Bistronomique 

係soho尼個餐廳林立既地方，而且間間既午餐menu都差唔多。要搵到一間又好又抵食既真係要逐間試。今次試下Miele guide top500既餐廳，午餐menu唔太貴大概120蚊。餐廳內部擺放左幾張法國電影既海報同皮椅，感覺幾整潔美觀

頭盤叫左凱撒沙律同吞拿魚沙律。就算係頭盤，餐廳都很用心。吞拿魚沙律外表不俗，用黑醋醬配上輕輕焗過外熟內生既吞拿魚同沙律菜配合而成。有趣既係凱撒沙律，餐廳將巴馬臣芝士，脆麵包片和脆煙肉粒放在原條羅馬生菜上，仲用醋銀魚代替咸銀魚令沙律味道不會太單一，加埋日式流心蛋作配菜

美國西冷
佢既西冷算係一個高質素既西冷，肉質鮮嫩而且牛味香濃。讓人感覺唔似百幾蚊既貨色。配菜雖然簡單但係製作認真，唔會水流流淡謀謀。個汁有少少甜味，加上焗到有脆邊既薯仔，令整個牛扒既味道好全面豐富。

忌廉薯蓉石班
令人好滿足既一道菜，表皮煎香既石班肉質唔會好似普通石班咁鞋口，反而可以好似銀鱈魚咁一片片咁拆出尼食。加左牛油同忌廉製作既薯蓉非常香滑幼細好似忌廉一樣。值得讚既係佢加入左一些用油醋處理過蕃茄碎，調解左忌廉薯蓉滯既感覺。

收得咁既價錢真係物超所值，如果個餐前包可以改進下咁就prefect喇！

Coffee room

Simonelli 機
Green field 奶

位於the one既咖啡店，價錢比連鎖咖啡店平，而且佢地有唔同既單品手沖咖啡（雖然都幾貴），感覺似精品咖啡店同普通咖啡店既結合。

Maple syrup banana tart 
上碟有朱古力畫花同楓葉糖漿點綴
Tart 上邊既植物忌廉令tart既造型好堅挺，但係缺乏左新鮮忌廉既軟滑感覺，仲會有一種膠膠既粘口感覺。忌廉底下有用糖煮過既香蕉，而tart皮用上硬身既曲奇皮。整體都算配合，香蕉味亦能夠發揮出來。可惜楓葉糖漿和朱古力醬重疊擺放，令朱古力漿既味蓋過左楓葉糖漿既味。

另外叫左佢地cappuccino，同大路香港咖啡店一樣，佢地既blend偏向苦同零酸味。這種咖啡比較適合沖加奶加糖咖啡，如果飲黑咖啡就會好苦喇。味道唔算太差，都有輕微回甘，不過又飲到綠田源green field 既蛋味，真係唔知點解咁多咖啡店鍾意用。比較奇怪既係佢用隻高窄身杯沖cappuccino，感覺好似大半杯都係泡咁。

Cafe Je t'aime

一間好像童話世界既咖啡店，藍白色既設計同傢俬，加上花圖案既梳化。仲有法國風味同貓貓壁畫，感覺好似一個愛旅行既女仔既房間，吸引左喜歡蒲咖啡廳既年輕女仕。

百利甜酒芝士蛋糕
同New York cheese cake 既感覺唔同，質感介乎日本芝士蛋糕同New York cheese cake 既中間，林林地但係又唔會太水。軟同硬主要係忌廉芝士同忌廉既比例調較。第一啖既感覺酒味都幾出，但係食食下就會慣左隻味變返普通蛋糕喇。

初戀
很清爽既夏日飲品，用上青蘋果梳打，檸檬汁同杏仁雪糕製成。青蘋果既酸味同雪糕既creamy感覺唔算相對抗但係又唔係特別好飲。

薄荷咖啡
濃縮咖啡頂層，忌廉既中層同低層既薄荷顏色分明外表非常討好。聽左咖啡師既建議唔好搞直接飲，不過可能無一次過飲哂3層感覺有點奇怪，特別係最低果層既糖漿。

手沖耶加雪夫
這家咖啡店既精品用上香港Syphon 冠軍 cafe Accro 炒既咖啡豆。今次我試既耶加雪夫，同平時飲開淺炒既耶加雪夫分別很大，這種比深炒既豆通當用於Syphon 。濃郁既nutty味取代左耶加雪夫特有既果香花香，比較深炒既Accro 豆令耶加雪夫帶出溫和既苦味但係佢既檸檬酸味依然完整地保留。

