jessyyyy的個人專頁

同朋友講開韓燒，突然好想食醬油蟹，上網搵到依間好多人大推醬油蟹，所以專登過九龍搵食。重點當然有醬油蟹啦，蟹肉鮮甜，入味得嚟唔會太鹹，第一次蟹膏加生蛋黃食，令蟹膏口感綿滑，用嚟配紫菜飯ball真係冇得輸😋😋因為朋友唔食牛，所以揀左唯一冇牛嘅BBQ Set A，有五花腩，辣醬五花腩，豬頸肉，配料亦非常豐富，有香腸，芝士，茄子，雪耳，大豆芽菜，泡菜。特別係雪耳，烤雪耳真係第一次食，好爽脆，驚喜十足。食到熱辣辣，叫個韓式牛腩冷麵降下溫。食韓國菜點會少得韓國前菜呢~我最愛嘅泡菜，亦都係我愛嘅味道，辣之中唔太酸，亦唔咸，應該醃得唔算好耐，口感好清爽。另外醃蘿蔔同烤肉好perfect match，可以中和烤肉嘅油脂，好食到忍唔住refill咗幾次🤭…查看更多

唔係好多餐廳會做青口放題，身邊朋友，同事，親戚一聽到都好surprise點解可以有d咁正嘅野🤣今次就同同事一齊去食。唔似得另一間只做星期一，依間一至日都有，時間方便又易約～預先買埋openrice嘅餐飲券，真係好抵食丫。青口有三款口味，白酒忌廉，西班牙辣肉腸同喇沙。三個人食，當然係先黎一個round每款一隻試味啦～湯汁好濃，好杰，完全掛住晒成隻青口，加上每次order都有兩塊麵包，可以不停咁用麵包點湯汁，真係一流。不過味道偏鹹，一個round之後只有白酒可以繼續encore。另外薯條都係任食，識食嘅一定係食cajun薯條🍟，香辣得黎又會令你食唔停口😋😋食薯條同辣野又點少得啤酒🍻呢，雖然餐牌冇寫happy hour幾錢，但都有折。個人食左3碟就飽飽埋單。…查看更多

土瓜灣食街一有新店，我都會去試食。越南菜近兩年先進注依區，今次見個裝修有d越南特式，一心以為正宗越南菜。menu就只有套餐，每種人數嘅套餐又分平價同貴價，仲要冇得食我最愛嘅法包，湯檬，撈檬，同米紙卷。每道菜都加個越式xx，就睇下你有幾越式。結果。。。。出現眼前就係依一堆泰式多過越式嘅野，餐牌不停強調越式，都只係此地無銀咁提緊你食緊越式野，冇特色，冇特別。到底我食左d乜🤷‍♀️生存喺食街好現實，好食就留，唔好食就會消失。依間我唔會再去。…查看更多

喜歡食大隻餃子，全港唔算太多間，又有太多做得唔太專門。土瓜灣食街之中開左新餃子店，餃子餡選擇唔多，只有4款，但就有湯，蒸，煎三種，仲有兩款特色煎餃，要試晒都唔係一星期可以做得完嘅事🤣食煎餃通常會拼d重草味嘅餡，當然係韮菜同芹菜芫荽，但韮菜平時都食得多，所以就用佢黎試埋佢嘅特式辣味煎餃，反而芹菜芫荽我就想認真試味，所以揀返原味。講到蒸餃，我就揀左椰菜雲耳，相信蒸會帶出佢嘅原味。做蒸餃嘅店唔多，皮唔可以太薄，又唔可以易穿，但又唔可以厚，依間可以用同一個皮做晒3種煮法，抵俾個叻👍冇試湯餃，因為冇特別指出湯底有咩特式。見到門口雪櫃仲有4款冷泡花茶，都好吸引，選擇困難嘅我樣樣都想試，但食左36隻餃已經好飽，都係留返下次啦～…查看更多

久不久都會陪屋企人去西環買乾貨，以往11點就買完搭埋車返屋企，但今次第一次午飯時間到達，就先帶兩老去搵食。酸辣湯同餃子都係我爸至愛，帶佢去左兩間睇餐牌，依間有15款餃子，比較專門做餃子，所以揀左依間。作為餃子控嘅我，點菜有幾個大方向1）貪心食一款湯同一款煎，測試餃子皮2）揀一款基本味道嘅豬肉餃，測試廚房調味3）有羊餃一定會試4）必定會叫酸辣湯(麵)，試下正宗唔正宗，而麵底就視乎肚餓程度5）特色，而又令我有興趣基於以上原則，加上近排唔食得牛，所以揀左白菜豬肉水餃，京蔥羊肉煎餃，酸辣湯麵，後加一個西洋菜豬肉水餃等食嘅途中，有時間慢慢欣賞店內環境，先望到炸餃子圖片，心諗我睇餐牌時係咪睇漏左啲乜野特色小食？但下一秒我就見到“煎粟米豬肉餃”幾個字，心知不妙。。先上酸辣湯麵，湯係杰杰地，係我心目中嘅程度，配個幼麵，本應係perfect match-杰湯可以掛麵，而幼麵又可以令每一啖都夠湯。撈緊個麵嘅時候已經覺得個酸辣湯料比較齋，冇肉絲，可能係唔同鄉下嘅問題啦酸味係有，但同平時食開上海風味有唔同，至於辣味，係零，唔食得辣嘅媽媽都冇話辣，想食辣就自己加豆瓣醬。然後上“煎”餃，冇冰花嘅煎餃，似錦滷雲吞，或者有得食煎釀三寶嘅車仔麵檔嘅炸菜肉餃咁。雖然同心目中有落差，但較濃味嘅餃經過有油嘅高溫整過，味道會比較突出，個人認為依個定律係唔會有錯。最後係水餃，餃皮厚度適中，白菜豬肉餃係餃子中嘅原味、基本款。依個餡爽口到一個點，好奇心驅使我即場解剖餃子，以為有荀，點知。。係椰菜=_=”我即刻拎返餐牌睇，原來“一切以英文為準”。但椰菜真係好爽脆，似諗住用煮餃嘅時間煮熟椰菜，唔知係店主原有心思想做到咁爽脆，定係意外。另一款水餃揀左西洋菜豬肉餃，因為有去開街市嘅我，知道依家西洋菜初出，比夏天時更嫰更甜。由於餃皮不厚，可以清楚睇到餃子餡好綠，菜好多，除菜葉外，餡中更加入菜梗，增加口感，有驚喜。唔覺有太多味精，食完去買乾貨再返屋企都未需要chur水黎飲。…查看更多