阿哈's Profile

呢間新開嘅日本料理係晌大圍站對面，雖然晌街尾，但係都幾易搵到。佢入面嘅座位唔多，入口走入嚟時有一列屏風阻隔，面街嗰邊就開咗個唔大唔細嘅玻璃窗，總算唔會俾街外人一眼睇晒。由陳設睇嚟，佢哋應該係想營造一個同街坊式食店唔一樣嘅用餐環境。打開餐牌，刺身、壽司、燒物、揚物、一品料理等等都有，算係間多元化嘅日本料理，定價就比較進取。我哋叫咗幾樣嚟試，鹽煮牛舌切得夠厚，上面有啲黃芥辣，可以點醬汁再夾意大利青瓜一齊食，酸酸甜甜咁。彩虹刺身卷用咗吞拿魚同三文魚等等三款唔同顏色嘅刺身做餡，另外仲有牛油果同蟹籽，顏色比平時嘅卷物豐富，口感味道就幾討好。什錦天婦羅分別係海老、日本青椒、番薯、南瓜、冬菇同蟹柳，炸皮都幾薄脆，感覺唔錯。燒茄子燒得軟綿綿，上面仲搽咗柚子醬同少少辣粉，食起上嚟微甜都幾清新。…Read More

嚟到呢間晌荃灣悅來坊嘅餐廳，試咗$228一位嘅日本料理+火鍋+甜品放題，另外仲有比較平嘅火鍋+甜品放題，限時係兩個鐘，唔同時段收費都略有不同。自助火鍋料有生菜、番茄、冬瓜、南瓜、粟米、冬菇等。另有仲有啲比較飽肚嘅烏冬、即食麵等。飲品都係自助嘅，當晚有常見嘅汽水、韓式飲品同道地紙包飲品，酒精類嘅就有jolly shandy等。另外仲有個toppings corner，放滿咗朱古力豆、彩針、迷你棉花糖、朱古力漿等，可以自己幫啲甜品裝飾一下。拎完同叫完嘢食，就起動喇！精選豚肉嘅脂肪同肉嘅比例平均，口感鬆化，日本廣島蠔蠔身算脹卜卜幾鮮味。自助火鍋料嘅火炙芝士丸質素幾高，烏冬就煙煙韌韌咁。刺身有十款左右，我哋試咗三文魚、八爪魚、墨魚同甜蝦，三文魚幾肥美。燒日本番薯仔一啖一口味道幾甜，串燒日本雞軟骨微鹹脆口，串燒菠蘿就又甜又多汁。鹽燒牛舌爽嫩有牛味。最後仲食埋甜品，軟雪糕係用雪糕機唧出嚟嗰種，等侍應拎到嚟之後就可以自己去自助吧加toppings，質感軟滑。楊枝甘露嘅密度比一般糖水舖高，入面仲有西米、鮮芒果粒、柚肉等等，酸酸甜甜都唔錯。…Read More

嚟到酒吧林立嘅諾士佛臺，試咗最近開嘅樓上酒吧。入到去就見到一部大雪櫃，入面放滿各式各樣嘅香港手工啤酒，雪櫃外面仲分別用啤酒樽蓋砌咗啤酒樽圖案同HKBEER字樣。除咗多款飲品之外，仲有幾款小食同主食等等，雖然唔及西餐廳多樣化，但以一間主打飲嘢嘅餐廳嚟講選擇都算唔少。晌店員嘅推介之下叫咗呢款本地薑試試，係餐廳嘅調酒師自行研製嘅香港手工啤酒cocktail嚟。調酒師晌玻璃杯入面加咗威士忌、薑片、呍呢嗱糖漿、檸檬、蛋白同冰塊，仲灑咗肉桂粉，拎到嚟之後先將麥子薑茶啤酒倒入去再撈勻。肉桂將薑味帶出，甘香易入口，又冇平時飲薑茶遇到嘅辛口感，非常討好。啡菇配自家製黑松露醬未食已經聞到陣陣香氣，大啡菇切成四片長條形，外層蘸漿炸脆內層就軟滑，配上餐廳自家製嘅黑松露醬，夠香之餘又唔會太過濃郁。蟹肉忌廉意粉中間分別放咗蟹肉絲同青瓜絲，忌廉汁幾濃，意粉煮得煙煙韌韌，撈勻嚟食幾鮮味。…Read More