宏

抹茶甜品套餐

抹茶雪糕拿破侖
用拿破侖餅上下夾住綠茶雪糕，抹茶雪糕非常有茶味而且唔算太甜，可惜拿破侖唔夠鬆脆，亦都好難切開，成淡放入口又太凍，有d摎攪。

抹茶小蛋卷
此店既鎮店之寶真係特別唔同，綠茶味既瑞士卷襯配抹茶忌廉。瑞士卷味既味道濃郁，而且有好香蛋味，加上滑滑既綠茶忌廉整體配搭十分和諧。

法式抹茶馬卡隆
外表不錯，抹茶味豐富。可惜都係脫離唔到馬卡隆太甜既味道。

京都宇治抹茶配白玉丸子

北海道3.7牛奶布甸
將紅豆蓉放在牛奶布甸上，外表平凡但係味道不俗。3.7果種特濃牛奶既味道好突出，不過可能係凝固用既粉用得太多，變左有d似啫喱既感覺。

雖然全部都係抹茶味道既甜品，但係又唔同既口感同甜度令整個套餐既配搭好平衡。

士多啤梨小蛋糕
新鮮既牛奶忌廉為蛋糕帶來香滑既口味配合豐富蛋味既瑞士卷味已經讓人非常滿足。士多啤梨在這個甜品擔當了重要既角色，酸酸甜甜既味道同士多啤梨既口感讓滯口既忌廉蛋糕帶來清新既感覺，而且士多啤梨既甜品居然可以越過忌廉既甜到達舌尖，一定用到高品質既士多啤梨先做到（原來叫做世界首創密閉室內無塵栽培草莓。。。）

斯里蘭卡紅茶 orange pekoe 
Orange pekoe係紅茶品質最高既稱號，雖然唔係好識，但係有除左好香既紅茶品之外仲有一種幽幽既甜味。

Hazel and Hershey 

奶：greenfield 
磨豆機：mazer
咖啡機：nuova simonelli 

今日介紹既係位於蘇豪既hazel and Hershey，係卑利街頂一個比較清靜既位置。

今次係我第三次去這間咖啡店，店內位置做左一點調動將炒豆機搬走左令成間店既空間感大左，亦都多左座位。

最喜歡這咖啡店既地方係佢有一種叫coffee of the day 既平咖啡 （25-30蚊）佢地會將一隻random 既單品咖啡用普通brew coffee既沖煮方法煮好，留係保暖壺度。普通咖啡店我唔會建議咁樣飲，因為用咁既方法通常會好苦澀。但係hazel 既用既都係d淺炒同炒得好好飲既豆，所以用這種方法沖煮都可以非常好飲


今日飲左specialty coffee of the day.
聞落有非常香既果香味，果香/果味係Ethiopia 豆既一大特色，最有趣既地方係Ethiopia 既唔同地區能夠種出唔同果味既咖啡豆，係e間咖啡店就選用左四款唔同果味既Ethiopia豆，可以嚐到既果味包括藍莓，提子，白桃，青檸，橙或者檸檬等帶酸味既水果。

而我今日飲既 sidamo halieslassie natural，menu 上寫住既係藍莓同提子，少有地我真係飲得出有莓既味道，這杯咖啡基本上可以話係無苦味，果酸味由熱到凍都好突出，加上果甜既餘味，感覺就好似飲緊果茶一樣。

仲清楚記得上一次飲過佢地Costa Rica Sonora honey. 名如其實，一入口就已經感覺到佢honey 既味道，佢未必係好濃郁既蜜糖味，但係佢帶出果種蜜糖香味絕對係一試難忘。

老闆birdie係咖啡比賽既技術裁判，又係炒豆大師。而佢本身亦都兼任其他行業既老闆，可以話係多才多藝。話說好似有部份咖啡店都係由其他行業既老闆開，所以....唔通真係要有錢先可以玩咖啡？

如果想真正感受到精品咖啡多姿多彩既味覺享受，Hazel and Hershey 絕對唔會令你失望。

談風 vs 再說
今次慕名而來，尼到牛頭角大業街既工廠大廈，一間由著名地下樂隊band 房改建而成既新潮西餐廳。band既其中一位成員原來係頂級酒店出尼既廚師，當然要趁佢未成名之前尼試下啦。

店舖以很raw的裝修，配上vintage既裝飾帶出舊香港的感覺。店內既空間好大，加上木感既傢俱感覺隨和舒服。不足既地方係全個餐廳都無吸音既物料，多人既時候都幾嘈幾應聲。

