魚一丁刺身居酒屋 (宋玉生廣場(皇朝))

黎漁人碼頭想食日本野，可以黎呢間充滿歐陸風情既日本北海道食品館。我地今次選擇左樓上既魚一丁，雖然香港都有，但朋友係第一次食，所以都好開心！
呢度既餐牌同香港差唔多，價錢亦相若，整體份量比香港多，變相係抵食啲既。
叫左以下食物：
1)一丁拉麵沙律(魚一丁最出名既食物，拉麵彈牙，生菜新鮮爽脆，配上酸甜芝麻醬汁，是夏日徍品)
2)滑蛋豬扒飯(普通既食物，冇咩特別，勝在熱辣辣，香氣撲鼻。不過飯量太多，最終都係食唔晒)
3)芝士炸雞土豆燒(鐵板上既炸雞舖滿厚厚既芝士，底層係薯仔，非常飽肚，食多件就開始膩喇而且呢度冷氣好凍，食物好快受涼變硬就唔好食喇)
可能俾樓下和花亭搶左好多生意，上黎食飯既人少之有少，繁忙時間都係得兩三枱客，啲侍應唯有企係度發呆，又或者不停幫你收碟同加茶，應該多啲宣傳先得喇！
以往日本餐廳都會用綠茶，但呢度竟然係中國紅茶，有少許奇怪！
其實呢度幾好坐，食物亦ok，大班朋友傾計仲一定唔會有人趕你走哩！

誠昌飯店 (氹仔舊城區)

如果有睇開旅遊特輯，都會聽過呢間係 氹仔至出名既食店，佢地最有名既係水蟹粥同炸墨魚丸鯪魚球。
小妹第一次食水蟹粥，見度成隻蟹浸係窩粥度真係幾得意！粥身唔算綿，清清地好易入口，蟹膏都落入粥度，幾有咬口。而蟹肉雖然唔多，只有一隻蟹既份量，但肉質好鮮甜，一啲都唔腥，係要拆蟹殼麻煩啲即！
正當我地猶豫食墨魚丸好定鯪魚球好時，侍應阿姐好細心咁提議我地叫一碟雙拼，咁就可以一次過滿足兩種口味喇！魚鯪球新鮮熱辣，而且超彈牙，冇骨又唔腥，而墨魚丸用料十足，係有少少硬，但食得出係鮮墨魚打出來的！不可不試！
呢度一窩細水蟹粥要成九十五蚊，係有啲貴，但人一世物一世都要試下既！
食完仲可以過對面鉅記買手信哩！

船屋葡國餐廳 (下環)

聽人講船屋係澳門食葡菜必去既餐廳，所以就算地點比較僻都慕名而來。因為塞車，遲左預約時間半個鐘先到，好在都俾我地入去，不過個侍應好搞笑咁問我地做乜遲到，好似老師咁。
餐廳地方唔大，有唔少外國人同一家大細，全部都預先book位來，如果walk in既話好多時都被拒諸門外，就算當時有空位都冇人情講，認真有guts！
餐前每人有一個豬扒包質地既餐飽，都幾大個，建議唔好食晒先，如果唔係就食唔落主菜喇，不過好肚餓又另計！
人少少叫兩個主菜就夠喇：
1)西班牙汁燴蜆(蜆肉鮮味，蕃茄汁帶少少辣，非常惹味醒胃，用汁點餐飽更好食)
2)葡式海鮮燴飯(用煲仔上既飯唔單只可以keep住溫度，仲可以保持鮮味。燴飯濕濕地，非常入味，用料有好多蝦，兩件蟹同兩隻大青口。燴飯唔似焗飯咁膩，所以雖然份量多，但慢慢食都食得晒，仲回味無窮添)
3)餅乾碎牛奶忌廉布丁(其實即係木槺布丁，可能一向食開既都比較"實"，呢度既布丁好似慕絲咁，只係比糊仔杰少少，質感麻麻，好似未雪硬咁，但味道係ok既)
呢度冇清水供應，如果需要就要用廿幾蚊買一枝，勁唔抵，所以最後我地都係叫可樂算。
總括黎講食物幾好，如果人多啲可以試埋葡國雞，都好出名的。
呢度既侍應大部分唔識講粵語，落order時要講英文，都幾high。
不過有一樣比較差，就係厠所塞左都冇人理，要扣少少分！

ENZO Café (新口岸)

平日既澳門漁人碼頭非常清靜，本來諗住去食下午茶，但幾乎所有食肆三點後都落場唔做生意，唯有去cafe hea下當食午餐啦。
呢度環境清靜舒適，食下cake，聽下音樂，傾下計，實在係非常寫意！
食物款式唔多，主要係sell巴西咖啡，我唔太好coffee，所以叫左一杯木瓜特飲。另外order左檸檬批同雜果批各一件。
木瓜特飲同木瓜奶差唔多，但飲落又好似唔只木瓜同奶咁簡單，味道唔錯，仲有瓜肉，喜歡木瓜又或者想補一補既姐妹可以試下！
朋友既Mocha coffee賣相唔錯，偷飲左一口都幾好飲。
檸檬批好rich，檸檬味好濃，證明係落足料，酸味味的感覺清新。
雜果批就冇咩特別，普普通通啦！
佢地既批件頭幾大，直徑起碼10 cm，細食既最好同人分享喇！