這個位罝,曾經是一間我喜歡的放題,半年未到原來已換了新主,不過一點也不可惜,反而非常高興,因為原位於九龍灣mega box的小飛象搬來了,之後想食葡國菜大方便了,yeah~~~

而家小飛象都做semi-buffi,點一個主菜就有哂頭盤/刺身/燒物/生果/沙律及湯,一個頭盤由百幾到近三百,ok啊 最最最開心係有生蠔及鵝肝任食woo~woo~woo,mega box既時候都冇生蠔食,太好了!!!生蠔夠新鮮,跟酒店食到既貨色一樣,海水味濃應該係澳洲蠔吧~雖然係任食,但每次黎4隻,唔會落十隻黎十隻,還好加單都陸續送上.ok!除了必食生蠔外,煎鵝肝多士,芝士燒凡立貝也是必食的,鵝肝幾大塊,煎得微焦,香到死!塊多士好脆,不過吸哂d油唔敢食太多,我只食2件就收手了.芝士凡立貝個芝士好creamy,凡立貝就細隻少少,合格啦.仲有芝麻燒雞翼,我想讚一讚係全翼黎既,好大方啊!另點了燒茄子及海鮮酥盒,前者似食pizza,+芝士蕃茄同燒;後者海鮮餡只有蝦仔及魷魚粒配上白汁,個酥盒好滯肚,不宜多食.

主菜了:紅酒燴牛肉飯/葡燒羊架,前者百幾,後者約$228,羊架好大份,有3支,加烚薯及salad一小兜,羊冇人問過我要幾成熟,唔夠細心,上卓後意料之內地"生",怕生紅肉既我當然退貨啦,侍應都好禮貌地同我跟進,之後再上卓好少少了,但始終羊架太厚未切開,3份1肉仍然生,放棄了.熟既羊架味道還不錯.男友既燴飯冇投訴,怕酒味既佢都食左8成.

以上全部食物都是落單的,salad bar,湯及刺身自取,湯都提一下,是日有磨菇忌廉湯及龍蝦湯,兩款都正!磨菇湯有大量菇碎,忌廉冇一般的白,感覺冇咁肥膩;龍蝦湯就一個字可形容---濃.自助卓上比較少選擇,甜品亦欠奉,三文魚刺身較耐出一次,如果可改善一下這些瑕疵,我可能每星期都黎一次 .黎緊既朋友生日飯,哩間都會on list.下次一定要點多d葡式野.

這篇食評是在港首次食的評語,但此餐廳並非首次光顧.第二次食冇影相,因為這餐廳的價位實在低,相比很多茶餐廳更平.冇乜人會係茶餐廳食飯時影相吧,所以冇相片分享.但食過第2次後,心感應該俾個讚哩間大眾化又高質量的餐廳,所以都寫幾隻字推介一下.

紅磡分店好新,位於一新樓宇之商場1樓內,如非有事前往該區都未必會知.進入餐廳是黃昏6點左右,晚飯時間尚早,無需等位.前菜點了香草焗田螺,主菜我點了鐵板羊架,男友點煎蛋漢堡扒拚雞翼.意尤未盡之下再點了墨汁意粉,最後加了tiramisu作甜品.另每位任飲+$12,咖啡,花茶,汽水任添,誰都不會拒絕吧!

田螺合格啦,只係size細左d,薯蓉少;鐵板羊扒有d生,個人好怕太生既紅肉,叫侍應幫我整熟d,侍應都好禮貌合作,再上卓時熟得剛好,羊扒唔so,good!如大塊些會夠我飽.男友的漢堡扒比快餐店的厚些少,肉味濃又唔過鹹.有蛋有肉有雞翼及薯條既鐵板餐都只係廿幾蚊,連鎖快餐店既扒餐都冇咁平,味道都是中上的(薯條如多d更好).因主餐份量略細,所以再點個墨汁意粉share.個墨汁看似不夠黑,但入口還是夠味有餘的,而墨魚細細件不失鮮味,有嚼勁,唔錯.食墨汁類最怕個嘴圍住一圈黑黑的,這個無可避免,但佢個色冇咁勁,已經好好多.最後來一客tiramisu,餐牌介紹這甜品使用正中進口意大行忌廉製造,味道真的比以往食過的更濃更香,一試就知龍定鳳.
不得不提任飲哩環,個任飲吧有部N字品牌咖啡機,可調2種口味,我飲左2杯latte,好香奶滑口感,泡沫有些少,都叫專業了.汽水唔多講了,都係例牌幾款,只多了檸檬茶.花草茶倒有驚喜,茶包是進口貨色,花味以外我選了士多啤梨茶,果香淡淡的,但總比飲汽水有益.埋單約$120/2人,論環境坐得舒服,服務態度好,環境非常整潔,連餐具都洗得非常乾淨,食物味道及質量平均都有70分以上,仲要平到廿幾蚊有交易,以西餐來講可能幾不可思議,除了冇得投訴,我覺得更應比個讚佢.唯一一樣可改善的就是最好不用客人自行往收銀臺埋單,因等埋單時跟等入坐的客人會逼埋一堆,有d亂.

