HK Food Miner's Profile

喺大圍呢條街，有唔只一間傳統茶記，佢哋各有名物，今次我就試吓呢間嘅生煎肉餅飯。生煎肉餅飯呢款招牌飯差唔多一半客都係為佢而嚟，肉餅嘅兩面都煎得好香脆，但係肉餅裏面又唔會太乾仲有肉汁，果然名不虛傳。乾炒三絲意粉呢味唔係名物，純粹係自己好耐冇食過炒意粉想回味下。不過廚師都炒得好有鑊氣，熱辣辣之餘意粉軟硬適中，好惹味。不過留意番呢度係舊式茶記，座位都幾迫，搭枱就好難避免，加埋佢生意真係幾好，成日都好多人，所以我都係快手食完就走人啦。…Read More

喺呢個商場嘅餐廳之中，呢間都幾熱門。返工日子如果想喺呢間餐廳食午餐一定要預先訂位，我聽啲喺呢區返工嘅朋友講，佢啲訂位都好full，要預早好多先可以訂到。今日午餐就叫咗銀鱈魚西京燒定食，佢嘅銀鱈魚西京燒做得幾正宗，味道適中之外魚嘅肉質都好幼嫩。另外佢嘅白飯煮得唔錯，軟硬適中，齋食都已經好味。不過佢嘅麵豉湯就比較淡味，麻麻哋。午餐定食加$10就可以選擇咖啡或茶或甜品。朋友提我一定要叫甜品黑芝麻布甸。食落又真係唔錯喎。除咗芝麻味好濃郁之外，佢仲有三層唔同嘅質地，可以試到三種味道，好味。…Read More

喺呢個商場度搵食嘅話，富園係我首選。呢間餐廳嘅茶餐可以食到六點，就啱時間去食就直頭可以當食晚飯。佢嘅食物選擇好多，粉麵飯伊麵樣樣齊，價錢都係一樣。咖喱汁焗牛腩飯咖喱汁好夠味，送飯一流。牛腩比較肥，如果唔介意其實食落就好香。唯一失色就係啲飯比較腍。沙嗲肥牛炒伊麵上枱熱辣辣，沙嗲汁都係好濃味，啲肥牛份量都好多，有好多件，伊麵炒得都唔錯，軟硬適中又夠入味。其實仲有好多菜式我都想試，以$46加杯嘢飲又坐得舒服，我會再嚟☺️…Read More

好耐之前喺呢度食過早餐，當時感覺質素中上。今次咁啱有機會又再食吓，睇吓水準係咪可以維持。番茄湯豬扒即食麵加配煎蛋佢嘅湯底係有誠意嘅，除咗蕃茄仲有洋蔥同薯仔。不過同之前相比好似冇咁濃。不過我已經另外加配隻煎蛋，將啲蛋黃汁溝落個湯底就好味好多啦。另外塊豬扒都幾夠腍，調味都足，算係唔錯嘅。番茄湯通粉，火腿煎蛋、牛油多士湯底都係稀啲，通粉軟硬適中，多士烘得唔錯，正常發揮。總體嚟講食物水平唔錯，但係份量偏少，計埋價錢兩個人差唔多要$100，計落性價比就差啲啦。…Read More

呢間餐廳最近開始做日式放題，喺網上同電視都有介紹，睇完覺得幾吸引，就試吓佢哋嘅午市放題。首先佢啲座位都幾迫，張枱都幾細，所以叫食物嘅時候都要就住就住，叫多幾款張枱就唔夠位放食物。佢嘅放題主打A5宮崎和牛同拖羅，不過唔知係咪因為我食午市嘅原因，呢兩款食材嘅質素真係麻麻，和牛冇乜油脂味，拖羅亦冇乜鮮味。另外其他魚生水準都好一般，連榴槤亦冇乜香味。比較好嘅有串燒牛舌芯，另外佢嘅薄脆TACO同和牛海膽牛角包都幾特別，味道都唔錯。整體而言食物質素都真係好一般，同預期相差都幾遠，有啲失望，之後選擇要再小心啲先得喇。…Read More

