天氣凍最好就係食拉麵. 難得有人話想試新野, 梗奉倍. 大慨7點半黎到. 前面有6-7人, 同對面豚王差不多. 等左大慨15分鐘就有得入. 舖頭之前係舞心拉麵, 個擺位同裝修都差唔多. 坐位都唔算好逼. 見到牆上寫原來全世界已經有好多分店, 最奇怪係印尼分店數目竟然同日本差唔多. 乜印尼人興食日本拉麵? 印尼唔係唔食豬架咩…難度嗰邊係雞骨拉麵?叫左濃湯豚骨拉麵加隻糖心蛋. 所有野揀普通. 湯夠熱, 好香但偏油同偏咸. 本身諗住試下佢檯上的拉麵醬油, 但因為已經偏咸所以唔洗加了. 麵身幼, 彈牙; 叉燒夠薄亦綿; 糖心蛋穿左, 好彩冇漏出黎, 裏面熟度剛好. 木耳普通. 檯上的紅薑絲雖然較乾身但襯拉麵幾開胃.總結: 幾好. 比起附近的日式拉麵, 收$ 68一碗算平. 如果想食拉麵又唔想排得耐可以試下.

我話要揾間火鍋店唔會好大煙的, 朋友竟然揾到間叫無煙火鍋, 果然利害! Book 左8點半上到去結果都要等10分鐘先入得. 原來裏面好細, 得大慨十張檯, 有d逼, 但有電視睇, 同真係無乜煙.湯底選擇幾有趣, 冇經典的沙爹鍋同芫茜皮蛋鍋, 有的都係特色鍋, 北海道牛奶呀, 海鮮粥鍋呀, 水魚鍋呀咁. 由於有人食辣有人食唔辣, 加左30蚊雙拼左血池麻辣拼番茄雜菜鍋. 醬唔算多, 但基本的荵蒜辣椒麻油都有.食物選擇都夠多, 基本上噏得出的都有. 牛有邊位, 脊位, 牛柳粒, 手切同安格斯揀. 駝鳥肉都有.野飲普通. 竹蔗水冇大支裝, 要逐支叫.食物品質一流. 有好多火鍋店野食通常得幾樣好, 但是晚的野食除左乾淨, 絕大部份野食都好好. 比較印象深刻的有: 牛切得夠薄兼好有牛味. 駝鳥肉好似本地牛咁滑. 西洋菜餃皮薄但裏面夠爽. 粟米夠晒甜. 響玲好大條. 午餐肉沏得好靚.野食好快上. 服務都好好.總結: 食完大家發現, 今次咁多人都竟然淨係叫左一個牛盛宴! 大家總結係因為由於好多野都好味, 所以其他野食多左, 牛肉反而唔洗咁多. 夠晒健康! 以呢個價錢, 佢的食物質素真係好ok. 地點都算方便, 好大機會會encore!

星期六大概8點黎. 門口都有成8個人等位/外賣, 間舖原來好細, 入面得3張檯, 出面有兩張. 菜單好簡單, 單或雙拼湯或煎餃, 有韭菜餃, 白菜餃同雲耳豬肉餃. 另外就有車仔麵, 同野菜葛例湯. 叫左雙拼湯韭菜&白菜餃.

等左成十分鐘先有得食, 發覺都幾街坊舖, 裏面包餃的人會同d客傾下計, 熟客又話唔收你杯豆漿錢. 好有人情味.

D餃真係皮薄涵靚. 菜肉比例剛好. 感覺冇乜肥肉. 個人鍾意韭菜餃多d, 因為比較香. 碗湯都係正野. 完全係自家靚野菜葛湯, 清清地冇油. 飲晒.

總結: 想買d返屋企煮, 可惜冇晒韭菜白菜餃. 好味加價錢合理. 有機會會encore.

排一蘭時有人話呢間’冇heart’拉麵都ok. 個湯底好清. 有日放工就黎左, 完全唔洗等位. 見舖面都幾靚, 以為裏面都ok. 估唔到裏面冇乜裝修. 播住日本跳舞音樂, Kawaii 聲嗰隻, 有d煩. 3款麵揀. 普通豬骨, 黑蒜同辣. 要叉燒同蛋要加$. 仲有d小食例如餃子. 照例第1次黎叫普通豬骨, 普通硬度麵.

