西關粥品 (Closed)

凍凍地，當然最好就食返d暖野！今日就同媽媽黎食呢度嘅粥，以前都有食過，但今次就寫下食評讚下佢！小店環境都ok，乾淨企理，服務ok 而且d野食黎得好快。呢度有太多選擇啦，所以同媽咪坐低後都要諗一陣先決定到食咩😂最後嗌左3樣野，西洋菜陳腎肉丸粥，煎鹹肉糭，牛腩腸。 呢個粥啖啖都係西洋菜，感覺冇咁膩，陳腎好爽，肉丸好彈牙，好好味～ 但我覺得之前食過嘅狀元及第粥仲好味d，鐘意食內臟嘅人可以一試！呢個煎鹹肉糭真係不得了！ 好香口，入口又有鹹蛋黃同埋肥豬肉嘅香味，點埋糖食更滋味！必點！牛腩腸嘅牛腩非常香，腸粉好滑，牛腩汁又夠濃，好正！大家黎開元朗都試下啦，絕對唔會令你失望👍🏻

之前喺雜誌睇過元朗名人鄧達智對西關粥品嘅介紹, 但始終未有機會去試. 今日要入元朗富達廣場嘅入境事務署攞passport, 終於可以嚟試喇. 我哋一家三口攞完passport就去搵呢間西關粥品嘅位置, 傻傻地兜了富達廣場一個大圈, 終於搵到了. 但竟然未開門喎, 原來係開12:00. 望下錶仲有半個鐘, 咁我哋惟有去千色廣場行過圈再過嚟啦.我哋12:05過返嚟, 只係淨返兩張吉枱咋. 坐低就拿拿林叫咗兩碗出名嘅粉仔$28.00同埋煎鹹肉糭$30.00. 之後再加多碗西洋菜陳腎肉丸粥$33.00粉仔嘅湯底同平時食開嘅完全唔同, 係杰撻撻似粥嘅質地. 配料都好豐富有蛋絲、叉燒、冬菇、豬油渣、鯪魚肉、金華火腿......百厭仔食得非常滋味, 添完一碗又一碗.煎鹹肉糭一碟有六件, 咬落非常香脆, 同屋企自己煎係無得比. 糭身略嫌"削"咗啲, 實返些少會更美味.西洋菜陳腎肉丸粥-粥底夠綿, 陳腎出奇地爽口(唔似煲完湯嘅死實)又夠鹹香, 配上青綠脆口西洋菜, 掂! 埋單$119.00