首次光顧這餐廳並非在香港,而是廣州.一向愛西餐的我,於廣州步行街一廣場內睇到$12RMB碟意粉及$9RMB一個蜆肉湯的餐廳廣告後就一頭衝進去了,結果只花了$50RMB就夠2人飽餐一頓,印象尤深,也有分享相片到自己微博內.香港的價格貴3份1到一倍多d都已經好低食,就係分店未有設於最旺的地區,要食就睇你自己住邊區了,最近我男友的有2間,倒有點運

任食放題已是港人不假思索就想得到的大餐,我亦曾經以為本年度不會再光顧的一類餐廳,點知半推半就下,又就範了,結果......出乎意料

和味館的放題不只日式,已是多國菜的化身,入座後未落單已送刺身了,而unexpected的即煮海鮮都有,如今日就有我比較少食的.........蟶子!!! 此蟶子都有我隻手掌長,白雪雪,食得到的新鮮彈牙,半點腥味都冇,good!
是次放題仲order左越南牛肉湯河,越式牛油雞翼,泰式生菜包,蘆筍牛肉卷等等熟食,上菜好快,近乎0漏單,水準都中上,只有一款燒雞翼近骨位置未熟透,臺上的食物好快被掃清.
刺身除左大路貨色外,甜蝦,螺片都有任食,唔錯!是日order左幾款壽司(放題多數唔會點有飯的壽司),其中有款叫"海鮮船"(大慨)係用腐皮做隻船盛着飯及海鮮料,都ok夾,其他不過不失啦,壽司中的飯亦是半個主角,唔太大件,唔會一夾就鬆散,醋的比例適中已經up to standard,此事此刻已經要收工了.

大食的友人仍努力包底中, 近15分鐘休息後,order埋心太軟作結.心太軟係本人非常喜歡的西式甜品之一,對之亦有一定期望.上臺了,賣相85分,一匙下.......如噴泉段湧出來的朱古力漿潟出來 ,太感動了.朱古力濃又甜,流出的有半隻碟滿,如果可以給我一球vanilla ice-cream你話多美妙?!!

放題跟洒店buffet既分別就係以實惠的價錢安坐餐卓前剔紙仔等食及要俾貴一些再要自己張羅/排隊取食物,我都係喜歡俾人serve多d

某日放工後,冇人約的我漫步回家途中,記起多次經過(對面街)但從未光顧的拉麵店, 掙扎好一回兒,決定給此店一個機會.

店舖面積只屬中小型, 有一長型開放式煮麵位連吧臺,正合單人食客.每個座位上已放好餐牌及點餐紙,配料可另加,麵身粗幼可揀,清清楚楚.我心中只有一個慾望,就是要多叉燒(因當日的午餐太爛了),叉燒拉麵有3片,不作他想!再加1隻溫泉蛋,that's it!

約5分鐘的等候時間, 大大碗香噴噴的拉麵送了,3片叉燒邊微微焦,比一般日式叉燒薄身,亦冇明顯的肥/瘦肉,但入口軟諗,好食!配菜有椰菜絲,日本蔥花及炸洋蔥碎,椰菜絲只是用滾水烚, 未有爆香,日本蔥亦是,香味稍遜.記得數年前於日本九洲旅遊時,誤打誤撞走進橫街內的一拉麵小店,拉麵司傳一手一腳地炸蔥煮麵,那香味至今難忘!一碗麵有幾高質素, 還看每一步花多少心機.by the way,隻溫泉蛋如何? 原隻蛋一開二,半凝固的深黃色o者o里狀蛋黃蛋味濃,帶些少甜,正! $12一整隻日本蛋值得俾.最後講講個湯,棕啡色的,醬油味重於骨味,鹹左些少, 油份偏多,要扣少少分.

總評是:可以再去.

