Ngau Kee Food Cafe    牛記茶室   (Closed)

行過見門口相片, 老闆個樣咁熟口面, 原來係上星期睇有線, 谷德超訪問個間, 但唔見谷德超訪問照片喎? 只有蘇絲黃訪問的圖片, 真係電視節目都有全套一站式服務, 經過當日只是下午六時左右, 好似未準備開始夜市, 但無理咁多, 照入, 果然真係! 冷氣都未開晒, 叫了出名的兩味餸, 蘿蔔牛腩煲, 蘿白每件切成長方形, 咬落不覺老和韌, 好味, 牛腩切成厚片鋪面, 肥瘦適中, 女士們可能覺得略肥, 湯味清甜呀, 衰在泠氣唔夠, 一啖湯三滴汗水, 好熱, 冬天就一流, 另一味, 煎肉餅, 先把肉餅蒸好, 再用火煎, 肉餅內有切碎的冬菇及馬蹄, 咬落少少彈少少爽少少脆, 非常好味, 送酒無得彈!

服務水準不算差, 侍應解釋十分清楚, 唯等菜時候有斷小插曲, 偶聽見老闆向侍應發嘮騷, 自言自語, 原來唔係鬧侍應, 而係話自己個仔唔勤力, 話左落嚟開工, 過晒時間重唔見人, 原來重係樓上訓緊覺, 跟著, 老闆又自言自語: “真係害我呀….”, 抱怨個阿仔個阿媽(即係老婆大人啦)唔請外人, 要自己個仔落嚟幫手, 但個仔又唔生性, 自己人話都無嘜用, 唉…真係…家庭生意唔容易呀!

另外, 老闆應該唔係好信得過員工, 比錢時侯, 侍應要特登叫老闆仔從廚房出來收錢, 個仔既服務態度認真麻麻, 木口木面, 多謝都無聲, 唉, 真係聽老闆講, “倒米呀!”

還有另外一單, 就是另外的一位男伙計, 睇電視, 播新聞, 剛講起嘉禾大廈兩位殉職消防員, 幾個伙計, 你一言, 我一語, 當日尚未清楚兩位殉職消防員的死因, 那位廚房伙計大大聲: “氧氣桶 梗係唔會比人啦… ” 命喎…我死不如你死, 邊有咁蠢, 老闆仔跟隨便答嗲: “咁辛苦…入黑社會都唔做消防員呀….” 唉..老闆, 有一個”如此”有責任感的兒子和員工, 我明白你的感受!