湯望落唔覺清, 但飲啖就覺幾清. 冇乜油, 有豬骨味. 麵唔得, 似煮淋左的公仔麵…蛋煮得幾好, 冇過熟, 幾有蛋味, 但好咸. 叉燒係燒過的, 偏肥但可以接受, 都係咸但冇隻蛋咁過份. 仲有木耳同芽菜, 普通野. 份量好似比一蘭大. 由於湯同麵淡, 但餸咸, 感覺似食中式粉麵, 用餸去食碗麵.

總結: 銅鑼灣而家太多日式拉麵舖揀. 呢間碗麵只係OK. 應該唔會返黎.

話說有位朋友有日突然whatsapp黎, 話正響呢間西班牙餐廳的soft opening, 話個廚之前嚮El Bulli 做, d野好食打算會再返黎. 心諗嚮El Bulli 做肯定勁貴啦, 點知有人check 下 timeout話都係大慨400蚊. 就打去book, 點知話成個月都full晒, 叫我下個月頭再打去book兩個月後. 心諗: 咁串?!?! 就係因為咁串, 我地幾個就覺得一定去食, mark calendar 6月1號打去book 7月!

間野真係好隔涉. 附近乜都冇. 好彩有google map, 唔係都唔知搵幾耐. Book左都竟然要我地等下, 唯有出去煲支煙. 煲煙期間睇review, 笑喊比例竟然係3比2. Review話suckling pig 得兩隻麻雀咁細. 唯有希望唔係tapas的唔會咁細.

原來入面好大. 雖然裝修同staff的衫好似high end的餐廳, 但裏面係嘈嘈閉的. 食西班牙野咁樣其實仲好氣氛. Menu 兩版tapas, 半版主菜. 甜品基本得兩個.

Sangria: 冇生果, 唔開心. 紅酒比一般的多好多. 紅酒味重但酒味唔特別強勁.
Bread with tomato: 幾大碟但個麵包其實好薄, 好脆, 個人覺得番茄唔夠.
Cod Fish: 個texture好特別. 肉質似免治魚生, 韌韌地, 好似有筋咁, 但事實又唔係. 味普通. 基本上都係靠cod fish本身的甜味加olive oil.
White Asparagus: 汁幾好味. 但露筍好太大條. 點得唔多汁.
Ham, Cheese and Truffle‘Bikini’: 三文治一份. 好多truffle. Truffle好香但又冇蓋過ham的香, cheese亦溶得剛剛好. 好好味.
Tomato Salad with tuna: 紅綠番茄. 番茄較生. 吞拿魚算少, 味幾好肉唔鞋. 但整體普通.
Lobster Rice: 話係brother of Paella. 一黎到見到個煲咁大, 以為都有番咁上下份量. 點知一打開, 冇野既?! 要坐高先見到裏面有野…@.@ 四個人分, 每人得一匙羹半飯. 龍蝦亦好細. 不過龍蝦非常鮮甜, 飯al dente, 汁幾好味.
Mushroom: Side dish黎. 反而份量正常. 用左洋荵仔煮, 唔油膩, 幾好味.

以佢的價錢服務真係麻麻, d staff好似好多人, 走黎走去但又唔見佢地做乜. Observe左個黑衫鬼佬  一輪 (因為幾型 XD), 行黎行去望下我地張檯, 見到我地食完但又唔收野, 朋友想食lobster claw時舉左手一輪幾個經過都唔醒水.

最奇怪係我地食完後, 突然聽到 ‘澎澎聲’, 原來係對面檯叫左個大suckling pig share, waiter放左個dish響其中一個女仔後面, 由於個suckling pig 切得唔好, waiter要再切, 但佢竟然就咁順手攞左隻碟劈落隻豬度. 個女仔嚇到擰轉面, 卑我我實行開, 大佬你咁近距離劈, d碎實飛落我件衫度…總之就睇到我O晒咀.

總結: 每人$400女人都食唔飽. 甜品menu冇野好叫, 要轉場食甜品. 四人一致認為雖然野食係幾好, 但其實Fofo 都好好食, 又冇咁貴, 服務又好d. 冇人打算會返黎.

竟然有人提議一蘭第一日開張去排隊食, 難得又有人肯同佢癲, 一齊同你地癲返晚啦. 7點半去到已經預左條龍勁長, 估唔到門口竟然寫住要排4個鐘. 一路排都有講過不如放棄啦, 但排下話要去㩒錢又去附近買d小食, 幾個人吹下水就不知不覺排左2個幾鐘. 都排左咁耐都唔爭在排多陣, 最終排到11點3就有得食了.