去咗阿爺粥品手工涮涮鍋，入面有少少新派茶樓嘅感覺。午市時段主要係食粥品小炒等等，同埋冇茶芥加一，晚市就係食粥底火鍋，呢次我哋就叫咗兩份午餐試試。紅燒野菌入面有冬菇、秀珍菇、本菇、雞髀菇，味道唔錯。油炸鬼拎到嚟嗰陣已經分成四件，都幾脆。蠔仔肉碎粥嘅質感好濃，同埋都幾軟綿。粥入面嘅蠔仔最少有十幾粒，同埋有薑絲等等，食起上嚟都幾鮮味。白玉魚雲粥入面嘅白玉係指冬瓜，煮得仲有少少爽口感。魚雲就係魚頭嘅腦髓部份，魚頭肉嫩、魚腦髓滑滑哋。兩款粥品比較之下，我就鍾意蠔仔肉碎粥多啲啲。…Read More

去咗尖沙咀天文臺道8號，呢棟商業大廈入面聚集咗唔少食肆，今次就試試囍鍋。入口旁邊有幾個大魚缸，養咗唔同嘅新鮮海產。佢哋嘅樓底夠高，空間感十足。可能因為踏入夏季天氣開始熱，當晚嚟食蒸氣鍋嘅食客唔算多。呢度嘅蒸氣鍋都係用竹帽咁嘅蓋蓋住，同埋鍋底可以煮粥嘅。先食刺身，三文魚個口感幾肥美。呢個係未切嘅象拔蚌仔，大約等如成人手掌嘅大細。之後就拎入廚房去內臟同切條，蒸熟咗咬起嚟脆身鮮味，個人覺得唔錯。中蝦嚟到嗰陣仲郁緊，蒸完之後蝦肉好厚同彈牙。順德污糟雞嘅雞件入面有紅棗、冬菇、蟲草花、大頭菜絲，雞肉唔嚡口，調味又唔會太過濃。蔬菜有茄子、秋葵、菜心等，不過我哋就試咗田園孖寶，其實係切片南瓜同番薯，南瓜軟綿微甜、番薯就幾粉嫩。嚟到甜品環節，桂花糕入面嘅杞子令佢好清甜，餐後食係幾滋潤嘅。經過一輪蒸海鮮同其他食物嘅過程後，石鍋入面嘅粥都煮好喇。仲可以配埋炸脆片、蔥花、芫茜或大頭菜粒嚟食。…Read More

呢間Shine身處嘅大廈入口晌漢口道某連鎖咖啡店側邊，雖然同iSQUARE只係一街之隔，但就少咗份繁華，都幾旺中帶靜。裝修就係近年流行嘅工業風，當中仲用木條砌咗唔同嘅裝飾。玻璃窗位可以睇到尖沙咀嘅鬧市景，牆上仲有盞剪影燈折射出店名Shine字樣，細心一睇剪影其實係港島區嘅維港景嚟。除咗散叫餐牌之外，我哋去嗰日仲有星期六、日同公眾假期限定嘅Brunch Menu。呢日試咗幾樣嘢，先係燒日本M4和牛薄切。日本M4和牛燒得生熟啱啱好，薄切嘅厚度係有啲咬口嗰種，食起上嚟軟嫩有油香，同埋加咗少少芝士片同黑醋調味，食下底下嘅火箭菜就可以解膩。想食多啲蔬菜，晌Brunch Menu入面嘅凱撒沙律同意式雜菜多士之間揀咗後者，因為好似少見啲啲咁。鑊仔入面有多款切粒雜菜，分別係意大利青黃瓜、番茄、甘筍、茄子、洋蔥等等，意式醬汁好杰身，個味道都幾平衡。長形多士表面塗咗牛油，單食就香脆，用佢嚟蘸醬食就幾清新，連平時怕酸味嘅朋友都話唔錯。侍應拎呢份炸魚薯條嚟嘅時候，我哋真係有少少打咗個突。Brunch Menu唔係一人份量嚟咩？實際份量真係令人失咗預算。同埋平時嘅炸魚大多數整成長條形，呢度就係成件好似塊炸魚扒咁，上面就加咗啲鹽同黑椒碎調味。炸魚食起上嚟魚肉紮實唔鬆散，又唔會嚡口，薯條就係厚切都幾脆。我哋仲轉咗餐飲，Rose Latte嘅拉花好靚，同埋用咗玫瑰花點綴。朋友就叫咗支Yeastie Boys Gunnamatta Tea Leaf IPA嚟試，即係伯爵茶葉手工啤，表面泡泡擺咗陣都冇乜點散開，飲起上嚟幾甘香易入口。原本想試埋甜品架，但係Brunch Menu嘅炸魚薯條份量比預期多，如果細食嘅話分分鐘兩個人share一份都夠，惟有等下次先啦！…Read More