紅蘿蔔配紅蘿蔔沙律
由生既紅蘿蔔片配以熟紅蘿蔔，松子同cream sauce 再加上炸左既parsley。用簡單既食材為顧客帶來驚喜。

薯仔蕃茄雞肉
一般餐廳煮蕃茄的方法是將蕃茄煮林再加上茄汁。這味菜驚喜的地方是佢係用爽口既蕃茄代替煮林既蕃茄。令整道菜更清新。

雲呢拿洋蔥薯仔
一上既時候仲係度研究緊果兩塊係咩尼，原來係焗洋蔥。同一般既洋蔥唔同，這塊洋蔥好香好甜，而且焗到非常林，同主角雲呢拿忌廉好配合。

石班
有新鮮蝦粒同椰菜加椰菜花做既配菜，帶出好香既鮮味。佢仲用上新鮮既青豆，改寫左我細個因冷藏青豆帶來既壞印象。蘿蔔既薄度盡顯廚師既功架，唯獨輕輕炸過石班既略嫌有點鞋口，如果用鱈魚/比較滑身既魚可能感覺更好。

醃三文魚
這個係餐廳既名菜之一，醃好既三文魚用酸酸地既西芹啫喱，同薄荷雪（薄荷味既粉）整成一個有趣既分子料理。配上豆𦸅粉既印度脆餅，豆𦸅既苦味加上西芹啫喱既甜味同醋醃洋蔥既酸味令菜式更有層次感。

咖啡/飲品
佢地既咖啡質素也唔錯，雖然比唔上精品咖啡既特別口味，但係香濃得尼都好有層次感。
而佢既水果梳打系列係用都值得一讚。

零陵香豆甜品
一個非常新穎既做法。由豆做既奶凍，配上由black olive 同巧克力脆粒調製既醬汁。咸咸甜甜既感覺，加上奶凍香滑既口感，感覺很滿足很有愛。

總結。雖然位置比較偏，裝修同服務唔算頂級，但係以咁既價錢食到咁有層次既菜式真係令我非常滿足。佢地對每一個菜式都非常認真，每一個配菜都有獨特處理，加上完美既香草運用，令簡單既材料成為一道道令人驚喜既佳餚！

Tamper Coffee Company 
尖沙咀加連威老道嘉蘭圍3號G3

磨豆機：Mazzer
意式咖啡機：Speedster （又係果d十萬八萬既機）
House blend: Square miles 
奶：農場鮮奶（一隻本地既鮮奶公司）

今次試左咖啡師介紹既Juan ticona 玻利維亞手沖咖啡
每杯手沖咖啡都由咖啡師親自試味同親手送上。

咖啡聞落有果仁既味道，酸味同非常微既苦味融合在一齊。酸味入面有點苦味，苦味入面帶出果酸味，感覺非常複雜。咖啡很順滑，凍左既時候果酸味被濃郁既黑巧克力苦甘味取締，係一隻有好豐富口感既。

另外叫左一個latte，用佢地有名既square miles。 square miles 係由一個英國出名既烘焙師烘焙，再賣到世界各地。佢最出名既red bricks 係由巴西同哥倫比亞既豆拼配而成，再加上淺炒既烘焙，所以果酸味會比較特出而甘苦味就唔會太強。酸味重既咖啡通常都唔會用尼整加奶咖啡，不過e隻奶同這種咖啡豆都融合得幾好，飲落好似奶茶既香滑，奶同咖啡既甜味好豐富，完全唔需要落任何其他既調味。

如果大家係尖沙咀行街行到累，不妨去e間咖啡店坐下，座位雖少但係咖啡絕對唔錯。

今次尼到soho 既一間希臘菜餐廳，店舖外觀一流，淺藍色同白色既主調，加上地中海民歌作背景音樂，讓人一入到就好似聞到希臘既海風一樣。

湯係由肉絲西芹紅蘿蔔同米飯煮成，味道有少少似匈牙利既肉湯，又有點清湯腩既感覺

飯有咬口唔會太林，
加左洋蔥絲增加口感
巴馬森令整個飯既提升
就算成個都係素菜都唔會好

蕃茄海鮮意粉
意粉煮得既好唔會太林
不過味道比較濃，感覺似用茄汁做主要調味
海鮮料唔算太多，細粒同急凍
食到底仲見到成浸油係度
中規中距，有改善空間

雖然檸檬茶得一塊檸檬，不過最後都仲有個香蕉蛋糕，都算一個完整同滿足既午餐尼既

不過既價都算差唔多架啦