環境比一般拉麵舖大好多. 收銀counter有賣拉麵醬, 拉麵+拉麵醬set, 衫, 襟章, 嘢飲. 牆上有顯示每格檯有冇人坐, 亦用燈的顏色顯示坐左幾耐. 櫈下有sensor, 一坐低就有人黎收單. 自閉空間檯好乾淨, 見抹檯的人都好認真抹. 讚.

一坐低即刻斟杯水飲. 每個位有個別水嚨頭, d水非常凍. 炎炎夏日特別正, 亦可以黎清左口的味.

普通硬度麵 + 普通濃度湯 + 1/2 辣 + 白荵, 另追加隻鹽半熟蛋: 一黎即刻飲啖湯, 好香的豬骨味, 湯比Ramen Joe 的多油, 但唔過份多. 最初估佢d辣醬唔荒辣得去邊, 估唔到個辣醬都ok辣. 不過我覺得撈埋辣醬後辣味蓋過左豬骨湯的味, 完全唔辣會更好. 配菜原來真係淨得荵, 有d 失望. 蛋的蛋味都濃, 自己嗰隻生熟度OK, 但朋友的就有d過熟. 麵係我鍾意的幼身拉麵, 都幾彈牙. 叉燒好味, 超薄切, 唔肥亦一d都唔鞋, 可惜分量少左d. 整碗麵的份量男仔食應該要加底.

另外叫左香港限定的豆腐, 29蚊兩個. 都幾細個. 板上建議先食一啖冰凍豆腐清除口腔的味道再食拉麵, 可惜豆腐唔係冰凍的…似乎用佢的冰水清除口腔味道較實際. 豆腐黏黏地, 有d 花生味幾好味. 食完拉麵加d黑糖漿響面當甜品較齋食好味, 黑糖漿唔算太甜, 不錯.

臨走前去廁所. 出奇地好. 雖然得一格, 但夠晒大. 坐廁係日本智能坐廁, 牆上有12卷廁紙, 每卷上有張卡紙畫左個動物樣, 應該係代表十二生肖. 呢個design幾好, 至少d staff唔洗成日換廁紙先…洗手盤再有驚喜. 出水位左邊出的竟然係番鹼泡. 右邊就係吹風機. 以拉麵舖的廁所黎講, 呢個廁所算係好正.

最後服務方面真係幾好. 可能係第一日開幕特別好, d staff全部都好nice, 排隊有成4個 staff維持秩序, 日本人經理都不時走出黎麻煩大家排埋d唔好阻住其他舖頭的出口.

總結: 食過香港咁多間拉麵, 我覺得一蘭碗麵屬於3甲, 但未好到我會話佢一定係最好. 排隊方面, 好似淨得豚王有佢咁長龍 (雖然個人唔覺豚王好好食). 如果兩間都要排, 我一定排一蘭, 因為一蘭環境配套好好多. 不過你話值唔值排3個半鐘呢? 我只會話再係咁長龍, 我唔會再排囉~ 因為始終最後嗰個鐘真係排得有d辛苦. 不過其實真係好睇你同乜人一齊排, 如果大家要排, 揾d多野講的吹水朋友一齊排時間其實好快過.

未黎前一路以為呢間餐廳係主題餐廳, 綽頭嘢. 所以一直冇興趣試. 後來有同事話d 拉麵其實幾好食, 有晚就黎試左.
入面原來都幾細. 三尖八角令我諗起d樓盆呃鬼嘅鑽石型廳. 坐bar枱可以睇住師傅整麵, 高櫈驚喜地舒服. 本來想食季節限定的擔擔拉麵, 但諗下第一次黎都係叫正常湯底試下好d. 響冇哂味噌湯底下叫左豉油湯底.
麵黎到覺得好似幾細碗. 料冇乜, 䈡, 幾條筍同一塊肉, 冇蛋 後來食左輪先發覺麵都幾多. 個人其實麻麻豉油湯底, 但呢個幾啱我口味, 湯底幾香, 鹹味適中, 帶少少甜, 唔算油. 麵身偏硬, 麵屬幼身但好在唔會太幼, 太幼掛湯太多會太咸. 肉肥但不太過份, 肉質有d鞋但勝在切得薄. 蔥唔夠多. 筍冇乜特別.
裝筷子櫃桶內有張簡介講佢地由湯底至製麵都好認真.
總結: 碗麵真係算幾認真, 麵幾好可惜塊肉麻麻. 加上價錢貴. 拉麵銅鑼灣大把選擇, 未必會再返黎了.