睇網上消息話Espuma最近裝修咗，之前係比較型格，而家就走悠閒路線。 呢日試咗其中幾樣嘢，玫瑰烏龍茶入面有玫瑰花乾同藍莓，味道清甜。海鮮番茄清湯有大蜆、蝦同藍青口，清湯就另外用個壺裝住，湯質清兼呈淡黃，心諗點解唔係橙紅色嘅？不過飲落又幾有番茄味。彩虹麻糬窩夫配雪糕嘅色彩好豐富，窩夫外皮薄脆內層煙韌，彩色雪糕就主要係甜味，但加埋啲微酸嘅芒果醬，同埋鮮士多啤梨、黑莓同哈密瓜咁食總算討好。咖啡拼盤係用咗咖啡慕絲蛋糕、咖啡慕絲、蛋白脆餅，再加三色糖漿同朱古力曲奇餅碎組合而成，賣相幾靚幾適合拎嚟呃like。佢嘅甜度幾高，同鮮黑莓同紅桑子一齊食就可以解膩。西班牙油條配雪糕嘅油條織到成個藤球咁，中間放咗一球呍呢嗱雪糕，驟眼睇有啲似首飾盒咁，口感有少少似餅乾條。留意返佢哋嘅冷氣非常非常非常非常強勁，女仔去食嘅話記得帶多件薄褸或披肩呀！…Read More

呢間Green Door Coffee原來有兩間分店，一間晌尖沙咀嘉蘭圍，呢間就晌銅鑼灣香港中央圖書館附近。雖然係間咖啡店，不過主菜嘅選擇都唔少。叫咗份午餐試試，個餐包埋雜菜湯，湯入面有椰菜、西芹同洋蔥。雞肉墨西哥餡餅配田園沙律嘅墨西哥薄餅烘得脆口，中間夾咗雞肉、芝士同番茄醬，醬入面有番茄等切粒蔬菜。伴碟嘅田園沙律就有車厘茄同紫椰菜之類，配埋油醋汁，係一份唔膩嘅午餐。佢哋仲有多款咖啡好似Latte同Cappuccino之類，我唔想太花巧，就決定試試手沖咖啡。晌幾款咖啡豆之中揀咗Costa Rica Sumava Natural，餐牌寫佢嘅aftertaste有啲似蘋果、士多啤梨、乾果、菠蘿，飲落酸酸哋同幾有果香。對於唔太習慣濃重咖啡嘅人嚟講，呢類近似果味嘅咖啡豆就比較容易令人接受。…Read More

晌油麻地砵蘭街嘅村爺爺，同一條街有三間唔同名嘅分店，主打食物各有不同，呢次試咗龍蝦湯泡飯做主打嗰間。港式餐廳嘅格局，環境企理。牆上面貼晒報章雜誌嘅介紹，仲有老闆同多位明星嘅合照。啱啱好係下午茶時段，幾乎所有套餐都包熱飲，比其他時段抵食。睇過其他人嘅相，覺得極上海鮮龍蝦湯泡飯最吸引。實物的確好有睇頭，晌一間平民餐廳嚟講可算難得。龍蝦頭主要係用嚟裝飾，另外仲有扇貝、青口、八爪魚、魷魚同蜆肉。扇貝大隻肥厚唔韌，其他海鮮口感爽彈。各款海鮮嘅件數仲唔少，如果晌海鮮專門店食嘅話應該唔止六十幾掛？龍蝦湯方面色澤質感比較淡同薄，不過飲起嚟微鹹有蝦香，亦無乜令人覺得口渴。湯面仲有蔥花同薑絲，既辟腥又可以提鮮。海鮮下面仲墊咗生菜，食啲蔬菜感覺平衡啲。 原本怕泡飯份量太多會食唔晒，於係將佢轉做米線，諗唔到麵量都好多下！餐飲揀咗熱奶茶，飲起嚟順滑，感覺唔錯。…Read More

去開九龍灣，夜晚去咗呢間茶室買嘢返去食，朋友嘅檳城福建蝦麵，就咁睇配料有豬腩肉、蝦、烚蛋、通菜、炸乾蔥，下層就係油麵同米粉，湯底就分開碗嚟裝嘅。我就買咗星加坡喇沙，同樣分咗兩個外賣紙碗，呢碗係雞絲、豆卜、蝦肉、烚蛋、九層塔、芽菜同米線。呢碗就係喇沙湯，面層泛起紅色嘅辣油，湯入面仲有幾片魚片。將所有配料放埋一齊，再倒咗三分一喇沙湯入去，份量已經多到就嚟滿咁。喇沙湯飲落有椰汁香，辣度輕微都幾惹味。雖然價錢唔平，不過啲配料都幾豐富嘅。…Read More

