行過咗街市沿石仔埗街兩旁有唔少石屋，呢檔茶果好隱蔽又無招牌，檔主阿財叔坐咗響對面士多打牙骹，如果唔係佢話有茶果賣差D過咗龍。本來分咸甜兩款，咸嘅餡係眉豆而甜嘅餡係花生，賣剩三個甜嘅$10賣埋俾我地就收工。拎住D茶果一路行到街尾有個碼頭，望住個大海吹吓海風，然後排排坐食茶果，別有一番滋味。至於茶果嘅味道都唔錯，餡料十分多而個糯米皮又幾煙靱。昂平大澳美食一天遊隨著太陽緩緩消失於水平線下而告終。

離開永安街過咗橋去到石仔埗街，呢度有幾檔賣海鮮，買完拎去酒樓食，價錢唔貴，呢段路有幾檔小販，最旺係呢位阿伯嘅雞旦仔，成日都排長龍，阿伯好有心機慢工出細貨，唔會好生意就求其，整完會先放響到揾把大葵扇“put put”先。一路等一路睇海鮮檔生劏十斤重大海鱸，既殘忍又剌激。睇完劏魚show就有得食。如果北角個D夠脆口而牛頭角個D有內涵的話，阿伯呢檔就兩者俱備。
另外，有一檔燒魷魚乾都係由一位阿伯處理，燒得好香，燒好後阿伯仲會好有技巧咁剪咗燒燶咗嘅部位出嚟，呢兩位阿伯個種處事認真嘅態度，時下年青人好應該學吓。

食完豆腐花行過隔籬嘅餅鋪，見到成盤牛油曲奇餅新鮮出爐，聞到好香，買番幾個試吓，食落唔係好甜仲有少少咸味幾特別，入口十分之鬆脆。當然同食開藍色罐果隻牌子截然不同，唔可以話邊D好食D，口味各有不同，但呢D地度風味確有佢嘅特色。

食完飯沿海濱長廊行番去大澳，一路景色怡人，見到唔少候鳥在荒廢的鹽田上悽息，另一面又有一望無際嘅大海，心境都開朗晒，乜嘢金融海嘯都可以暫時忘記先。行入永安街有好幾檔豆腐花，但係一早就預咗嚟呢間，老板娘好好客，有食客想借洗手間，雖然無得借用但都好熱心教佢行條捷徑。食咗豆腐花（$7）同合桃露（10），豆腐花的確好滑，加埋薑汁糖水，簡直係絕配，合桃露都好正，真材實料兼磨得好滑，真估唔到大澳都有咁出色的甜品。

原來坐巴士落大澳都好快，只需十零分鐘，不過班次疏落一個小時得一班車，去到大澳就先去醫肚，由巴士站行去南涌村都幾遠，不過天氣好條路又直都幾好行，行到村口有箭咀指示都好易揾。外邊睇唔知係餐廳，去到都幾full不過都揾到位。好多食客響大澳買咗海鮮拎嚟煮，不知收費如何？
人數少只叫咗生炒骨、荔茸酥卷同八寶佛湯，生炒骨D排骨係即炸入口仲熱辣辣同脆口，水準算高，荔茸酥卷一樣係係即，雖然幾多油但係夠晒香口，八寶佛湯裡面有好多材料，個湯好清甜，無落味精飲完唔會口渴。地方較為偏僻但價錢與一般食肆無異，不過水準就比起市區好多食肆都高一綫。

假期到昂平大澳一遊，先坐昂平360到昂平市集，話雖車費不菲但坐咗廿幾分鐘而沿途又咁多風景睇都抵喇！上到昂平市集，全部都係呃鬼佬嘢，連食物都係，不如行過隔籬寶蓮寺食番D齋點心。小賣部都幾多嘢食，叫咗齋滷味，只得酸齋同齋鴨腎，味道普通但係熱熱地都算OK，又食咗幾件甜點，砵仔糕、西米餅同糯米糍全部都唔係好得，好彩只係當小食，好戲在後頭。

聖假期去行工展會見到咁多人買嘢，差D唔記得有金融海嘯，究竟個浪重未到抑或趁早入定貨積谷防飢？行完就過嚟食番碗牛腩，非繁忙時間都好多人要排隊，就算識得華姐都要排，好彩唔係等咗好耐。叫咗幾碗唔同款嘅粉麵，分別係牛腩、牛筋同爽腩，牛腩好瘦但唔會“un”，牛筋夠淋，爽腩雖然帶一點肥膏但食落一D都唔會覺得肥。最正當然係佢地嘅清湯，好好味又唔會太咸，成碗飲晒，河粉夠滑但麵就好重鹼水味。雖然$24碗係比其他貴咗D，但係一分錢一分貨，食到好嘢就唔會嫌貴。

天氣轉涼朝早最好係食番D暖胃嘢，糯米雞係一個唔錯嘅選擇但係晨早就食到咁飽，唔係好啱我。見到呢度有細細盅嘅排骨飯又幾好噃，加埋飲品都只係$18又算幾抵食。真係幾的色，但排骨都唔少鋪滿飯面，豉油係獨立包裝，不過淘大出品向來麻麻，唔落仲好，本來相當唔錯但可惜D飯唔夠熱只係微暖，美中不足，如果熱辣辣食就正晒。

食完拉麵行過呢間老字號，雖然已經肚飽但仍想食番個豆沙窩餅（$7）當甜品，呢度D豆沙窩餅同其他上海鋪好唔同，個餅又圓又扁，預先整好再響鐵板度翻熱，再剪開幾塊，食落好香口，豆沙唔會太甜，最好係唔會多油。食完見到D北京餡餅（$7）好似幾正又叫個嚟食，果然餡料豐富，韭菜好香，一句講晒，正！

星期六下午路過佐敦，沿百加士街行近佐敦道一截仍然熱鬧但越行越冷清，原來有不少鋪位空置，在現今經濟勢頭下，呢間食肆都算生不逢時。鋪位不大，採用開放式厨房，厨師預備食物可以一目了然。點了八王子拉麵（$43）、胡椒拉麵（$39）、味增拉麵（$38）同炸餃子（$19）。全部配料都差唔多，都係义燒同半隻溏心旦，標榜牛骨湯底但牛味並未想象中濃，胡椒味更把牛味完全蓋過，味增湯反而唔錯，不過可以肯定係無落味精，飲晒D湯都唔會口渴。最欣賞並不是湯底而係拉麵，不知是自製還是來貨，麵質爽口彈牙，可以學日本人咁食到聲。炸餃子嘅水準亦唔錯，炸得香脆而餡料又有鮮味。整体而言是一間水準不俗的小店，全店由老細、厨師到侍應都係年青人，服務快手快脚亦不失禮貌，而且厨師相當健談，氣氛富人情味，希望佢地可以撑得住繼續做落去。