星期六晚大慨8點黎到, 由於冇得book 位, 要等大概20分鐘先有檯. 個manager都幾識做, 問要唔要野飲一路飲一路等. 張櫈坐得麻麻地舒服, 音樂都幾大聲, 傾計有d困難. 到睇餐牌先知原來淨係得pizza同小食叫.

Meatball: 估唔到咁大粒, 個presentation都幾靚. 原來係豬肉丸. 肉質唔夠實但味道不錯.
Marinated beet salad: 好味. 估唔到會有隻烚蛋響面, 仲要係有少少流心. D beetroot 粒同出面食的唔同, 爽爽地個texture好好. 雖然係腌左但味唔會太濃, 連埋ricotta salata食好好味. Anchovy好在唔係好鹹.
Cremini Mushroom Pizza: 好大份. 淨係切開左4份. 食起來亦有難度. 一攞起d 水即刻滴晒出黎. 成個pizza好濕. 底薄但個邊好厚, 有幾塊個底好燶, 食落好苦. Pizza質感食落似食緊中東包. 個人同朋友都覺得都係小脆的pizza底比較好食.
Margherita Pizza: 都幾失望. 茄醬唔夠, 芝士份量夠, 但芝士味唔濃. 同樣pizza整體都係好濕.
Tiramisu: 質感OK但酒味唔夠, cream 太多.

冷氣唔夠, 越食越熱.

總結: 間野主打賣pizza, 但pizza 實在麻麻. 好難會再返黎.

有次睇明周見有個訪問響呢間度做, 見d野食同裝修都好靚. 就上網search左輪. 發覺原來呢度未開業已做宣傳, 皆因老闆係前名模, 人脈當然廣. 終於兩個禮拜前約左班女人黎食.

舖頭比想像中細. 一如所料裝修好優雅, 好girly, 餐具擺設都十分精緻. 檯都夠大, 但張櫈好硬, (張櫈應該係噴左漆的鋁做), 坐得唔舒服. 4個人叫左1個gentleman, 2 個ladies.

茶自己叫左台式green milk tea, 都幾大杯, 味道幾好, 甜度適中, 但對我來講綠茶味唔夠.
食物方面, 份量好細, 男人不宜. 由於成兩個禮拜前食, 實在唔記得所有食物的味道. 我只可以講大部份野都唔屬於好食. 尤其是afternoon tea的精華 — scone. Scone 唔熱, 乾, 一切碎晒, 冇牛油香味…可以話係成舊都冇味. Clotted cream 唔香, 同jam都係普通貨色. 沙律非常清, 真係淨係落左橙汁…冇味. 咸點仲有個蟹味的cream狀物, 個味其實都幾醒, 應該唔係個個人接受得到. Mini-burger 算咁多個咸點比較好的, 起碼肉唔鞋, 包算鬆軟. 甜點方面, 大部份都算ok, 但唔算突出. 由於本人從來未食過一間舖整的西式甜品可以用難食黎形容, 所以嚮我心目中, 難食的西式甜品根本唔存在, 加上自己嗜甜, 所以'ok的甜品'響我的世界裏係唔會為一間食肆加分的.

總結: 無可否認佢的裝修係幾靚, 餐具擺設都好正. 但我始終係黎食野, 收酒店價但d野食唔好食, 坐得又唔舒服, 仲嚮d咁偏僻的地方, 我睇唔到點解會返黎.

好耐之前聽人講話呢間的吞拿魚生飯好正, 但次次經過都好似要等位, 有日見落雨少d人就試下. 入面係舊日本舖頭裝修, 坐得都幾逼下.都有幾款揀, 除左吞拿魚飯仲有普通粒粒魚生飯, 三文魚飯同d小食. 但既然吞拿魚出名, 就叫左個荵藍鯨吞拿魚蓉飯.

我本身唔係特別鍾意食吞拿魚, 但佢D吞拿魚蓉真係好香, 魚蓉唔會覺得爛到一pat 野咁. 可惜荵粒唔夠多. 飯我覺得稍過黏同淋. Set的配菜唔得, 菜絲冇味有渣, 玉子太硬, 唔夠蛋汁同蛋味. 味噌湯幾好, 濃度適中, 都幾多料.

總結: 以呢個價錢, 佢的吞拿魚生飯真係不錯. 配菜真係唔得, 如果要食, 齋叫魚生飯就ok了.