另一新張知名的一X拉麵仍未去潮聖,昨晚剛好路過以為排隊熱潮已退,本想一試,原來條隊斷開了, 仍有廿人以上於2個舖位後輪候中.......唉,唔去住了,本小姐冇耐性呢~

風雨過後的星期四,好友們為我安排的生日自助餐可如期進行了,so happy

dinner buffet 6:45pm開始, 遲些少來亦無防,因為海鮮如:龍蝦,法國麵包蟹,長腳蟹等是源源不絕的供應,真夠大方!開邊龍蝦大大隻,連蚶計幾乎有我前臂般長 !龍蝦肉結實,味偏淡,蚶是最厚肉及鮮甜的部位,good!   而長腳蟹肉比龍蝦鮮甜,蟹殼已被剪過,食時再用卓上的剪刀稍剪即可抽出蟹肉.本小姐一向懶食蟹, 當日都不顧儀態雙手共用去拆蝦蟹;麵包蟹倒沒有試, 見到暗黃色的蟹肉,似"隔夜"而又將變壞的樣子,冇興趣了. 生蠔是港人最愛食的海鮮之一, 可皆cafe too已停止供應任食生蠔已久, 少許失望.不得不提,壽司賣相吸引,特別是縵魚壽司, 但自知胃細易飽而未敢食飯類,所以放棄壽司只食刺身.3款刺身: 三文魚,油甘魚及八爪魚夠新鮮, 只是以5星級酒店而言, 刺身理應不止這3種"行貨".

讚-熱盤由印度,港式,美式,西班牙,日式都兼顧到.先講炒飯吧,不論印度炒飯或西班牙海鮮炒飯皆夠乾身,前者餡料只有提子乾,飯粒有淡淡咖哩+黃薑粉的味道;後者豐富多了,海蝦,魷魚,魚塊等等,飯粒金黃,又香又惹味!還有各式燒味:燒肉,乳豬,叉燒,豉油雞etc,全部都有試, 當中乳豬及叉燒最好味,前者豬皮仍脆口,後者肥瘦平均, 入口甘香,送飯一流,比以燒臘作招來的餐廳水準更高!行過些少,見到有幾款點心, 就試較特別的菠菜蝦餃(可能名有出入),流沙飽, 黃金粟米球. 粟米球最一般, 球似是魚蓉打成的,味道一般又唔彈牙,或許粟米才是亮點.蝦餃及流沙飽均達到酒店水準,唔錯.另有灌湯餃/小籠包,傳統水晶蝦餃及燒賣等, 食不下了,可惜.

要排隊輪侯的主打角色分別是中式燉湯及鐵板牛肉粒拼鴟肝.原來這裡的燉湯很受歡迎, 大鑼一敲, 約一半食客紛紛放下刀叉前往排隊,而每位可最2盅.是日燉湯: 南瓜燉竹絲雞.我的湯未見南瓜,但獲分配到雞肉及瘦肉,肉味濃火候足,未覺味精存在,若是能去除面層的油,會更健康. 鐵板鵝肝牛肉粒要苦候達10分鐘, 我早早就往排隊,可近距離欣賞廚師即炒的功架.炒畢後以扇貝的殼盛着一粒牛肉+一片鵝盰(唉,有埋扇貝多好!)我又取2份與友共享, 牛肉粒是過熟了, 有點"鞋", 鵝肝只屬合格,只因本身未算最上盛的貨,油香餘韻也不足. 另外天婦羅也是做得好的,炸漿又薄又脆,共中天婦羅蝦剛炸起,相當唔錯!其他如南瓜,茄子,冬菇也香脆,好好!

彈-自助餐的即切燒牛肉至今未有一間令我滿意的,我已死心,友人食後感是--[唔得!].要食靚的燒牛肉, 自助餐免問.最後到甜品了, 各式蛋糕,棉花糖,燸米造的,即製鮮果pancakes,梳乎里等等, 選擇多但味道參疵,有硬的,質感怪怪的,唯梳乎里最佳,此是薑味並有薑粒的梳乎里,冇辣味,但薑味出色.要等10分鐘以上,以光波爐即製,每次只出爐約6-7個,先到先得,要付較多耐性了. 總結是,甜品較為失色.

對5百-7百人頭計的自助餐固然有要求,香格里拉只算是[平均], 好海鮮者會叫好, 甜品怪或會不滿.哪裡有完美? 只在乎個人口味吧.