中午時分，喺中環搵位食飯真係唔容易。朋友之前已經訂咗位，不過因為塞車遲咗唔夠10分鐘個位就冇咗。好彩餐廳都安排咗坐吧枱，如果唔係就要坐戶外位熱死！前菜分別叫咗：Vietnamese Rice Paper Prawn Rolls 同 Beetroot, Lentil & Feta Salad紙米卷做得幾地道，個皮夠煙靭啲餡又惹味。沙律嘅材料都好新鮮，最緊要係份量好多，似係主菜多過前菜。主菜就叫咗 Flame N.Z Rib-Eye Steak，煎得都夠香，不過叫咗 medium rare 食落都係有啲柴。另外啲配菜沙律同薯條都好多，一定食得飽。最後都要讚吓餐廳員工服務好好，食到一半都幫我哋轉返去大枱！…Read More

假期一大班人去郊遊，搵地方食飯都唔係易事，因為又要有位，又要啱唔同人口味。喺南丫島，壽記係我首選，今次就叫咗個團體海鲜餐：白灼海蝦、炒蜆、燒鵝、粟米魚柳、脆皮生炒骨、椒鹽鮮魷、海鮮小炒皇、金銀蛋時菜、白飯任裝。普通餸菜，但味道绝不馬虎，而且夠晒鑊氣，份量十足。特別推介椒鹽鮮魷，生炒骨同海鮮小炒王。椒鹽鮮魷嘅魷魚好新鮮，外脆內軟，唔油；生炒骨味道啱啱好，唔會太甜又唔太酸，吃完第一件，重想繼續吃；海鮮小炒皇嘅韭菜夠嫩，蝦干大大隻好惹味，送白飯一流。雖然可能因為我哋人多所以坐得比較逼，不過伙記服務態度好好，非常友善，抵讚👍…Read More

曾幾何時，韓式自助烤肉係香港最受歡迎嘅韓國餐廳類別。不過到後來韓風興起，好多唔同形式嘅韓國餐廳出現，韓式自助烤肉就變咗係懷舊餐廳。呢間餐廳烤肉嘅部份同好多年前都係冇乜分別，有唔同款式嘅豬牛雞，另外仲有啲海鮮同蔬菜，味道都好懷舊。不過熟食就多咗好多選擇。其中一樣最出名嘅就係豬腳薑，好多食客一坐低唔係去攞肉去燒，而係去裝幾碗豬腳薑。佢啲豬腳炆得夠腍豬皮又厚，唔會只係得舊骨，薑醋嘅調味亦唔錯，酸甜適中好惹味。值得一提，佢嘅午市自助餐時間特別長，由朝早11點食到下晝四點，可以慢慢坐慢慢食。…Read More

好耐之前嚟過呢度食自助餐，印象係地方好大食物款式好多。咁啱見到做緊買二送二嘅優惠，就試吓依家水準如何啦。凍海鮮既蟹腳都算唔錯，有啲鮮味又唔會太乾。另外翡翠螺同蝦都好味。但係龍蝦就有啲似擦子膠，咬唔開又冇乜味。魚生就有紅蝦、帶子、八爪魚、三文魚、馬刀貝同埋吞拿魚，整體都算新鮮，質素可以接受。佢嘅鵝肝多士係即場煎嘅，鵝肝都幾大塊，不過就要排得比較耐。甜品選擇唔算多，最出色嘅係芒果拿破崙同榴槤拿破崙。另外試咗佢用光波爐加熱嘅疏乎厘，太甜喇，又冇乜蛋味，可以不試。飲品方面，除咗一般嘅罐裝飲品，經訂購平台訂位仲有得任飲紅白酒同橙汁蘋果汁。另外場中間有個攤位可以任飲Hoegaarden 啤酒，呢方面就做得唔錯。總體嚟講呢度比較適合一家大細，因為食物款式好多可以啱唔同人嘅口味，不過食物水平只係一般，冇乜邊樣特別突出。…Read More

喺沙田呢個商場行完嗰間好大嘅傢俬舖，通常都會忍唔住食個熱狗或者雪糕。不過其實係出口行多幾步，就有一間元氣。見佢嘅下午茶餐都幾抵，就試一試啦。呢個午後の三食包咗三樣嘢，包括係壽司、小食同輕食。揀咗個壽司盛 B，裏面有五件壽司：螺片、三文魚、甜蝦、吞拿魚同辣味三文魚，全部都好新鮮喎，啲飯團都唔會好散，茶餐有咁嘅水準驚喜到我。小食就試咗蟹味噌忌廉餅同大阪章魚燒，比較之下章魚燒就好味啲，份量都多啲。最後輕食叫咗湯烏冬，上枱都夠熱，正常水準。呢個下午茶每人平均$55，食物唔差，坐得舒服又唔會俾人趕走，滿意。…Read More

