客如果不接受不如取消, 食客同意…轉眼間, 廚師親自跟食客誠懇地解釋他們都是用真材實料的, 希望食客不要浪費, 廚師更說明真的有用花膠及是原盅燉的… 食客都有說他已光顧這店幾次, 也因他是真材實料… 食客最後也要回那盅湯… 大部分餐廳如果被客人投訴食材, 都會選擇叫食客取消以平息事情, 但這位廚師的舉動給了食客誠懇的感覺, 更沒有令事情更糟…讚

蟹粥上檯啦, 很香的蟹粥味, 啊…原來是肉蟹…啖啖的蟹肉, 很鮮味…粥底亦是原汁原味的蟹味…沒有那種刻意用糖/蛋/咸蛋黃造成的蟹粥味…吃完, 也很回味

雄裕老地方美食 (黑沙環)

基本上, 一年都會去澳門兩, 三次… 今次仲揀左好多人嘅四日連假復活節… 為左唔想餐餐都要排隊(多數都係旅遊書有介紹嗰啲)… 所以… 今次決定走出氹仔同新口岸

到左dinner時間, 第一次踏足黑沙灣(關閘)…好local嘅感覺…今次揀左睇blog見到嘅冬蔭公蟹花甲鍋…多年前已聽說澳門有抵食兼大堆頭嘅什錦海鮮鍋, 但賣相不討好, 一直冇諗住試…不過, 今次爬文中搵到呢間, 見到d相已經好期待… 七點鐘去到, 已見到有人等位, 等左大半個鐘就有位, 以假期黎講已經好理想, 等位期間好多local澳門人黎買外賣, 無論小菜定火鍋料…aiya…仲未開名tim, 呢間叫雄裕老地方美食…佢d食材好新鮮, 門前有幾箱游水海鮮… 佢間鋪得三張細檯, 一張中檯同一張大檯, 所以一晏左, 就要等下啦…原本亞姐比張細檯我地, 點知轉頭比左個group四個人坐, 亞姐原來想我地同個group三人坐中檯…冇所謂, 但都講聲呀…都好, 可以聽下個三個澳門人傾偈, 佢地叫左豬骨煲, 好似好好味, 不斷都有其他檯order, 佢地仲order左幾個小菜, 都食得津津有味…佢地話以前冇乜人知呢間野, 但依家開始有香港friend知唔知老地方喺邊…咁又係, 佢嘅位置喺一個屋邨平台…

入正題啦, 我地order左一個冬蔭公蟹花甲鍋同辣酒花螺, 辣酒花螺一上檯, 色香都具備, 再試埋味, 真係好鮮味,不會煮得太老, 只可惜點了小辣, 下次可以點中辣…冬蔭公蟹花甲鍋上檯啦, 冬蔭公嘅顏色已令我地好肚餓啦… 侍應提醒海鮮是未熟的, 我已有心理準備它有蟹啦, 大頭蝦, 花甲, 什菇同津白… 滾啦, 滾啦, 先試大頭蝦, 蝦頭係有膏ga, 全鍋共有七隻…蟹都有少少膏, 共有兩隻, 花甲都唔知有幾多隻… 只知成個鍋底都係花甲, 食完, 檯面成堆殼, 應該都有七八十隻…呢餐好滿足… 臨走前問左亞姐咩時間黎最好, 佢話六點黎啦, 食第一輪唔駛得, d海鮮選擇又多啲…是的, 到我地嘅時候, 聖子皇已售罄

下次一定會再黎試下佢嘅豬骨煲同其他小菜

達榮魚翅湯面 (氹仔舊城區)

基本上, 一年都會去澳門兩, 三次… 今次仲揀左好多人嘅四日連假復活節… 為左唔想餐餐都要排隊(多數都係旅遊書有介紹嗰啲)… 所以… 今次決定走出氹仔同新口岸

到酒店check in完到官也街逛下… 但始終仲有兩個幾鐘先食dinner… 於是隨意搵間食肆坐下, 食少少野… 多年來, 好多飲食節目同旅遊書都有介紹達榮魚翅湯麵… 一直都冇試… 今餐諗住食清清地… 就即興揀左呢間… order左魚翅湯麵同半份魚翅球… 先試啖湯, 感覺它是真材真料的, 簡簡單單嘅魚翅同金華火腿味, 是我喜歡的味道, 清清的… 但…魚翅雖然大大塊… um… 可能… 我不太懂欣賞… 麵雖然冇鹼水味, 不過太淋; 魚翅球, 感覺上同鯪魚球差不多, 但這個外面比較脆 總括而言, 這間餐廳不會令我有下次一定要encore嘅衝動, 或者, 有日我會為它的魚翅湯再到訪