本週開始本小姐之生日週,星期一的飯局亦是親自挑選及訂座的(懶惰的友人們),因為此店只開業約2個月,食評夠新, 海鮮亦是主打之一, 就決定了.

3位女士點4個菜,還送小食一款,菜式如下:

備長炭山癸冷麵(送的): 未有聽清俄應提醒之下夾起一注便往嘴裡送,食食下......wasabi太勁了,辣得我標出眼水來!食得辛辣的友人也面露難色!其後慢慢地逐少夾,好多了,wasabi跟備長炭冷麵的化學作用又幾好.

油鹽水察花甲: 花甲肉彈牙,新鮮,油鹽水唔會過鹹,ok!

薑蔥炒鮑魚仔: 幾香,有獲氣!鮑魚仔面介左菱形紋好讓熟得快,易咬的質感,鮮香味美.一共8隻,我估3隻

o者o者炒通菜: 合格,略嫌唔夠香.

蒸蟶子皇: 8寸長的蟶子要預訂的,早上致電問有何海鮮選擇, 下午有人入貨後回覆你揀了什麼鮮貨,唔靚唔買.當晚的蟶子自然新鮮又彈牙,好味!

最後蟹肉籠仔蒸燸米飯,隻蟹中size啦,有少少羔,蟹肉淡左些少,但個飯不得了,蟹的鮮香滲透飯內,加上油香,太好食了,已飽9成的我食下2碗,滿足到死!

美食都要跟美酒相配,店員介紹2紅一白餐酒,我選擇了白酒,食海鮮飲白酒最佳配搭啦.白酒乃是較甜的risling.以往對risling的印象都是較為酸的白酒,難得這酒夠甜,女士多會喜愛.邊食邊飲,就過了3小時的快樂時光.
中式海鮮菜館近來真的少去了, 食海鮮多選擇西餐廳或買急凍的作刺身食用,中式煮法其實變化更多,難怪老外都要手執筷子食中菜!下次定必帶男友再來,他也是海鮮怪一名

上年我錯過了香港餐廳週, 還差點被例作黑名單,今年決定早早約人兼做定功夫(睇遍心水餐廳的menu), fix好日子後決不更改. 到AMEX卡會員可on line booking時已有部份熱門餐廳fully booked.唯獨harvey nicoles restaurant仲有dinner time可訂, 便不作考慮.

餐廳就位於4樓,匣那是本人甚少閒逛而至之樓層,所以餐廳開業多年也慒然不知.餐廳的大慨裝潢已於facebook見過,是一個長方形的空間及菱形而色彩繽紛的地面,感覺cool & trendy.靠窗有sofa位,但只有單邊.似飲野多於fine dining的地方.

餐廳週推廣的指定menu有4個course,每款都可2揀1, 海鱗或肉,任君選擇.

APPETIZER: beef steak tartar with classc garnish n crispy potato-牛肉細嫩,滑入喉嚨仍留有絲絲鮮味,但那片裝飾的超薄薯片很鹹,(7.5分)
crab meat avocadon with tomato sauce in raw scallop ball,serve with red pepper -一片片薄切生帶子包住蟹肉,牛油果粒,魚子醬蓋上面, 此乃友人的菜,跟對方share一半,我食到帶子及蟹肉的鮮,但帶子應有的質感不見了, 而是很諗的texture,OK!反而魚子醬冇甚味道,未知何等貨色. (8分)

SOUP: cream of roasted apple and parsnip soup with scallop- 由於大家都點這款湯, 所以只有一個comment.湯好creamy同厚身 ,但蘋果味真的很微弱, 切粒帶子very good!帶子還是有嚼勁的好,oveall個湯仍是很不錯.(8分)

MAIN  COURSE: (friend's pick)pan fried lobster tail and abalone with parsnip puree,served with caviar and shellfish bubbles-龍蝦尾有大約4份3手掌大,鮑魚跟罐裝鮑魚仔的size相若,我朋友各分一半給我 .龍蝦尾肉質結實,未有太多調味, 簡單香煎已好正! 西式煎鮑魚更驚喜,沒有厚厚的蠔油覆蓋, 鮑魚本身的鮮味可嚐得清楚了, 清新的味覺加上鮮味的餘韻,質感適中,amazine!只是我獲得的那份泡泡不多,未有太大感覺.(9分)