最近麥當勞嘅香芋批又再次登場，晌咁多款曾經推出過嘅新口味炸批之中，佢都可以算得上係最討我歡心嘅款式之一嚟。拎上手嘅時候仲係熱辣辣，批嘅外層炸得好脆卜卜，內層嘅餡料就比較杰身但又有少少流心嘅質感，而且每咬一啖都可以食到口感軟綿綿嘅切粒香芋肉，味道甜甜蜜蜜咁都幾唔錯。我係晌3月14號PIE DAY嗰日買嘅，除咗比平時平好多之外，仲隨批跟埋一張印咗QR Code嘅貼紙，可以自己晌網上面揀返個Pie Message嚟送俾人，都幾好玩呀。…Read More

夜晚去試榮耀餐廳，佢哋嘅面積唔算大，有少少港式嘅感覺，但環境乾淨企理。叫咗啲嘢食再轉套餐，是日餐湯係甘筍薯仔忌廉湯，上面有幾粒麵包粒，湯嘅質地濃稠飲落香甜。之後就係白酒清煮藍青口，藍青口用咗白酒、洋蔥、蒜蓉等等一齊煮，肉質唔韌同埋都幾香口。番茄肉醬意粉當中嘅肉醬加咗番茄粒、洋蔥、蒜蓉同香草等等，份量唔少，肉碎比醬汁仲要多，意粉煮得唔軟唔硬，同肉醬撈埋一齊食感覺唔錯。最後飲埋熱檸檬茶，咁就啱啱好喇。…Read More

又同人去咗買貢茶嚟飲，又係買咗珍珠奶茶，上次天氣太凍要熱嘅，呢次天氣開始回暖就買咗凍嘅，唔知係唔係心理作用，凍飲好似比熱飲偏甜咗少少，不過仍能飲到奶味同少少茶香。珍珠至少佔個杯嘅三分一，份量都幾多下，幾乎每飲一啖都食到珍珠，口感煙煙韌韌好Q軟。朋友嗰杯古早味酸梅湯，佢話唔係好受到嗰種酸酸甜甜嘅感覺，仲話有少少似飲緊益力多，我一向對酸味食物飲品都唔抗拒，可惜怕啱啱飲完奶類又飲佢兩者會相沖，所以都講唔到係乜味喇！…Read More

去開呢頭見附近又有Lady M，就去食個甜品，記得早年啱啱開業嗰陣一位難求，就算外賣都要等好耐，而家熱潮稍為冷卻，加上港島區兩間分店相繼營業之後，晌尖沙咀店堂食變相易搵位得多。伯爵茶千層蛋糕係用咗多層班戟皮堆疊而成，雖然講唔上千層，但都有接近十幾二十層左右。蛋糕表面同每層之間都搽咗伯爵茶味忌廉，同埋灑咗伯爵茶葉碎做裝飾，某啲切餅上仲可能會有矢車菊嘅花瓣，可惜我哋呢件啱啱好係無嘅。食起嚟有啲茶葉芳香，唔算太甜。除咗馳名嘅千層蛋糕之外，佢哋其實都仲有其他類別嘅蛋糕。柚子芝士蛋糕相對起千層蛋糕嚟講就細件少少，上層係挺身嘅焗芝士蛋糕，下層就係比例較少嘅呍呢嗱海綿蛋糕，整體質感滑溜，忌廉芝士味道香濃明顯，當中仲夾住柚子嘅清香，加埋一齊都唔會太膩。…Read More

夜晚同人去咗權發食晚餐，食咗幾樣嘢，不過只係影咗少少。椒鹽瀨尿蝦皇比平時嘅瀨尿蝦大隻近一半，表面均勻咁沾咗炸蒜蓉同辣汁，蝦殼易拆蝦身實淨，食起嚟彈牙惹味。之後就係白胡椒煮花蛤第一次食用湯浸嘅方式烹調嘅花蛤，花蛤肥厚無沙，同埋加咗大量嘅白胡椒，辛香得來又能夠突顯鮮甜味，最底下仲有啲粉絲晌度，吸滿湯汁同花蛤精華，唔花巧但又幾出色。芝士龍蝦伊麵入面嘅龍蝦斬成小件再蘸粉走油至表層微微酥脆，再用加咗芝士等等嘅醬汁炒勻，然後就淋晌煮好嘅伊麵之上，鹹香中又有幾分芝士嘅奶味，都唔錯。…Read More