好耐以前喺黃埔返過工，記得呢個位曾經係許留山。今日再返去黃埔，許留山就一定消失咗啦，原來依家開嘅係鮮芋仙。呢類台灣甜品我好少食，不過今日有緣遇到心血來潮就試一試啦。叫咗兩碗冰芋圓，可能因為我少食啦，覺得佢啲芋圓都唔錯喎，幾煙靭有咬口。 另外啲配料好似地瓜、薏仁、珍珠都幾好味。中間刨冰嘅糖水甜味都適中，幾清新唔會太濃味。食嘅時候發現呢類甜品應該都係屬於年青人嘅，因為見到都幾多學生顧客，仲有啲外籍嘅年輕人幫襯添。…Read More

旺角通菜街都幾長，中間又擺滿攤檔，要搵到呢間餐廳都要花啲時間，好彩佢嘅門面都幾靚，行過就一定會認到。舖頭裝修都幾有情調，燈光偏暗，枱之間都闊落，地方算乾淨。叫咗午市套餐嘅泰式干炒闊河，雖然係叫做乾炒，不過其實都係濕濕地嘅。河粉質地都唔錯，唔會散修修炒到爛晒，入口都有啲彈性。另外配料份量都唔少，調味都幾好，夠惹味。值得一提午市套餐有龍眼冰送，不過送嘅質素都唔差，唔會死甜都幾好飲。佢午市唔算多人，食完坐多一陣都可以。…Read More

呢排天氣咁熱，喺條街行一陣好自然就會想搵間餐廳坐低飲吓嘢食個cake。咁喺德福嘅首選就係呢間啦☺️朋友一坐低就叫咗個 Afternoon Tea 嘅 Cake Set。佢揀咗美式特濃朱古力軟心蛋糕加多一杯維也納咖啡。個侍應話我知原來裝咗餐廳嘅app，做咗會員就可免費送一個蛋糕。咁我當然照做啦，仲即場免費換咗個Tiramisu，另外叫多杯開心果拿鐵。之後發現杯飲品嘅全名原來係叫做接吻接到無法公開心果拿鐵，笑咗😅！食物嘅水準都算正常發揮啦，最好食嘅就係朱古力軟心蛋糕，佢啲朱古力味真係幾香濃，好食。…Read More

朋友喺金鐘附近返工，俾佢發現咗呢間新開張嘅餐廳，連續食咗幾餐，仲叫埋我試一試。佢嘅位置喺Pacific Place嘅3樓，嗰層唔多餐廳，平時食飯好少會上到咁高，所以都搵咗一陣。而座位係開放式設計，裝修好靚，配合佢品牌嘅格調。因為朋友已經食過幾次佢嘅套餐，所以今日就試吓散叫。首先佢送嘅麵包質素都好高，值得一讚。CAVATELLI ASTICE龍蝦肉好新鮮，又軟又鮮味。貝殼粉軟硬度剛剛好，夠煙靭，加埋濃郁嘅龍蝦汁，好惹味。PIZZA MARGHERITA薄餅嘅質地都夠軟身，不過調味淡咗少少，芝士味都唔夠香濃，有改進空間。另外佢嘅濕紙巾包裝都好特別，一開始仲以為係牛油添😅…Read More

雖然奧海城都有好多餐廳，不過好喜歡喺呢間食。特別係如果唔想食得太飽，呢度就啱晒啦。今日叫咗3品料理，揀咗黑醋蜜糖豬仔脾、粟米枝豆馬鈴薯蛋沙律同埋芝麻酱拌菠菜冬菇，另外仲送咗碗湯，今日唔想食飯就揀咗鹽麴烤蔬菜，加多$10就有杯青森蘋果汁添。佢啲餸份量適中唔會太多，材料好新鮮，調味唔會太重，最好嘅就係碗飯都可以轉埋做蔬菜，食完感覺特別健康有益。朋友就嗌咗日本蛋沙律三文治，麵包都好新鮮軟熟，仲有沙律菜同薯條伴碟。除咗食物質素好，呢度啲位空間都好闊落，坐得好舒服。…Read More