而我份和牛西冷就有些失望了,可能事前跟侍應提及過自己怕食出血的紅肉, 所以7成熟的和牛如9成般的效果.外層是深啡褐色略硬焦肉, 切開是淺紅色(對,已非粉紅色了)的和牛肉.肉質太熟必然鞋口,失望 .再者,份量也少.我期望是一塊半掌大的牛扒,上菜時見到是3小方塊如iphone手機厚的牛肉 ,薯蓉再多也不夠飽吧!睇過其他食評家同款餐的和牛扒, 心裡更不爽, 如被呃秤!(5份)

DESSERTS : mango napoleon及lemon confit w honey parfait, 本人不愛芒果,只少試一部份餅層, 好脆.友人激讚芒果肉好甜,一瞼滿足;我的檸檬甜品反而特別多了,侍應奉上時特別提醒這用真檸檬皮造的兜是可食用的 ,已經大廚煮上5小時.甜品是輕怡的甜味,還有兩支脆條增加層次. 檸檬皮又如何?WOW,是甜的軟檸皮,用刀可容易切開的質感,冇丁點兒澀味,只有檸檬的香及糖水的甜,內裡有少少jelly同cream,nice!伴上西柚果肉中和了甜膩,好滿意 , 還有跟一個雪糕,但溶得很快,應該及早享用.

Actually去得置地食飯都會有$400預算一人, 好奇之下問侍應取來regular menu比下價,原來平日也有set dinner供應, 5道菜5百幾, 5道菜加wine pairing多2百,acceptable.我應該會再來的,或許試下afternoon tea set.原價一個main course3百起,未致於食唔起,中還晚市人均消費一般都$300,除了餐廳週以外, 都值得再來.

星期日晚,男友約好我撐臺腳,講明帶我食好野,十分期待

餐廳位處佐敦,以為係街坊小菜館,於廟街某一西餐廳前停低, 門口以深綠色及木色為主調另加大玻璃窗,感覺優雅(冇估到佐敦區有此類餐廳),至少餐飯坐得舒服.6:30pm晚市才剛開始,無需等位侍應禮貌地招乎就坐,menu亦隨即奉上.

男友二話不說俾我一個special menu,開估了,原來帶我來歎和牛 .有來自日本的佐賀牛,澳洲M5及美國肉眼和牛套餐.我們決定日本及澳洲都各點一份互相分享.

頭盤有焗蠔, 芒果蟹肉沙律,是日餐湯係南瓜粟米湯.蠔及沙律合格啦,蟹肉冇雪味.因為我唔食芒果,同侍應要求"走芒",好欣賞個廚肯為我多做功夫.(或者個沙律並非一早伴均的).是日餐湯並非極幼滑的質感,反而帶有細碎的粟米渣,加上南瓜香,好美妙,90分~

主角到了, 幾乎同時上卓.我的佐賀和牛屬5安士, 表面煎得焦香;男友的澳洲M5和牛有8安士,份量明顯適合男士胃口.一刀下,粉紅色的牛肉清楚可見一層脂肪一層肉,口感外脆內嫩,油花豐盛,肉吞下喉口腔內仍充滿油香,95分!真係好罪惡~~~男友切下小塊澳洲和牛俾我,肉質比較結實,牛肉味較佐賀牛濃,中間心仍保持粉嫩, 85分,very good!不過我仍然眷戀着自己的油花和牛,真係太美味了~

完美的一餐甚少得甜品呢?問侍應有何選擇? 答案竟然係:[廚師隨心製作, 個個唔同. ]咁有趣? 就靜心等待.數分鐘後,兩份甜品上卓,我的是凍紅酒雪梨; 男友的較別緻,一隻高身玻璃杯內盛着半透明jelly及一些生果肉,頂端有層蛋白mosses, 仲有粒龍珠果伴碟. 冷藏過的紅酒雪梨,酒浸至雪梨一半厚, 甚爽口, 只是紅酒未夠突出,50分!男友的jelly夠清新,可能之前的和牛有點膩,我較欣賞這個,70分.

一餐愉快的晚餐, 食物,環境及服務同樣重要.是晚和牛套餐$488起, 以價論價並不廉宜,但以貨論價可算合理,要知道高檔超市一塊靚牛也2-3百起,是晚所花的已物有所值, 若然位於中環, 定價必然更進取.對自己好些, 偶爾豪一次也應該, 下次一定另約識食之友同來 ,再嚐難忘的罪惡感!

若非朋友帶路都唔知道有一新開熱狗點於灣仔, 本着陪食既心又未有心水餐廳下一試.當時已過放工時間,顯然人客較少,可以坐低慢慢食.

熱狗有跟套餐或單點, 我跟友人皆散點.除左熱狗,仲有小食,沙律及飯,唔會獨沽一味

熱狗我揀左蟹籽蟹棒及木魚花椰菜豬肉腸. 前者是仿蟹棒,不過質感及味道有8成似, OK喎.條腸皮脆之餘仍帶肉汁, good! 友人的木魚花椰茶都好好味, 木魚花多,配豬肉腸好夾, 好和風FEEL
小食我地點左釀芝士雞翼, 薯絲炸蝦及一個雞飯2份SHARE食,薯絲炸蝦好香脆唔油膩, 薯絲改層好脆,食到內圍係軟軟地,食到蝦肉又變爽,強烈推介~
釀雞翼漲卜卜, 芝士分灑上面,雞翼整得剛剛熟一樣,咬下熱辣辣.中間心除左雞肉仲有芝士及椰菜, 芝士雖然唔係半溶那種,但唔太heavy感覺剛好(芝士迷或嫌唔夠).
最後個飯細細碗,雞肉粒+滑蛋本身已係絕配, 有D汁送飯先緊要呀.如果蛋可以多些少就好了.

熱狗已經唔只一條腸+一PET介辣/茄汁咁基本了, 花D心思可以變出好多花款, 繁忙既都市人仲分分鐘當晚飯食,我會記得這熱狗店, 一人晚餐又多個CHOICE.

跟大胃朋友食飯,最好當然揀可任食既餐廳啦.記得食過大和燒係幾OK既,仲有團購價,不作他想,一於覆卓.

食物選單有7-8張紙,我地狂風掃落葉下點左幾輪食物:

火灸壽司系列-左口魚背邊,深海赤鯥,日本魴弗,蔥蒜三文魚茶漬等, 赤鯥即係板X壽司賣緊廣告那種魚,食落冇乜特別,不過好驚喜哩度有得食.三文魚茶漬幾特別,蔥花微香,加上少少焦味, 層次感豐富,good既!魴弗魚魚紋幾明顯,初時以為係腥既,食落又好彩冇,但唔算滑,唔係人人喜歡.左口魚背邊一向係我至愛,微焦香+魚油=滋味無窮,我推介朋友食過後大家都有encore.
其他較特別既壽司:安康魚肝,三文魚士多啤梨醬,玻璃蝦等, 加左stawberry醬既三文魚幾sweet, 女士一定鍾意. 魚肝壽司唔敢食,因為個人唔多食內臟,友人們食後感係[ok吖].玻璃蝦一如以往大隻, 蝦肉彈牙,like~
卷物點左特別d既:芝麻香辣三文魚碎卷及火灸蟹肉魚生太卷,前者飯邊圍哂芝麻粒,好香口,唔會太辣,幾好; 後者蟹肉幾多,伴上沙津醬同飯中魚生鮮味倍增,比較下後者險勝!
刺身今次等得耐左, 不過賣相好靚,估唔到佢用船上.8款任食刺身點齊, 魚生片幾厚,唔小家.唯甜蝦細隻d.北寄貝呀,鮑片,螺片都有嚼勁,希靈魚仲切得好大片,但個人唔太欣賞此魚類, 咬一啖就放棄.
炸物點左吉列蠔及吉列海蝦,炸粉再薄d就好了, 好難跟貴價日本料理比較,但蠔及蝦都都夠熱,蠔保留到肉汁,幾juicy,3個蠔癡第2轉叫左8隻,好誇張 蝦又脆又香,只係細隻d.
燒物今次冇左蒜片燒牛肉粒,勁勁勁失望呀點左燒茄子,燒菠蘿,燒粟米,串燒花枝丸等, 燒粟米比較失準, 未熱哂,又冇焦味,扣分.

環亞美食叫左豬大腸,青酒煮蜆,辣花螺,前3樣份量都細左,可能初落單時寫2人,要注意.
6寸薄pizza皮勁薄喎,冇咁滯肚,味一般啦,有hawaii及粟米tuna,要趁熱食先好味

食左近一個鍾,已經9成飽了, 死都唔肯放棄既係北海道牛乳奶凍及木糠布甸.個奶凍細兜左可能今次係團購價,每日限量供應,食左先算啦,好彩味道依然.木糠布甸份量不變,一杯滿既都食左8成,肚皮唔得了,友人們又食雪糕又食brownie,我又係得個睇字,不過肚皮已經好滿足,友人們食多3個字先收手.睇佢地個樣就知應該冇投訴.